திருவிளையாடல்

படம் இணையத்திலிருந்து

சிவபெருமான் பல அவதாரங்கள் எடுத்தும், பலரது மனதிலிருந்து அவர்களை ஆட்டுவித்தும் மனித இனத்திற்குப் பல படிப்பினைகளை உணரச் செய்த ஏராளமான சம்பவங்களடங்கிய திரைப்படம் தான் திருவிளையாடல். நடிகர் திலகம் சிவாஜிகணேசன் அவர்களின் அற்புதமான நடிப்பு! நினைக்கையில் இப்போதும் உடல் சிலிர்க்கிறது. கடந்த சனியன்று (27-05-2017) காலை நிலம்பூர் அருகே பூக்கோட்டும்பாடம் எனுமிடத்திலுள்ள வில்வத்து சிவாலயத்தில் சிவலிங்கமும், விஷ்ணு சிலையும் தகர்க்கப்பட்ட செய்தி காட்டுத் தீயாய் நாடெங்கும் பரவியது. தொலைக்காட்சிகளிலும், முகநூலிலும் வந்த செய்திகளும், அவை ஏற்படுத்திய பரபரப்பும் மீண்டும் மலபாரில் 1921ல் ஏற்பட்ட கலாபம் (மதகலவரம்) போல் ஒன்று ஏற்பட்டு விடுமோ என்ற பயத்தை எல்லோரது மனதிலும் ஏற்படுத்தியது. பல அரசியல் கட்சிகளும், அரசியல் பிரமுகர்களும் பல கருத்துகளுடன் வலம் வந்தனர்.

சில தினங்களுக்கு முன் வாணாபுரம் அம்மன் கோவிலிலும் இது போல் ஒரு சம்பவம் நடந்திருந்தது. அம்மனின் விக்ரகம் தகர்க்கப்படவில்லை. ஆனால் அம்மனின் விக்கிரகத்தின் மீது உடுத்தப்பட்ட பட்டாடை தீக்கிரையாக்கப்பட்டிருந்தது. இதற்குப் பின்னால் முஸ்லிம் தீவிரவாதிகள்தான் என்ற கருத்துடன் சிலர். இடையில் மாட்டிறைச்சி கேரள மக்களுக்குக் கிட்டாக் கனியாகும் என்ற செய்தி எரிகிற தீயில் எண்ணை ஊற்றியது போல். பா.ஜ.க கட்சியின் பிரமுகர்களும், அகில இந்திய முஸ்லிம் லீக் கட்சி பிரமுகர்களும் காரசாரமாக வாக்குவாதம் செய்வதைப் பார்த்த சாதாரணக் கேரள மக்கள் என்னாகுமோ? ஏதாகுமோ என்று அஞ்சி நிலை குலைந்த நேரம். திறமையுள்ள போலீஸ்காரர்கள் இதற்கெல்லாம் செவி கொடுக்காமல் வலை வீசி அடுத்த நாளே நிலம்பூர் அருகேயுள்ள மம்பாடு எனுமிடத்தில், கட்டிட வேலை செய்துவரும், திருவனந்தபுரம் கிளிமானூரைச் சேர்ந்த மோகன் குமாரைக் கைது செய்தேவிட்டனர்.

படம் இணையத்திலிருந்து

கையில் விலங்குடன், போலீசாருடன், சேதமாக்கப்பட்ட சிவலிங்கம் மற்றும் விஷ்ணு விக்கிரகங்களுள்ள கோயிலுக்குக் கொண்டு வரப்பட்ட மோகன் குமாரை சானல்களில் கண்ட சமாதான விரும்பிகளான கேரள மக்களுக்கு அப்போதுதான் போன உயிர் திரும்பவந்தது. நெற்றியில் குங்குமமும், முறுக்கிய மீசையுடனும் மனநிலை சரியில்லாதவர்கள் பார்க்கும் பார்வையுடன் தென்பட்ட மோகன் குமாரைக் கண்டதும் எனக்கு என்னவோ திடீரென திருவிளையாடல் படம் தான் நினைவுக்கு வந்தது. ஏன் என்பது இடுகையைப் படித்து முடித்ததும் உங்களுக்கே புரிந்துவிடும்.

அப்போது மோஹன் குமாருக்கு 13 வயது. சர்க்கரை திருடியதால் அவனது தாயார் அடி கொடுக்க, கல்லெடுத்து எறிந்து தாயைக் காயப்படுத்தி ஓடிய மோஹன் குமார் அதன் பின் வீட்டிற்குப் போனதே இல்லை. நாடோடியாய்த் திரிந்த மோஹன் குமாருக்கு இப்போது வயது 45. இதனிடையே சந்தா பணம் தரவில்லை என்ற காரணத்தால் ஒரு வயதான பெண்மணியைக் குளத்தில் தள்ளிவிட்டு கொலையும் செய்து தப்பியிருக்கிறார். இடையில் எப்போதோ ஒரு சோதிடனைக் கண்டு தன் வாழ்வில் ஏன் இப்படி நிம்மதியில்லாதிருக்கிறது என்று கேட்க, சோதிடன் “அது பிராமண சாபம்” என்று சொல்ல, மோஹன் குமார் முதலில் பூசாரிகளை வெறுக்க ஆரம்பித்திருக்கிறார். பின் படிப்படியாக அந்த வெறுப்பு பூசாரிகளுக்கு ஒரு நீதியும், சாதாரண மக்களுக்கு வேறு நீதியும் வழங்கும் இறைவன் மீது திரும்பியிருக்கிறது.

அவர் தங்குமிடத்தில் யாராவது இறைவனின் படம் வைத்து வணங்குவதைக் கண்டால் இறைவனையும், வணங்குபவரையும் ஏசுவதுண்டாம். இப்படிப்பட்ட மோஹன் குமார் கடந்த வெள்ளிக்கிழமை பூக்கோட்டும்பாடம் வில்வத்து கோயிலுக்குச் சென்று அர்ச்சனைச் சீட்டு வாங்கி அர்ச்சனை செய்து, கோயிலுக்குள் நுழைய எளிதான வழி ஓட்டைப் பிரித்து இறங்குவது என முடிவும் செய்துவிட்டார் சனி நள்ளிரவு தன் கைவரிசையைக் காண்பித்து, கோயில் முன்பிலுள்ள ஒரு கொட்டகையில் உறங்கியிருக்கிறார். அதிகாலை எழுந்து கோயிலுக்குச் சென்ற ஒருவரிடம், “கோயில் எப்போது திறப்பார்கள்? அங்கு ஏதோ அசம்பாவிதம் சம்பவித்திருக்கிறது” என்று சொல்லியும் இருக்கிறார். எப்படியோ? இப்படித் நுணலும் தன் வாயால் கெடும் என்பது போல் நடந்து கொண்டதால்தான் போலீசார் அவரை எளிதாகக் கண்டுபிடித்துக் கைது செய்ய முடிந்திருக்கிறது.

வில்வத்து கோயில் என்றழைக்கப்படும் அச்சிவாயலத்தில் ஓரிரு வருடங்களுக்கு முன்பு “தேவ பிரஸ்னம்” வைத்துப் பார்க்கையில் அக்கோயிலில் சிவன் மட்டுமல்ல, விஷ்ணுவின் சைதன்யமும் உண்டு என்று கண்டுபிடித்து விஷ்ணுவுக்கு ஒரு கோயில் கட்டி, சிவனுக்குச் சமமான முக்கியத்துவம் கொடுக்கத் தொடங்கியிருக்கிறார்கள். கடந்த ஓரிரு வருடங்களில் சப்தாகம் போன்ற விஷ்ணுவுக்கு அதிக முக்கியத்துவம் கொடுக்கும் ஆராதனை முறைகள் அதிகமாக நடந்து வருகிறது. இப்படிப்பட்ட புதிய சம்பிரதாயங்கள் தேவையற்றது என்று சிலர் கருத்துச் சொன்னதைச் செவிகொள்ளாமல் சைவ, வைணவ சம்பிரதாயங்களைக் கூட்டிக் குழைத்தவர்கள் இப்போது நடந்த இச்சம்பவங்களால் நிலை குலைந்து போயிருக்கிறார்கள்.

“இது சிவனின் திருவிளையாடலாக (சிவலீலை) இருக்குமோ? சிவனுக்குச் சமமாக விஷ்ணுவைக் கொண்டு வந்தது பிடிக்காமல் போனதால் மோஹன் குமாரது மனதில் இத்தகைய எண்ணத்தை விதைத்துத் தன் கோபத்தை வெளிப்படுத்துகிறாரோ” என்று சிலர் கேட்க மற்ற சிலர், “இது கேரளம். இங்கு தந்திரிதான் கோவிலுக்குத் தந்தை. இறைவனை கோயிலில் பிரதிஷ்ட்டை செய்தவர். இறைவனுக்கும் மேலே! ‘தேவப்பிரஸ்னம்’ வைத்து நூற்றாண்டுகளுக்கு முன்பு குருவாயூரில் சிவனையும், பார்வதியையும் மம்மியூருக்குக் குடிபெயர்த்தது போல், வில்வத்து சிவனை அமரம்பலத்திற்குக் குடிமாற்றி, விஷ்ணுவை வில்வத்து நாதனாக்கி விடுவார்கள்” என்கிறார்கள்!

ஆமாம், கேரள மக்களுக்கு இதெல்லாம் ஒரு பிரச்சனையே இல்லை. மாட்டிறைச்சிக்கு ஒரு தீர்மானம் வேண்டும். மாணி (மாணி காங்கிரஸ் தலைவர்-கேரளத்தில் மூன்றாவது பெரிய கட்சி) ஒரு தீர்மானம் உடனே எடுக்க வேண்டும். அவர் காங்கிரஸ் கூட்டணியுடனா? அல்லது கம்யூனிஸ்ட் கூட்டணியுடனா? இல்லை பாஜகவுடன் கூட்டணி அமைக்கப் போகிறாரா?.... நீட் பரீட்சை ரிசல்ட் 8 ஆம் தேதி வெளியிடப்படுமா?…..ஸ்வாமி கங்கேஸானந்தாவின் துண்டிக்கப்பட்ட மர்ம உறுப்பின் நிலை என்ன?.... அவரைக் காக்க பாதிக்கப்பட்ட பெண்ணின் தாய் ஏதேனும் செய்வாரா?... போன்ற ஏராளமான முக்கியத்துவம் வாய்ந்த பிரச்சனைகளுக்கிடையில் சிவனாவது, விஷ்ணுவாவது!?!