பெங்களூர் – நாகர்கோவில் (கடம்போடுவாழ்வு, திருவனந்தபுரம் வழி திருவண்பரிசாரம்) – 5

சாது பொங்கினால்……காடும் ஊரும் கொள்ளாது - 5

பகுதி 4 

பகுதி 3

பகுதி 2

பகுதி 1

கடைசிப் பகுதி - வயல்கள், தோப்புகள் கொஞ்சம் கொஞ்சமாக அழிந்துவரும் நிலை

கிராமத்தை நெடுஞ்சாலையோடு இணைக்கும் திருப்பதிசாரம் முக்கியச் சாலை - முன்பு நாங்கள் முக்கால் மைல் என்று சொல்வோம். இச்சாலை நெடுஞ்சாலையோடு இணையும் பகுதியும் இதே ரோடு எங்கள் ஊர் தாண்டியதும் வீரநாராயணமங்கலம், தாழக்குடி செல்லும் ரோடாக.... பகுதியும் கீழே வருகிறது. ஒரு புறம் தேரேகால் ஓட, மறுபுறம் வயல்களும் தோப்புகளுமாக இருந்த அந்த மறுபுறம் தற்போது வீடுகளாகவும் கட்டிடங்களாகவும் மாறிவரும் நிலை. கிராமத்திலிருந்து முக்கால் மைல் ரோடு கொஞ்சமாக, சும்மா ஒரு சிறிய காணொளி கீழே

இந்தக் காணொளியில் காணொளி முடியும் பகுதியின் அடுத்து உள்ளதுதான் கீழே சொல்லியிருக்கும் காணாமல் போயிருக்கும் வாய்க்கால்.

காணாமல் போயிருக்கும் வாய்க்கால் அதன் தற்போதைய நிலை

இங்கு பார்க்க முடியவில்லை என்றால் இந்தச் சுட்டியிலும் பார்க்கலாம்

சிறிய காணொளிதான் முடிந்தால் பாருங்கள். https://youtu.be/4XEUw6LJrlM

(வண்ணாகுடி வாய்க்கால் என்று சொல்லப்பட்ட - தற்போது அப்படிச் சொல்லக் கூடாது என்பதால் அடையாளத்திற்காக இங்கு அடைப்புக் குறிக்குள்) மகன் ரசித்து விளையாடிய இந்த வாய்க்காலின் தற்போதைய நிலையை இந்தக் காணொளியில் காணலாம். நான் விக்கித்து நின்றது சத்தியம். காணொளியை எடுத்த போது, என்னை அறியாமல் கண்ணில் நீர் வந்தது. நானும் மகனும் ரசித்து விளையாடிய வாய்க்கால் என்பதற்காக அல்ல.

வயல்களும் தோப்புகளும் வீடுகளாகவும், கட்டிடங்களாகவும் ஆகி வருவதால். சில வருடங்களுக்கு முன்னால் வரையிலும் தேரேகால் வாய்க்காலிலிருந்து சாலையின் அடி வழியாகப் பசுமையான வயல்களுக்கு நீர்ப்பாசன வசதிக்காகச் சென்று கொண்டிருந்தது.

மட்டுமல்ல, ஒவ்வொரு கனமழையின் போதும் தேரேகால் வாய்க்காலில் அதிகப்படியான தண்ணீர் வரத்து சமயத்திலும் இந்த வாய்க்கால், வடிகால் வாய்க்காலாகவும் இருந்தது எனலாம்.

இந்த வாய்க்கால் தற்போது காணாமல் போயிருப்பது வருத்தமான விஷயம். (இதைப் பார்த்ததும் எதிர்கால வரைபடத்தில் இத்தேரேகால், வாய்க்கால், பழையாறு எதுவுமே இல்லாமல் ஆகிவிடுமோ? என்ற எண்ணத்தைத் தவிர்க்க முடியவில்லை.)

தற்போதைய அதன் நிலையினால் வடிகாலாகச் செயல்படமுடியாமல் போனதால், சமீபத்து கன மழையின் போது வீடுகளில் தண்ணீர் புகுந்ததற்கு அதுவும் ஒரு காரணமாகச் சொல்லலாம் என்றும் தோன்றுகிறது. அப்படியான வாய்க்காலின் நிலையையும் ஏன் என்பதற்கான காரணமும் மேலே காணொளியில் காணலாம். அதற்கு அடுத்த பகுதி கீழே

தண்ணீர் வரத்து அதிகமான  போது மேலே சொல்லியிருக்கும் அந்த வாய்க்கால் பகுதி தாண்டியதும் உடைப்பு வெட்டலாம் என்று முயற்சி செய்துபார்த்து - படத்தில் தடம் தெரிகிறது - அங்கு புதிதாக வந்து கொண்டிருக்கும் பூங்காநகர் இருக்கிறது என்பதால் (கொலாஜ் படம். குப்பையையும் பாருங்கள்.) அடுத்து நாலுவழிச்சாலை குறுக்கிடுவதால் அங்கும் தண்ணணீர் குறுக்கே பாயமுடியாமல்...அதனால் நாலுவழிச் சாலையைத் தாண்டி திருப்பதிசாரம் சாலையில் கரை உடைக்கப்பட்டது. மறுபுறம் தண்ணீர் செல்லும் இடம் இருக்கிறது. வயல்கள்தான். ஆனால் எதிர்காலத்தில் இதுவும் மாறிப் போகும் காலம் வெகு அருகில் (வயல்கள் எல்லாம் வீடுகளாக). அதுவும் நாலுவழிச் சாலை வந்துவிட்டதால் நிலங்கள் பெரிய ரேட் என்று ஊரில் சொல்லிக் கொண்டார்கள். நாலுவழிச் சாலையில் உடைப்பு சரி செய்ய ஆட்கள், அதிகாரிகள், காவலர்கள் கூடியிருக்க ஊர்மக்களும். உடைப்பு பகுதியும் காணொளியும் அடுத்து கீழே

வாய்க்காலின் மேலே நாலுவழிச்சாலை, உடைப்பு

உடைப்புப் பகுதி. காணொளிச் சுட்டி கீழே

https://youtu.be/eqSy8jGwJJc

வலப்புறம் உள்ள படத்தில் நாலுவழிச்சாலையை ஒட்டி உடைப்புத் தண்ணீர் போவது கொஞ்சமாகத் தெரிகிறதா? இப்பகுதி எல்லாம் வயல்களாக இருந்தவை. இடையில் தோப்புகள். கீழுள்ள படம் இதன் தொடர்ச்சி

இடப்புறம் உள்ள படம். நாலுவழிச் சாலையை ஒட்டிப் போகும் (இப்படத்தில் நன்றாகத் தெரியும்) தண்ணீர் சென்று முட்டுவது எங்கு என்று பார்த்தால் தெரியும். வீடுகள். நெடுஞ்சாலையுடன் இணையும் பகுதியில் புதிதாக வருகின்றன.  

நாலுவழிச் சாலை, நாகர்கோவில் திருநெல்வேலி நெடுஞ்சாலையுடன் இணையும் பகுதி வலப்புறம் உள்ள படம். நெடுஞ்சாலை விரிவாக்கம் செய்யப்படுகிறது. சாலையின் இடப்புறம் கட்டிடங்கள். நெடுஞ்சாலையில் ஒரு பேருந்து தெரிகிறது இல்லையா. அப்பேருந்து வழியிலேயே சிறிது தூரம் சென்றால் இதோ கீழே .....எங்கள் ஊருக்குத் திரும்பும் பகுதி... ஒட்டிய பகுதியில் கடைகள் இப்போது

எங்கள் ஊருக்குத் திரும்பும் இடத்தில் முக்கால் மைல்/திருப்பதிசாரம் ரோடு தொடங்கும் இடம்,-பேருந்து நிறுத்தம் 'ஓட்டாபீஸ்' - முனையில் செங்கற்சூளை ஓடுகள் செய்யப்படும் 'பயோனிர் தொழிற்சாலை'  இப்போதும் இருக்கிறது.  ஆனால் மூடப்பட்டு இருப்பதாலும் அதை அடுத்து  கடைகள் நிறைய வந்துவிட்டதால் வெளியில் அடையாளம் இழந்து..

 

கொலாஜில் இடப்புறம் உள்ள படம்: மேலே முதலில் பார்த்த முக்கால்மைல் ரோடு நெடுஞ்சாலையுடன் இணையும் இடம். இங்குதான் நெடுஞ்சாலையிலிருந்து ஊருக்குச் செல்ல முக்கால்மைல் ரோடில் திரும்பவேண்டும், திரும்பும் இடத்தில் வீடுகள் தெரிகிறதா? அதற்கடுத்தும் வீடுகள் காலனிகள் என்று. முன்பு இடப்புறம் வயல்கள்....வலப்புறம் வாய்க்கால் இவை மட்டுமே இப்போது பெரும்பாலும் வீடுகள். .  

கொலாஜில் வலப்புறம் உள்ள படம்: தேரேகால்புதூரில் உள்ள பகுதிதான் நாஞ்சில் நகர். உங்களில் பலரும், தண்ணீர் புகுந்த போது இந்த நகரில் பிள்ளைகள் நீரில் நீந்திக் களித்த காணொளியைக் கண்டிருக்கலாம். திருப்பதிசாரம் ரோடிற்கும் தேரேகால் பகுதிக்கும் இடையில்தான் தேரேகால் வாய்க்கால். தற்போது நாலுவழிச்சாலை வழியாகவும் எங்கள் ஊருக்குச் செல்லலாம். 

கொலாஜின் கீழே உள்ள படத்தில் தெரியும், ஊருக்குத் திரும்பும் பகுதி (ஆட்டோ) தேரேகாலின் குறுக்கே போகும் நெடுஞ்சாலை. நான் எதிர்ப்புறம் வந்து ஃபோட்டோ எடுத்தேன். இப்பகுதியில்தான் தேரேகால் வாய்க்கால் பெரிய குளத்தில் சேர்கின்றது. படங்கள் கீழே

நெடுஞ்சாலையின் குறுக்கே பாலம் தெரியும் படம் மேலே இருக்கிறதல்லவா படத்தில் திருப்பதிசாரத்தின் ரோட்டின் எதிர்ப்புறம் தான் இதோ தேரேகால் கலக்கும் பெரிய குளம். இதற்கான காணொளிச் சுட்டி 

https://youtu.be/hG1c-fXyAJw

https://youtu.be/X2-JOvEJmMQ

திருப்பதிசாரம் ரோடு எங்கள் ஊரைக் கடந்து செல்லும் போது அங்கிருந்து அது தாழக்குடி ரோடு. தாழக்குடி ரோட்டில் உடைப்பு. வலப்புறம் பீமநகரி கிருஷிப்பாலம் கடந்ததும் வீரநாராயணமங்கலம் செல்லும் வழியில் ரோட்டில் கரை உடைத்துவிடப்பட்டது. தோப்பு வழி தண்ணீர் சென்றது. (தோப்பு எம் சி பாலன் அவர்களின் தோப்பு என்று சொல்லப்பட்டது.) நல்லகாலம் இங்கு வீடுகள் வரவில்லை.

இங்கும், நாலுவழிச் சாலையிலும், (ஆங்காங்கேயும், இறைச்சகுளம் பகுதியிலும் உடைக்கப்பட்டது என்று மக்கள் சொன்னார்கள்.)  புதிதாக வாய்க்காலின் ஓரங்களில், தண்ணீர் பாயும் வயல்களில் கட்டப்பட்ட வீடுகளில் தண்ணீர் மேலும் புகாமல் வடிந்துவிட்டதன் காரணம், கிராமங்களின் வயல்களும், தோப்புகளும் வடிகாலாகின என்றால் மிகையல்ல. வரும் காலங்களில் வயல்களும் தோப்புகளும் கட்டிடங்களாக மாறினால்....? சொல்லத் தேவையில்லை என்று நினைக்கிறேன். 

நான் சுகமா வெயில்ல குளிக்கிறேன். ஹப்பா இனி தண்ணி வராது. அதனால தண்ணிய பத்தின கதைய புலம்பித் தள்ளிட்டாங்களா?! இனி புலம்பல் இருக்காது. ஒரே ஒரு கவலை....இந்த 15 நாளும் அம்மா சாப்பாடு போட்டதுனால டிபன் கடைப்பக்கமே போகாம, சண்டை கடிலருந்து தப்பிச்சிருந்தேன். ஆனா இனி அங்கதான் போய் யாராச்சும் ஏதாச்சும் கொடுப்பாங்களான்னு நாக்கைத் தொங்கப் போட்டுக்கொண்டு மத்ததுங்களோட மல்லுக்கு நின்னு கடி வாங்கணும் போல! ஹூம்.

பொறுமையுடன் வாசித்துக் கருத்திட்ட, கருத்திடும் அனைவருக்கும் என் மனமார்ந்த நன்றி. மன்னிப்பு சொல்லிக் கொள்கிறேன். முடித்துவிட வேண்டும் என்பதால் இப்பதிவும் படங்களுடன் பெரிதாகிவிட்டது. இனி வரும் பதிவுகளைச் சிறிதாகத் தர முயற்சி செய்கிறேன். மீண்டும் ஸாரி, நன்றி!

----கீதா