ரங்கனதிட்டு- ஸ்ரீரங்கப்பட்டினம் கோவில் - 10

பஸ்சிமவாஹினியில் நம்ம கடமையை முடித்துக் கொண்டு (பதிவும் போட்டாச்சு) ஸ்ரீரங்கப்பட்டினம் கோவிலுக்குப் போனோம். ஸ்ரீரங்கப்பட்டினம் கோட்டையையும் கோவிலையும் 38 வருடங்களுக்குப் பிறகு பார்க்கிறேன். அப்பவும் சரி இப்பவும் சரி, நிதானமாக அங்கு ஒரு நாளேனும் தங்கிப் பார்க்க முடியவில்லை என்ற ஆதங்கம் எனக்கு உண்டு. இது பல பயணங்களிலும் ஏற்படும் ஒன்று. மகன் இங்கு இருந்தவரை நிதானமாகப் பார்ப்பது நடந்தது. இருவரின் அலைவரிசையும் ஒன்று.

வீட்டவர்கள் ஒரே அலைவரிசையில் அமைவது அரிதுதான். அவரவர் ஆர்வங்களைப் பூர்த்தி செய்து கொள்ளும் வாய்ப்பேனும் கிடைத்தால் நல்லது. தற்போது அப்படியான வாய்ப்புகளுக்கான சூழலும் இல்லை.

பாருங்க பதிவிலிருந்து விலகல். காவிரியின் தாக்கம்!

ஸ்ரீரங்கப்பட்டினத்தில்  காவிரி ஆறு பிரிந்து கொஞ்ச தூரம் ஒடி மீண்டும் இணைவது போல நானும் விலகிச் சென்று மீண்டும் பதிவில் இணைந்தாச்சு. காவிரி, தீவு போல உருவாக்கிய பகுதியில் அமைந்திருக்கும் இக்கோவிலின் இறைவனான ஸ்ரீரங்கநாதரின் பெயரிலேயே ஊரின் பெயர் - ஸ்ரீரங்கப்பட்டினம். பெயர்க்காரணத்தைச் சின்னக் குழந்தையும் சொல்லும்!

காவிரிக் கரையில் அமைந்திருக்கும் மூன்று ரங்கநாதர் கோவில்களும் - ஸ்ரீரங்கப்பட்டினம் ஆதிரங்கம் - கர்நாடகாவில் சாமராஜ்நகர் மாவட்டத்தில் சிவனசமுத்திரம் பகுதியில் உள்ள மத்யரங்கம் (இப்பயணம் அடுத்தாப்ல) - திருச்சியில் ஸ்ரீரங்கம்/திருவரங்கம் கோவில் அந்தியரங்கம். இவை எல்லாமுமே காவிரி நதி சில இடங்களில் ஏற்படுத்தும் தீவுகளில்/திட்டுகளில் அமைந்த கோவில்கள்.

இந்த மூன்று கோவல்களையும் இணைத்து, திரிரங்க யாத்திரை என்று, விடியலுக்குள் தொடங்கி அந்தி சாயும் நேரத்திற்குள், அதாவது, ஸ்ரீரங்கப்பட்டினத்தில் தொடங்கி, மத்யரங்கம் தர்சனம் முடித்து நேரே திருச்சி திருவரங்கப் பயணமாம். மாலை சூரியன் மறையும் முன் தரிசனம் முடித்து திரும்பும் யாத்திரையாம்.

வேறொரு குறிப்பு சொல்வது பஞ்சரங்க கோவில்கள்- ஸ்ரீரங்கப்பட்டினம் -ஆதிரங்கம் (காவிரி தொடங்கி ஆதிரங்கம் (காவிரி தொடங்கி வரும் பகுதி என்பதால்) சிவனசமுத்திரம் கோவில் - மத்யரங்கம். இது ஒரு சிலரால் மத்யரங்கம் என்று சொல்லப்பட்டாலும் இந்தக் குறிப்பில் தமிழ்நாடு திருவரங்கம் - மத்யரங்கம் எனப்படுகிறது. அப்பாலரங்கம் - கோவிலடி, தமிநாடு. சதுர்த்தரங்கம் - சாரங்கபாணி கோவில், கும்பகோணம். பஞ்சரங்கம் - பரிமள ரங்கநாதர் கோவில் திருஇந்தளூர், மாயவரம்.

நாம் இப்ப பார்க்கும் ஸ்ரீரங்கப்பட்டினம் கோவில், மேலை கங்கர் குல அரசர் படைத் தலைவர் - அப்பகுதி தலைமை திருமலைய்யா என்பவரால் 984 ல் கட்டப்பட்டதாகக் குறிப்புகள் சொன்னாலும் அதற்கும் முன்னரே கோவிலின் இறைவனின் திரு உருவச் சிலை அங்கு இருந்ததாகவும் அதன் மேலேயேதான் கோவில் கட்டப்பட்டதாகவும் சொல்லப்படுகிறது.

அதன் பின் 12 ஆம் நூற்றாண்டில், ஹொய்சாள அரசர் விஷ்ணுவர்த்தனனால் ஸ்ரீ இராமானுஜருக்கு இந்தக் கிராமம் அக்ரஹாரமாக அதாவது கற்கும் இடமாக அன்பளிப்பாகக் கொடுக்கப்பட்டதாகவும் குறிப்புகள். அதன் பிறகு வந்த ஹொய்சாள மன்னரால் விரிவுபடுத்தப்பட்டதாகவும், பின்னர் விஜயநகர அரசர்கள் கோபுரம் எழுப்பி விரிவுபடுத்தியதாகவும் வரலாற்றுக் குறிப்புகள்.

கோபுரத்தைப் பார்த்தால் நம் பகுதி கோபுரம் என்று.

மேலே சொன்ன இம்மாதிரியான விஷயங்களை ஆர்வத்தில் தெரிந்து கொள்வேனே தவிர விவாதங்களுக்குள் நுழைவதை விரும்புவதில்லை. கோவிலுக்குப் போனமா, தியானித்தோமா, ரசித்தோமா, படங்கள் பிடிச்சமா, வந்தமா…

வரைபடத்தில் தெரிகிறதா? காவிரி பிரிந்து சுத்தி ஓடுவது

கோவில் கோபுரம் அருகில் ஆட்டோக்காரர் நிறுத்தியதும் செருப்புகளை ஆட்டோவிலேயே விட்டுவிட்டு எங்கள் முதுகுப் பையுடன் மட்டும் கோவிலுக்குள் சென்றோம். 

உள்ளே சென்றதும் கோபுரத்தை உட்பகுதியிலிருந்து... ஹப்பா வெயில்! கேமரா ஸ்க்ரீனில் ஒன்றுமே தெரியலையே! ம்... இருக்கட்டும்...குத்து மதிப்பா ஒன்னு எடுத்துக்குவோம்!

என்ன அழகான மண்டபம் இல்லையா? பின்னாடி இதுக்கு வருவோம். அந்த ஆரஞ்சு கலர் போர்ட் இருக்கு பாருங்க கொடிமரம் மேல சாஞ்சுக்கிட்டு. கொடிமரம் தெரிகிறதா? இது வெளியே. உள்ளே நேரே ஒரு கொடிமரம் தெரிகிறதா? உள்ளார ஃபோட்டோ எடுக்க அனுமதி இல்லை. இடப்புறம் கம்பித் தடுப்புகள் தெரியுதா அதுக்குள்ளார போய்தான் உள்ள போணும்...டிக்கட் counter உம் இருக்கு பாருங்க

பெரிய திறந்தவெளி. கோவிலுக்குள் நுழையும் முன் பெரிய மண்டபம், முகப்பு. மண்டபத்தினுள் பல தூண்கள். உள்ளே தரிசனம் முடித்த பிறகு இவற்றிற்கு வருவோம். இந்த முகப்பின் மேல் தசாவதார வடிவங்கள். 

மண்டபத்தில் நுழைந்ததும் நான் புகைப்படம் எடுக்க முயற்சி

மண்டபத்தில் நுழைந்ததும் நான் புகைப்படம் எடுக்க முயற்சி செய்து க்ளிக்கியதும் திரும்பிப் பார்த்தால் வீட்டவரைக் காணவில்லை. நான் சுற்றிலும் பார்க்க, கம்பிகள் தடுப்பாக உள்ள வரிசையில் போனவர் அங்கிருந்து அழைக்க, நான் ஓடினேன். நாங்கள் தர்மதரிசன வரிசையில்தான் சென்றோம். பொதுவாக கோவில்களில் நாங்கள் டிக்கெட் வரிசையில் செல்வதில்லை. தவிர்க்க முடியாத தருணங்களைத் தவிர. தர்ம தரிசனத்தில் செல்வதில் ஒரு நன்மை. சில சுவாரசியங்களைக் காணும் வாய்ப்பு கிடைக்கும்.

அழகான உள் முற்றம். சுற்றிலும் உருளைகள் போன்ற தூண்கள். லேத்தில் செதுக்கப்பட்டவையாம்...ஹொய்சாளர் கலை. படம் விக்கியிலிருந்து. விக்கியோ சொக்கியோ எடுத்துப் போட்டா தப்பில்லைங்க....நாம எடுத்துப் போட்டாதான் தப்புங்க!

வரிசையில் சென்று முகப்பு மண்டபத்திலிருந்து சில படிகள் கடந்தால் உட்பக்கம் பெரிய அழகான முற்றம் போன்ற அமைப்பு. முற்றத்தைச் சுற்றி்த்தான் பிராகாரம், சன்னதிகள், நடுவில் ஸ்ரீரங்கநாதர் சன்னதியும், கர்ப்பகிரஹமும். முற்றமும் முற்றத்தைச் சுற்றிலும் உருளைகள் போன்று நின்ற தூண்களைக் கண்டதும் அதன் அழகில் வியந்து நின்றேன். வாவ்! ஹொய்சாளர் கலை.

முற்றம் இருக்கும் மண்டபத்தில் நுழைந்ததும் இடப்பக்கம் பெரியதிருவடி - கருடன், வலப்பக்கம் சின்ன திருவடி - ஆஞ்சு. வரிசை இடப்பக்கம் திரும்பும் இடத்தில் கருடனைப் பார்த்துவிட்டு நகர்ந்திட, என் பின்னால் வந்த பெண் கருடனைக் கிளிக்க முயற்சிக்க, அர்ச்சகர் கூடாது என்றார். சற்று நகர்ந்ததும் ஒரு கோணத்தில் கருடர் தெரிவார் அப்போது அவள் எடுக்க எத்தனித்த போது, அர்ச்சகர் அவளை அழைத்து, சிசிடிவியை காட்டினார். நானும் என் மொபைலை பதுக்கினேன்.

என் முன்னில், வழிகாட்டியுடன் வந்திருந்த உயரமான வெளிநாட்டவர் என்னைப் பார்த்ததும், அவர் உயரத்திற்கு இடுப்பளவு இருக்கும் என்னை, புருவம் உயர்த்தி 'ஹை' என்று புன்சிரிப்பொன்றை உதிர்த்ததும் நானும் அண்ணாந்து பார்த்து பதில் மரியாதை செய்தேன்!  அர்ச்சகர் 'ஃபோட்டோஸ் பேடா' (இது என்ன ஸ்வீட்டு!!!) என்று சொல்லிக் கொண்டே இருந்தார். வெளிநாட்டவர் மொபைலை தூக்கிப் பிடித்து, ஒரு கோணத்தில் டக்கென்று பிடித்தார் கருடனை! Multi Clicks! இடப்புறம் சற்று உயரத்தில் இருந்த மண்டபத்தையும், தூண்களையும் க்ளிக்கினார்.

இவருக்கு மட்டும் அனுமதி உண்டா என்று அவரையே பார்த்துக் கொண்டிருந்த நான் அவர் என்னைப் பார்த்ததும் "மறைச்சு வைச்சு நீங்க எடுத்ததை நாங்களும் பார்த்துட்டம்ல" என்ற தொனியில் என் சிரிப்பு புரிந்திருக்குமோ?! டக்கென்று தன் வழிகாட்டியிடம், தூண்களை எல்லாம் காட்டி ஏதோ பேசினார்.

நாங்கள் நகர்ந்திருந்த பகுதியில் எங்கள் அருகில் ஒரு தூண் வித்தியாசமாக இருந்தது கொஞ்சம் தோல் உரிந்தது போன்று!! அதைத் தொட்டு தட்டிக் காட்டி அந்த வழிகாட்டி சொன்னது எனக்கு மக்களின் சத்தத்தில் காதில் விழவில்லை. அந்தத் தூணில் இரும்பு வளையம் ஒன்றும் பொருத்தப்பட்டு அருகில் கம்பியுடன் இணைக்கப்பட்டு ஒரு வேளை விழுந்துவிடாமல் இருக்க அப்படிச் செய்திருப்பாங்களோ? நல்லகாலம் உறுதியாகத்தான் இருந்தது!

நானும் விடுவனா? திருட்டுத்தனமாக உட்பகுதிகளில் தூண்கள், சன்னதிகள் மற்றும் சிற்பங்களை எடுத்தேன். ஆனால், ஸ்ரீநிவாசர் சன்னதி அர்ச்சகர், ஒருவரைப் பார்த்து பெரிதாகச் சத்தம் போட்டு மொபைலைக் காட்டச் சொல்லி படங்களை அழிக்கச் சொன்னார், நான் மொபைலைப் பைக்குள் போட்டுக் கொண்டுவிட்டேன். நம்ம வீட்டவரின் பெரிய மண்டகப்படியை வாங்கிக்கிட்டேனா!!!! பயமா போச்சு! அதனால உட்பகுதியில் திருட்டுத்தனமா நான் எடுத்த 24 படங்களை இங்க தரலைங்க. நரசிம்மர்/சக்கரத்தாழ்வார், கிருஷ்ணர், ராமர், இராமானுஜர், மணவாளமாமுனிகள், தேசிகர் சன்னதிகள் இருக்கின்றன. அழகு சிற்பங்கள் உடைய தூண்கள்!

வரிசையில் வந்து உட்பக்கம் மெயினான ஸ்ரீரங்கநாதரை ரொம்ப பெரிய விரட்டல் இல்லாமல் நின்று தரிசிக்க முடிந்தது. வெளியில் வரும் போது இடப்பக்கம் படங்கள் எல்லாம் விற்கும் கடை இருக்கிறது. நான் எதுவும் வாங்கவில்லை. நோ சென்டிமென்ட்ஸ். உள்ளதைக் காப்பாற்றவே முடியலை.

இப்ப வெளியில் வந்த பிறகான நுழையும் போது, இந்த மண்டபத்துக்குப் பின்னாடி வருவோம்னு சொன்னேனே  அந்த மண்டபத்தில் உள்ள தூண்களில் உள்ள சிற்பங்கள் சில (இது வெளியிடலாமாம்!!)....

மேலே தாமரைப்பூ போன்று செதுக்கப்பட்ட வடிவம் அழகாக இருக்கிறது இல்லையா? ஒவ்வொரு சின்ன சின்ன தூணாகச் செதுக்கிச் செய்து அப்புறம் எல்லாவற்றையும் இடைவெளியில் பொருத்தி வைச்சிருப்பாங்களோ?

இது கருடர்?

பின்னால் கம்பித் தடுப்புகள் இருக்கு இல்லையா அந்த வரிசையில்தான் உள்ளே நாம் போய்ட்டு வந்தோம்ங்க...

கஜேந்திர மோக்ஷம். அழகான தூணில். பின் பக்கம் படிகள் தெரிகின்றன இல்லையா? ஏறி உள்ளே சென்றால் அழகிய முற்றம். வலப்பக்கம் ஒரே ஒரு உருளை வடிவத் தூண் தெரிகிறது...வெளியில்தான் 

இது என்னவென்று உங்களுக்குப் புரிந்திருக்கும்

சரஸ்வதி

சின்ன திருவடி

இந்தத் தூண்களின் மேலே அந்தத் தாமரை போன்ற வடிவம் ரொம்ப ஈர்க்கிறது. வரிசையாகப் பெண்கள் (பார்பி டால் போன்று) நிற்பது போன்றும் தெரிகிறது. பின்னாடி மக்கள் உள்ளே ஏறிப் போவது தெரிகிறதா?

மீதி படங்களை அடுத்த பதிவில்  பார்க்கலாமா? இருக்கும் எல்லாப் படங்களும் போட்டு முடித்துவிடலாம் என்றும் தோன்றுகிறது பார்ப்போம்.

----கீதா