நீரிழிவு நோய்க்கு இன்சுலின் செடி சிறந்ததா?!!

இன்சுலின் செடியைப் பற்றி முன்பே நான் எழுத நினைத்து வழக்கம் போல் முடிக்காமல், முடித்து வெளியிடலாமா வேண்டாமா என்ற தயக்கத்தில் பரணில் போட்டு வைத்துவிட்டேன். அதாங்க ட்ராஃப்ட். காரணம் மருத்துவர் நம்பள்கி அவர்களின் பின்னூட்டம் ஒன்று சிந்திக்க வைத்ததால், ஆதாரம் இல்லாத மருத்துவக் கட்டுரைகளை மருத்துவர் அல்லாத நான் எழுதுவது சரியா என்ற  தயக்கத்தில் அப்படியே வைத்துவிட்டேன். பின்னர் நம் சகோ கூட்டாஞ்சோறு செந்தில் அவர்கள் தன் தளத்தில் http://senthilmsp.blogspot.com/2016/10/blog-post_3.html இச்செடியைப் பற்றி தேவேஷ் ஹார் என்ற மருத்துவரின் பரிந்துரையும் சொல்லி எழுதியிருக்க அப்போதும் நான் அங்கு கருத்துரை இட்டு, எழுதி முடித்து வெளியிடலாம் என்று நினைத்து…..னைத்து…..த்து…..

இதோ இப்போது சகோ இளங்கோ மற்றும் டிடி, தோழி நிஷா அவர்கள் கேட்டிட நான் எழுதிய கட்டுரைக்கு வருகிறேன். (நீங்கள் சகோ செந்திலின் கட்டுரையை வாசித்திருப்பீர்களே!)

இந்தியா நீரிழிவு நோயின் தலைநகரம் என்று சொல்லப்படுவது நாம் எல்லோரும் அறிந்ததே. முன்பைவிட நீரிழிவு நோய் தற்போது அதிகமாகப் பேசப்படுவதால் இதைப் பற்றி பெட்டிக் கடைகளிலும், தெருவோர டீக்கடைகளிலும் கூட நீரிழிவு நோயாளிகள் சர்க்கரை சேர்க்கப்பட்ட காப்பி, டீ அருந்திக் கொண்டே பேசுவதைப் பார்க்கும் போது விழிப்புணர்வு கொஞ்சம் அதிகமாகியிருப்பது போல் தெரிகிறது!!! விளம்பரங்களும் அதிகமாகிவிட்டன. நீரிழிவு நோய் நோயல்ல, குறைபாடே!

இது நாள்வரை அதிகம் பேசப்படாத ஆயுர்வேத, சித்த மருந்துகள் இப்போது ஆங்கில மருந்துகள் விற்கப்படும் கடைகளில் கூட விற்கப்படுகின்றன. அதுவும் விளம்பரப் பலகைகள் மற்றும் கண்ணாடிகளில் ஒட்டப்பட்ட விளம்பரங்களுடன், அம்மருந்தைப் பற்றிய குறிப்புகள் அடங்கிய துண்டுப் பிரசுரங்களும் வைக்கப்பட்டிருக்கின்றன. நகரத்து மக்கள் இதுவரை அறிந்திராத சிறு தானியங்கள், மூலிகைகள் குறித்து தற்போது பிரபல பத்திரிகைகளில் வரும் சித்த/ஆயுர்வேத மருத்துவ கட்டுரைகளின் விளைவினால் கடைகளில் தேடத் தொடங்கியிருப்பதால் ஆங்கில மருந்துக் கடைகளும் இதனைப் பயன்படுத்திக் கொள்ள இப்போது இப்படி விற்கத் தொடங்கிவிட்டார்கள் போலும். சித்தா/இயற்கை மருந்துகளுக்கு இப்போது விளம்பரம் தேவைப்படும் காலமாகிவிட்டதை நினைக்கும் போது கிராமங்கள் குறுகி நம் வாழ்வியல் மாறி வருவதைத் தெளிவாகக் காட்டுகிறது.

அது ஒருபுறம் இருக்க, எனது 32 வது வயதில் குளுக்கோஸ் டாலரன்ஸ் டெஸ்ட் செய்த போது, 400+. நீ ஏற்கனவே இனியவள் ஹிஹி, எனவே உனக்கு மேலும் இனியவளாக இருப்பது நல்லதல்ல என்று சொல்லிவிட அன்றிலிருந்து இதோ இன்றுவரை ஊசிக்குச் செல்லாமல், ஒரே ஒரு மாத்திரையுடன், கட்டுப்பாடுகளுடன், இனிமையாக இருந்துவருகிறேன்.

இரண்டு வருடத்திற்கு முன் எனது  உறவினர் ஒருவர், நீ என்னதான் கட்டுப்பாட்டுடன் இருந்தாலும் 20 வருடங்களுக்கு மேல் கண்டிப்பாக நீ இன்சுலின் சார்ந்து, ஊசிக்குச் செல்ல வேண்டியிருக்கும் ஏனென்றால் வயதாகும் போது உன் உடல் உழைப்பு குறைந்துவிடும் என்பது பற்றி ஏற்கனவே சிந்தித்து வைத்திருந்தாலும், அச்சமயம் இந்த இன்சுலின் செடியைப் பற்றிக் கேள்விப்பட்டதும் உடன் ஆராயத் தொடங்கினேன். 

Costus igneus காக்டஸ் இக்னியஸ் படம் இணையத்திலிருந்து

Costus Pictus - காஸ்டஸ் பிக்டஸ் இந்த வகைதான் எங்கள் வீட்டில் உள்ளது. பூ தான் வித்தியாசப்படுத்துவதால்  படம் இணையத்திலிருந்து

ஆராயும் போது சிறு குழப்பம் ஏற்பட்டது. கூகுள் தேவன், காஸ்டஸ் பிக்டஸ், காஸ்டஸ் இக்னியஸ் என்று இரண்டையுமே இன்சுலின் செடி என்று காட்டினார். இரண்டுமே ஒன்றுதான் என்று சொல்லப்பட்டாலும் இரு செடிகளின் படங்களும் சற்று வித்தியாசமாக இருந்தது, இரண்டுமே காஸ்டேசியெ (Costaceae) எனும் குடும்பத்தைச் சேர்ந்தது. காஸ்டஸ் எனும் ஜீனஸ் மற்றும் வேறு வேறு ஸ்பீசிஸைச் - Specific epithet சேர்ந்தவையாக இருக்கலாம் என்று தோன்றுகிறது. அந்தந்தப் பகுதிக்கு ஏற்றவாறு இந்த ஸ்பீசிஸ் பெயரில் மாற்றம் வரும் போலும். 

இரண்டுமே வெளிநாட்டிலிருந்து வந்து இப்போது இந்தியாவில் இன்சுலின் செடி என்று வழங்கப்படுகிறது. இச்செடியைக் (காஸ்டஸ் இக்னியஸ்) குறித்து ஆராய்ச்சிகள் கர்நாடக மாநிலத்திலுள்ள மங்களூரிலுள்ள கஸ்தூரிபாய் மருத்துவக் கல்லூரியில் உள்ள மருந்தியல் துறை மேற்கொண்டது. இலைகள் அக்டோபர், நவம்பர் மாதத்தில் சேகரிக்கப்பட்டு, நிழலில் காயவைக்கப்பட்டுப் பொடிக்கப்பட்டு, தண்ணீரில் கலந்து அரைக்கப்பட்டு, முறையான அனுமதி பெற்றபின், பந்தர்கர் எனும் ஆயுர்வேத மருத்துவர் இவ்விலைகள் இன்சுலின் செடி இலைகள் தான் என்று வழங்கிய ஆதாரத்துடன், சோதனை எலிகளுக்குக் கொடுக்கப்பட்டு மேற்கொள்ளப்பட்ட சோதனையில், ஆங்கில மருந்தான Glibenclamide மாத்திரைகளும் கொடுக்கப்பட்டுச் சோதிக்கப்பட்டதில் அதற்கு நிகரான அளவில் இன்சுலின் இலைகள் ரத்தத்திலுள்ள குளூக்கோஸ் அளவினை, சாப்பாட்டிற்கு முன், சாப்பாட்டிற்குப் பின் குறைத்திருப்பதாக ஆய்வின் முடிவுகள் சொல்லியிருப்பதாகப் பதிந்திருக்கின்றனர். இதனை இந்திய மருத்துவக் கழகமும் ஆதரித்துள்ளது. இதோ அதன் முழு விவரங்கள் அடங்கிய சுட்டி. https://www.ncbi.nlm.nih.gov/pmc/articles/PMC2924971

இந்தச் செடி ஈரப்பதம் இருக்கும் இடங்களில் நன்றாக வளருமாம். தொடக்கத்தில் அதிகம் தண்ணீர் வேண்டியிருக்கும் என்றும் வளர்ந்ததும் ஈரப்பதம் மட்டும் இருந்தால் போதும் என்றும் சொல்லப்பட்டது. நன்றாக உயரமாக வளரும் என்றும் சொல்லப்பட்டது. என் உறவினர் ஒருவர் எங்கள் குடும்ப வீட்டில், சென்னையில் உள்ள மாமியார் வீட்டில் நட்டிட இப்போது நன்றாக நிறைய வளர்ந்துள்ளது. நான் அதன் இலையின் நுனியைக் கிள்ளி, காலையில் வெறும் வயிற்றில் சாப்பிட்டு வருகிறேன். புளிப்புச் சுவையுடன் இருக்கிறது. இது இனிப்பு சாப்பிடும் ஆவலைக் கூடத் தணித்துவிடும் என்றும் சொல்லப்படுகிறது. நீரிழிவு நோயின் தொடக்க நிலையில் உள்ளவர்கள் தவிர அடுத்த நிலையில் இருப்பவர்கள் இதை எடுத்துக் கொண்டால் நன்றாகக் கட்டுப்பட்டு ஊசி போடும் நிலைக்கு வராமல் தடுக்கலாம் என்றும் சொல்லப்படுகிறது. நான் இன்னும் மாத்திரை எடுத்துக் கொள்ளாமல் இதை மட்டும் சாப்பிட்டுச் சோதித்துப் பார்க்கவில்லை. செய்ய வேண்டும்.

இந்த இன்சுலின் செடியைக் குறித்து சர்க்கரை நோயுள்ளவர்கள் தங்கள் மருத்துவர்களின் பரிந்துரையின் படி எடுத்துக் கொள்ளலாம். இப்போது வரும் இன்சுலின்/மாத்திரைகள் விலங்கு சார்ந்து சிவப்புப் புள்ளி தாங்கியே வருகின்றன என்பதை நீங்கள் கவனித்திருப்பீர்கள். 2014 ஆம் வருடம், WHO, இனி வரும் மருந்துகள் விலங்குகள் சார்ந்தில்லாமல் தாவரங்கள் சார்ந்தவையாகவே வருவதற்கான முயற்சிகள் மேற்கொள்ளப்படுவதாகத் தெரிவித்தது. எனவே இந்த இன்சுலின் செடியும் அப்படி உருமாறி வரலாம். கொச்சியிலும், கன்னியாகுமரியிலும்ம் மங்களூரிலும் மட்டுமின்றி பல இடங்களிலும் வியாபார ரீதியாக நர்சரிகள் வரத் தொடங்கியுள்ளன. இதன் அடிப்படையில் மருந்துகளும் வருவதாகச் சொல்லபடுகிறது.

என்ன மருந்து உட்கொண்டாலும், இன்சுலின் செடி மருந்தாகவே இருந்தாலும், உணவுக் கட்டுப்படு, உடற்பயிற்தி, மனதை மகிழ்வாக வைத்திருத்தல் மிக மிக இன்றியமையாதது.

இதனைக் குறித்து எழுதிய தகவல்களை சகோ செந்தில் அவர்கள் மேலும் விவரங்களுடன் தனது தளத்தில் கொடுத்திருப்பதால் அப்பகுதியை இங்கு எடுத்துவிட்டேன்.

இதைப் போன்ற ஆனால் நம்மூர் செடிகளான சிறியா நங்கை, பெரியா நங்கை பற்றி அடுத்து ஒரு பதிவில் சொல்லுகிறேன்.

---கீதா

பொங்கலும் மாடுகளின் திருநாளும்

என்ன நண்பர்களே, சகோதர, சகோதரிகளே எல்லோர் வீட்டிலும் பால் பொங்கியதா! (தினமும் பொங்கத்தானே செய்கிறது என்ற குரலும் கேட்கிறது!) இன்று பொங்கலோ பொங்கல் ஆயிற்றே! இனிய பொங்கல் தினமாயிற்றே! இந்த இனிமை எல்லோருக்கும் என்றும் நிறைந்திருக்க எங்கள் மனமார்ந்த வாழ்த்துக்கள்! நான் வாட்சப்பில், கோலம் போட்டு, பானை வைத்து, பொங்கல் பொங்கிக் கொண்டாடியாயிற்று!!

கிராமத்தில் இருந்தவரை எங்கள் வீட்டில் பொங்கலன்று புதியதாய் விளைந்து வந்த நெல்லை  நடுக் கூடத்தில்  குவித்து வைத்திருப்பார்கள். நெற்கதிரை உத்திரத்தில் தொங்க விடுவார்கள். புது அரிசியில்தான் பொங்கல் செய்வார்கள். நாங்களும் வயலில் வேலை செய்ததுண்டு.  வயல்கள் எல்லாம் வீட்டின் ஒவ்வொரு நிகழ்விற்காக விற்ற பிறகு பொங்கல் நகரத்துப் பொங்கலாகிப் போனது.

இனிமையானவர்களுக்கு, இனிய பொங்கல் என்பதால் அவர்களுக்கான இனிய இயற்கை இன்சுலின் ..

எங்கள் வீட்டில் இனியவள் நான் இருப்பதால் இந்த இனிய இயற்கை இன்சுலின்

பொங்கலுக்கு என் தோழியின் கைவண்ணம்…

இன்று வயல்களில் உழைக்கும் நாலுகால் செல்லங்களின் திருநாள்!

படம் இணையத்திலிருந்து

எங்களை எல்லோரும் வாழ்த்துங்கள்!!!

“எங்களை வைத்து நன்றாக காமெடி/அரசியல் செய்து சுய ஆதாயம் அடைகிறார்கள்! உங்கள் அரசியலுக்கு வேறு விசயம் இல்லாததால் நாங்கள் தான் கிடைத்தோமா”! என்று இந்தச் செல்லங்கள், அவர்களும் போராட்டம் நடத்துகிறார்களாம். அவர்களுக்கு ஆதரவாக எல்லா நாலுகால் செல்லங்களும் சேர்ந்து கொண்டனவாம்.

“எங்களுக்காக வருடம் ஒரு முறைதான் குரல் கொடுப்பீர்கள் போலும். நாங்கள் வருடம் முழுவதும் உங்களுக்காக வயலிலும், வண்டி இழுத்தும் உழைக்கிறோம். அதிகமாகப் பால் கறப்பதற்கு ஊசி, சினை அடைய ஊசி என்று எங்களுக்கும் எவ்வளவோ துன்பங்கள் இழைக்கப்படுகின்றன. அதற்காக யாரும் குரல் கொடுப்பதில்லை. உங்களைப் போல் எங்களால் குரல் கொடுக்க முடியாதே? வாயிருந்தும் பேச முடியாத அப்பாவிகளாயிற்றே நாங்கள்.

எங்கள் எசமானர்கள் எங்களுக்கு வேண்டிய அளவு தீனி தராமல் எங்களை சாலையில், வெயிலில் மேய விட்டு விடுகிறார்கள். மேய விடுவதில் தவறில்லை. ஆனால், சாலையில் நாங்கள் உங்கள் வாகனங்களில் அடிபட்டு உயிர் விடுபவர்கள் எத்தனை பேர் தெரியுமா? உயிர்விடுவது ஒரு புறம் என்றால் அடிபட்டுத் துன்பப்படுவது மறுபுறம். எங்களைக் கம்பால் அடித்து துரத்தியும் விடுவார்கள். இதற்காக யாரேனும் போராடியிருக்கிறீர்களா?

நீங்கள் எல்லோரும் உங்கள் சுயநலத்திற்காக நாங்கள் திரிந்த நிலங்களை எல்லாம் கட்டிடங்களாக்கி விட்டதால் மேய்ச்சலுக்கான நிலங்களும் அருகி, நீங்கள் எறியும் குப்பைகளையும் கண்டதையும் தான் நாங்கள் உண்டு வாழ வேண்டிய நிலை. இப்படி வெயிலில் மேய்வதால் தாகம் எடுக்கும் போது அருந்துவதற்கு நீர் நிலைகள் இருக்கிறதா என்றால் அதுவும் இல்லை. எல்லாம் குப்பைக் கிடங்காக இருக்கின்றது. சாக்கடை நீர்தான் இருக்கிறது.

என் மொபைலில் எடுத்தது - என் வீட்டின் அடுத்துள்ள தொட்டியில் மாடு தண்ணீர் குடிக்கும் காணொளி

எனவே, நாங்கள் ஆங்காங்கே வைக்கப்பட்டிருக்கும் நீர்த்தொட்டிகளின் குழாயை உங்களைப் போல் திறக்கக் கற்றுக் கொண்டுவிட்டோம். ஏதோ ஒரு பொன்மொழி சொல்லுவீர்களே! தேவையே கண்டுபிடிப்புகளின் தாய் என்று! அப்படித்தான் நாங்களே குழாயைத் திறந்து நீர் அருந்துகிறோம் ஆனால் மூடத் தெரியவில்லை. எனவே தண்ணீர் வீணாகிப் போவதோடு, எங்களை நீங்கள் விரட்டவும் செய்கிறீர்கள். இது என்ன நீதி? இப்போது ஆள்பவர்கள் என்ன மனு நீதிச் சோழனைப் போன்றவர்களா என்ன?

எங்கள் வேண்டுகோள் இதுவே! உங்களுக்கு உணவளிக்கும் வயல்வெளிகளைக் கூறு போடாதீர்கள். வானம் பொய்த்த பூமியில் பாளங்கள் ஏற்பட்டு எங்களை மேய்க்கும் உழவர்களின் வாழ்விலும் பாளங்கள். நாங்கள் சார்ந்திருக்கும் உழவையும் உழவைச் சார்ந்திருக்கும் எங்களையும் போற்றிப் பாதுகாக்க வேண்டுகிறோம். எங்களை நம்பியிருக்கும் உழவர்களைக் காப்பாற்றி வாழ்வு கொடுங்கள்! உங்கள் சுயலாபத்திற்காகப் பசுமையான புல்வெளிகளையும், வயல்களையும், மேய்ச்சல் நிலங்களையும் கூறுபோடாமல், நீர்நிலைகளைப் பாழாக்காமல், எங்கள் பகுதிகளில் நஞ்சைக் கலக்காமல்  பாதுகாப்பீர்கள் என்றால் உங்களுக்கு வளம். இல்லையேல் அழிவுதான்! இயற்கையைக் கூர்ந்து நோக்கி இயற்கையுடன் ஒன்றி வாழக் கற்றுக் கொள்ளுங்கள். 

இயற்கை அன்னையைச் சார்ந்துதான் நாம் எல்லோருமே வாழ்கின்றோம் என்பதால் இயற்கையையும் மதித்துப் போற்றிக் காப்பாற்றுங்கள்! வருடத்தில் ஒரு தினம் மட்டும் எங்களை அலங்கரித்துப் பூசித்துவிட்டு பின்னர் எங்களைக் கண்டு கொள்ளாமல் இருக்காமல் எங்களையும் சற்றுக் கவனியுங்கள். எங்களை செயற்கை முறையில் கருத்தரிக்கச் செய்வது சிறந்தது என்று அதீதமாகச் செய்து துன்புறுத்தாதீர்கள் என்றும் கேட்டுக் கொள்கிறோம்.

எங்களுக்கு நோய் வந்தால் அதைத் தீர்க்க இறுதி வரை முயற்சி செய்யுங்கள். முயற்சி செய்யாமல், உடனே எங்களை வெட்டும் இடத்திற்கு அனுப்பிவிடாதீர்கள். இறுதிவரை முயன்றும் தீர்க்க முடியவில்லை என்றால் வெட்டும் இடத்திற்கு அனுப்புங்கள். எப்படி இருந்தாலும் எங்களை வளர்ப்பவர்களில் பலரும் எங்களை அங்கு தான் அனுப்புவீர்கள் என்று தெரியும். 

நாங்களும் உங்களுடன், உங்களில் ஒருவராக, உங்களுக்காகவே, உங்களைச் சார்ந்து வாழ்பவர்கள்தான்! எங்களுக்கும் மனம் உண்டு, உயிர் உண்டு. உங்களைப் போல் எங்களுக்குப் புலம்பவோ பகிரவோ முடியாது! தயவாய் இயற்கையையும், இயற்கை சார்ந்த எங்களையும் எங்கள் இயல்புகளுடன், எங்கள் இயல்புகளை மாற்றாமல் உங்கள் குழந்தைகளைப் போல் அன்பு செலுத்திப் பராமரியுங்கள். இதுவே இந்த வருடத்து எங்கள் நாளில் உங்களுக்கு வைக்கும் வேண்டுகோள்.”

கீழே இருப்பவை குழந்தைகளுக்காக. உழவுத் தொழில் பாடல்! உழவுத் தொழில் பற்றி அறிந்திராத குழந்தைகளுக்கு ஒரு காணொளி. மற்றொன்று ஒரு பசுவின் கதை மற்றும் தோட்டத்தில் வெள்ளைப் பசு பாடல் காணொளியாக. நானும் ரசித்தேன். ஏன் நீங்களும் ரசிப்பீர்கள். அமெரிக்காவில் இருக்கும் எனது தங்கை மகளுக்கு, அவள் குழந்தைக்காக இது போன்ற காணொளிகளை அனுப்புவதுண்டு. 

மூன்று காணொளிகளும் இணையத்திலிருந்து

எல்லோருக்கும் இனிய மாடுகளின் திருநாள் வாழ்த்துக்கள்!

------கீதா

நாலுகால் செல்லங்களுக்கும் சனி தசையா??!!!

"ஹேப்பி நியூ இயர் கீத்!!!"

"ஹேய் ஹேப்பி நியூ இயர் மாலு…"

"சனிப்பெயர்ச்சி புதுவருஷப் பலன் எல்லாம் பார்த்தியா நீ?"

இது என் மாமா + அத்தை மகள் (இருவழி உறவு), “சோசியப் பித்து”வின் அலைபேசி அழைப்பு. இதென்னடா இது?! புத்தாண்டு வாழ்த்துகள் சொல்லிவிட்டுக் கூடவே புத்தாண்டு இனாமாக ஒரு வெடிகுண்டாக இருக்குமோ?

நான் இந்த சோசியம் பக்கம் பொழுது போக்காகக் கூடப் போகும் பழக்கம் இல்லாதவள். ஆனால், என் தங்கையோ,

“இங்கப் பாரு உனக்கு நம்பிக்கை இல்லாம இருக்கலாம், ஆனா ப்ளீஸ் நான் சொல்லறத கொஞ்சம் கேக்கறியா. ஆதித்(என் மகன்) இப்போ ரெசிடென்சி ட்ரெயினிங்க் அப்ளை பண்ணறான் இல்லையா? அவனுக்கு ஏழரை சனி கடைசிக் கட்டத்துல இருக்கு. இப்போலருந்து 2017 முழுசும் ரொம்ம்ம்ம்ம்ம்ம்ம்ம்ம்ம்ம்ம்ப கெட்ட காலம் (ரொம்ப அவள் இழுத்த விதம்!)”

படம் இணையத்திலிருந்து

அட! இதென்ன பெரிய விசயமா? எப்போதும் இப்படித்தானே! என் பையன் ரெசிடண்ட்ஸி ட்ரெயினிங்க் அப்ளிக்கேஷன் போடுகிறான், சனி எங்கள் வீட்டில் பெர்மனென்ட் ரெசிடென்ட் ஆகப் போகிறார் என்று சொல்லுகிறாளோ!!!

இப்படித்தான் அவள் என்னை அடிக்கடிக் கூப்பிட்டு எங்கள் மூவருக்கும் அடுத்தடுத்துக் கெட்ட காலம் என்று பல வருடங்களாகச் சொல்லி வருகிறாள். இடையில் எப்போதேனும் நல்ல காலம் பிறக்கிறது என்பாள். இப்போது மீண்டும் கெட்ட காலம் என்கிறாள். இவ்வளவு வருஷம் வாடகை கொடுத்தும், கொடுக்காமலும் பேயிங்க் கெஸ்டாக எங்கள் வீட்டில் குடியிருந்த சனி, இப்போது நிரந்தரமாகக் குடியிருக்கப் போகிறார் போல! இருந்துவிட்டுப் போகட்டுமே!

“அதெல்லாம் ஒன்னும் அவரு பெர்மனெண்டா யார் வீட்டுலயும் இருக்க மாட்டார்…….கீதா ப்ளீஸ்டி சனிக்கிழமை எள்ளுக் கிழி விளக்கு ஏத்துடி…”

ஓ! அதுவும் சரிதான் எங்கள் வீட்டில் பொழுது போகாத போது, அவ்வப்போது சிறிது நாட்கள் வேறு வீட்டிற்குப் போய் வருவது வழக்கம்தான். அப்படியே வேறு வீட்டிற்குப் போனாலும் அவர்கள் பூசைகள் செய்து வேப்பிலை அடித்து துரத்திவிடுவார்கள் போலும். மீண்டும் எங்கள் வீட்டிற்குத் திரும்பி வந்துவிடுவார்.

ஏனென்றால், எங்கள் வீட்டில் அடி நாளில் இருந்து இப்போது வரை, ஒரு அடி மேலே முன்னேறினால் 4 அடி இல்லை, 10 அடிக்கும் கீழே அதலபாதாளத்தில் நாங்கள் சறுக்கி விழுகிறோம். பழகிவிட்டது!

நாங்கள் எதுவும் சொல்லாமல், அலுத்துக் கொள்ளாமல், அவரைக் கண்டும்கொள்ளாததால், அவர் பாட்டுக்கு ஹாயாக விளையாடிக் கொண்டிருப்பார்! பாவம் இருந்துவிட்டுப் போகட்டுமே! அவரையும் ரேஷன் கார்டில் சேர்த்து அவருக்கும் ஒரு ஆதார் அட்டை வாங்கிவிட்டால் ஆயிற்று!

என் தங்கையோ என்னிடம், சனி தசை, ஆட்டிப் படைக்கும் அஷ்டமத்துச் சனியா, கண்டகச் சனியா, அர்தாஷ்டமச் சனியா என்று பார்க்க வேண்டும் என்றும், பரிகாரம் செய் என்றும் கட்டளை இட்டாள். என் மகன் ஆதித் கால்நடை மருத்துவன் அல்லவா, அதனால், நாய், பூனை, இப்படி நாலுகால்களுக்கும் கூட ஏழரை சனி, சனி தசை எல்லாம் உண்டு என்று புதியதாக மேலதிகத் தகவல் சொல்லி வியப்படைய வைத்தாள். மிகவும் எச்சரிக்கையாக இருக்கச் சொல்லி, காலபைரவரை வேண்டிக் கொள்ளச் சொன்னாள்.

அட! சனி இப்படி எல்லாம் கூட ஆள்மாறாட்டம் வேற செய்வார் என்பது தெரியாமல் போயிற்று. இல்லை என்றால், அவருக்குக் கண்டுபிடிக்க முடியாதபடி நாங்களும் மாறு வேஷம் போட்டிருப்போமே! அது சரி நாலுகால்களுக்குமா சனி தசை? இதென்ன புதுக்கதையாக இருக்கிறதே!! என் செல்லங்கள் கண்ணழகிக்கும், ப்ரௌனிக்கும் உடனே ஜாதகம் குறிக்க வேண்டும்! நாலுகால் பிரியர் ஸ்ரீராமிற்கும், சன்னி என்னும் அழகான பிள்ளையை வளர்க்கும் மதுரைத் தமிழனுக்கும், பல நாலுகால் செல்லங்களையும் வளர்த்து உதவும் ஏஞ்சலுக்கும், கோழி வளர்க்கும் அன்பே சிவத்திற்கும் தகவல் சொல்லி அவர்கள் செல்லங்களுக்கு என்ன தசை என்று கேட்க வேண்டும்!! கில்லர்ஜி அவரது சோதிடர் சோனைமுத்துவைப் பார்க்கச் சென்றுள்ளதாகத் தெரிகிறது. அவருக்கு ஒரு பதிவு தேறிவிடும்!

என் தங்கை பல கோயில்களுக்கு வேண்டச் சொல்லி, பரிகாரங்கள் பட்டியல் சொன்னாள். பரிகாரம் என்பதை விட பெரிய செலவுப் பட்டியல்! எனக்குக் கடவுள் நம்பிக்கை அற்றுப் போயிருப்பதாகச் சொன்னாள். பலரும் இப்படித்தான், சோசியத்தை நம்பவில்லை என்றால் கடவுள் நம்பிக்கை இல்லை என்று முடிவு செய்துவிடுகிறார்கள்!

நம்மை மீறிய சக்தி, இறையுணர்வு எனக்கு எப்போதுமே உண்டு. வியாபார உலகில்தான் இந்த இடைத்தரகர்களுக்குக் கமிஷன் அழ வேண்டியிருக்கிறது என்றால், இறைவனைத் தொழுவதற்குமா என்ன? இறைவனை மிஞ்சிவிடுமா என்ன இந்தக் கோள்கள் எல்லாம்?! எனக்குச் சுப்ரீம் கோர்ட்டிற்குப் போய்த்தான் பழக்கம்!

வேதனைகள் பழகிவிட்டன. நன்றாகவே புடம் போட்டு மனதைப் பக்குவப்படுத்திவிட்டன. யாருக்குத்தான் இல்லை வேதனைகள், இடையூறுகள், இன்னல்கள்! உனக்கும் கீழே உள்ளவர் கோடி நினைத்துப் பார்த்து நிம்மதி நாடு!

சனி தசையோ இல்லை வேறு ஏதேனுமோ இருந்தால் இருந்துவிட்டுப் போகட்டும். இத்தனை வருடங்களாக அவற்றைக் கண்டு கொள்ளாதது போல் இப்போதும் அப்படியேதான். நான் இறைவனை நேசிக்கிறேன். இறைவனை இறைவனுக்காக அன்பு செய்கிறேன். தனிப்பட்ட வேண்டுதல்கள் கிடையாது. ஒரு தோழமை உணர்வுடன் அவரை வழிபடுகிறேன். நல்லது நடக்கும் என்ற நம்பிக்கை எப்போதுமே உண்டு!

புதுவருடத்தில் நல்லதே நடக்கட்டும். நல்லதே நடக்கும் என்ற நேர்மறை எண்ணத்துடன் தெளிவாக இருக்கும் மனமெனும் நீர்நிலையில் ஓர் எதிர்மறைக் கல்லை விட்டெறிந்து அதனால் ஏற்படும் சலனத்தைக் கண்டு பயந்து அந்தக் கல்லை எடுத்தெறிய வேண்டி அதனைத் தேட மூழ்கினால் சேற்றில் மாட்டிக் கொண்டு மீண்டும் குட்டையைக் குழப்புவது போன்றுதான்! ஒரு சிறு கல் போதுமே! அது அப்படியே இருந்துவிட்டுப் போகட்டும்! குழப்ப, குழம்ப வேண்டாம். பொதுவாக, உளவியல் படி பார்த்தால், மனித மனம் எதிர்மறையை வெகு எளிதாகப் பற்றிக் கொள்ளும்!

சோசியம் அறிவியல் அடிப்படையில் ஒரு பாடமாக இருக்கிறதுதான். நான் அதைக் குறை சொல்ல மாட்டேன். அதில் நாட்டம் உள்ளவர்கள் கற்பதோ, அதை நம்புவதோ அவர்களது உரிமை. ஆனால், தனிப்பட்ட முறையில் நான் சோதிடம் பக்கம் செல்வதில்லை. மனதைக் குழப்பிக் கொள்வதும் இல்லை. நடப்பதை அப்படியே எற்றுக் கொண்டு செல்கிறேன். நேர்மறை எண்ணமும், நம்பிக்கையுமே வாழ்க்கை!

எல்லோரையும் நேசிப்போம். இயற்கையை நேசிப்போம்! புத்துணர்வுடன் வாழ்வோம். எல்லோருக்கும் நல்லதே நடக்க வேண்டும் என்ற வாழ்த்துக்களுடன் இந்தப் புத்தாண்டை மகிழ்வுடன் வரவேற்று இவ்வாண்டையும் கடந்து செல்வோம்!  

(கீதா சாம்பசிவம் அக்காவின் சோசியம் பார்க்கலையோ சோசியம் என்ற பதிவினால் இந்த கீதாவிற்குத் தேறிய ஒரு பதிவு!!! நன்றி கீதாக்கா!!)

-----கீதா 

சமையலறை ஊழலும், புரியாத பெயரும், மோடியும்

ஒரு மாதம் முன், எனது கணவரின் தம்பி மகள் அவள் படிக்கும் நடனத்தில் முதுகலைப் பட்டப்படிப்பின் ஒரு பகுதியாக, ஆய்வு ஒன்றிற்காக எங்கள் வீட்டிற்கு வந்திருந்தாள்.

எங்கள் குடும்ப வீட்டில் ஒரு சிறு விருந்து ஒன்று ஏற்பாடு செய்யப்பட்டது. எங்கள் குடும்ப உறுப்பினர்கள் மற்றும் நண்பர்கள் குடும்பத்துடனான விருந்து அது. இதில் சில வயதானவர்களும் இருந்ததால் வட இந்திய உணவு வகைகளுடன் தென்னிந்திய உணவு வகைகளும் செய்திருந்தேன். குழுவில் மற்றொருவரும் சப்பாத்தி கொண்டு வந்துவிட்டதால் சப்பாத்தியும், அதற்குத் தொட்டுக் கொள்ளச் செய்தவையும் மீந்து விட்டது. அன்று இரவும், மறு நாளும் ஏதோ நாள், கிழமை, திதி அது இது என்று சொல்லி யாரும் பகிர்ந்து எடுத்துச் செல்லவில்லை. என்னைப் போன்றவர்கள் “நீங்க ஏதாச்சும் செய்வீங்க” என்று சொல்லி, இந்தச் சமாச்சாரங்கள் எதுவும் பார்க்காத, பின்பற்றாத என் தலையில் கட்டப்பட்டது!

20 சப்பாத்தியை வைத்துக் கொண்டு என்ன செய்வது என்று தெரியாமல் முழித்துக் கொண்டிருந்தேன். சப்பாத்திகள் என்னைப் பார்த்து, நீதான் ஏதேதோ உரு மாற்றிப் பெயர் வைத்து காமா சோமானு என்னவோ செய்வியே அப்படி உனக்கு ஒரு சவால் என்று என்னை ஏளனமாகப் பார்த்துக் கொண்டிருந்தன.

“ஓ பெரிம்மா…ப்ளீஸ் இப்போ சப்பாத்தி வேணாம் பெரிம்மா”

“அடப்பாவி நானும் அப்பாவும் மட்டுமே இத்தனையும் வைத்துக் கொண்டு என்ன செய்வது? அதுவும் நாங்க ரெண்டு பேரும் ச்ச்ச்ச்ச்சோ ச்வீட்”

ஊழல்களின் செல்ல நோட்டுகளான 500ம், 1000மும் செல்லா நோட்டுகளாகியிருக்கும் நேரத்தில்....

ஹும், மோடி இப்படியான செல்லா சப்பாத்திகளுக்கும், உணவுவகைகளுக்கும் அபராதம் ஏதும் விதித்துவிடுவாரோ? உணவு வங்கி என்று ஆரம்பிப்பாரோ? யார் வீட்டிலேனும் உணவு மீந்தால், க்ளீன் இந்தியா அதனால் அதைத் தெருவில் எறியக் கூடாது. குளிர்சாதனப்பெட்டியில் பதுக்கக் கூடாது! தனியொருவனுக்கு உணவில்லையேல் ஜகத்தினை அழித்திடுவோம், நமக்கு எதிரியான பாக்கிஸ்தானிலேயே ஒன் டிஷ் லா போட்டான். நாம் மட்டும் சளைத்தவர்களா என்ன? அதனால் அதிகமாக மீறும் உணவினை அழகாக பேக் செய்து, காலாவதியாகும் தேதி எழுதி, உடனே உணவு வங்கியில் கொண்டு சேர்க்கவும் என்று திடீரென்று ஓர் ஆணை இட்டால்? சென்னை முழுவதும் பெரிய வரிசை நிற்குமே! என்று அமாவாசைக்கும் அப்துல்காதருக்கும் முடிச்சுப் போட விபரீதமான எண்ணங்கள் தோன்றியது.

மகனிடம் பேசினேன். உடனே அவன் பேசாம மோடிகிட்ட, மருந்துக்கெல்லாம் காலாவதியாகும் தேதி கொடுக்கறா மாதிரி நோட்டுலயும் காலாவதி தேதி அடிக்கச் சொல்லிடு, நீயும் சப்பாத்தில காலாவதி தேதி போட்டு தப்பிச்சுருலாம்….அதுவும் சப்பாத்திய நீ பதுக்கினா மோடி என்ன வந்து பார்த்துட்டா இருக்கப் போறாரு” என்று என்னைக் கலாய்த்தான்.

டேய் என்னடா இந்தச் சப்பாத்திய என்ன பண்ணுறதுனு ஐடியா கொடுனா இப்படி ஏடாகூடமா சொல்ற..ஏதாவது ஐடியா கொடுடா

ம்மா அந்த 2000 ரூபாய் நோட்டைக் கொஞ்சம் பாரு……நல்லா பாருமா…”

அட பரவாயில்லையே..…முன்னாடில்லாம் மில்க்மெய்ட் டின்னோட ஒரு பேப்பர் வித வித ரெசிப்பியோட வரும். நான் கூட ரெசிப்பி பார்த்துதான் வாங்குவேன். அது மாதிரி….நோட்டுல ஏதாவது ரெசிப்பி வந்துருக்கோ லென்ஸ் வைச்சுப் பார்க்கணுமோ?!

“ஐயோ அம்மா 500, 1000 ஒழிச்சுட்டு, ரெண்டையும் கலக்கி 2000 ஆக்கிருக்கார்ல புதுசா அதச் சொன்னேன்….…….ம்மா…ம்மா வெயிட்….2000…நோட்டுல ரெசிப்பியா நல்ல ஐடியா……நல்ல டிமான்ட் இருக்குமே.. போணியாகுமே..….”

“என்னடா நீ... அது ஜனகராஜ் ஸ்டைல்டா…எல்லா ஸ்னாக்ஸ்லயும் 100 கிராம் போட்டு நல்லா கலக்கி அதுல 100 கிராம் கேப்பாரு..காலாவதியானது! ஹும் அதே மாதிரி சமையல்ல மீந்தத செஞ்சா.. ஏண்டா அது அரதப் பழசு எரிச்சகறிடா…”

“போம்மா எது சொன்னாலும் ஒரு பேரைச் சொல்லிடற.. ஆள விடு…”

முதலில் முந்தைய தினம் கலந்து கொண்ட உறவினரில் என்னைப் போன்று ஜாலியாக, எந்த மீன மேஷமும் பார்க்காமல் ருசித்துச் சாப்பிடுபவர்களுக்கு அழைப்பு விடுத்தேன்.

‘ஹேய் புதுசா ஒன்னு ட்ரை பண்ணறேன்… ஸோ வந்துருங்கப்பா.”

சோதனை எலிகள்?…..ம்ம்ம் அப்படியும் வைத்துக் கொள்ளலாம்!

எப்போதுமே இப்படித்தான். நான் புதிதாக ஏதேனும் செய்வதாக இருந்தால் இவர்களுக்குக் கண்டிப்பாக அழைப்பு உண்டு.

குளிர்சாதனப் பெட்டியைத் திறந்தேன். ‘குளிர் தாங்கல….குளிரிலிருந்து எப்போது எங்களை வெளியில் எடுப்பாய்’ என்று என்னை ஏக்கத்துடன் பார்த்துக் கொண்டிருந்தன சன்னா மசாலா, கோஃப்தா, வெந்த வேர்க்கடலை காய் சாலட், கொத்தமல்லி புதினா சட்னி.

எல்லாவற்றையும் வெளியில் எடுத்தேன். என்னவோ செய்தேன். அது ஊழல் ரகசியம்! வெளியில் சொல்ல முடியுமா? மோடியிடம் நீங்கள் போட்டுக் கொடுத்துவிடுவீர்கள்!

உருவை மாற்றிய பிறகு, அதற்கும் மேலே உரு தெரியாத அளவிற்குப் பச்சைப் போர்வை போல் கொத்தமல்லி தூவினேன். கோ க்ரீன்!! ஆங்காங்கே பொடியான வெங்காயம் தூவினேன். மேலே ஆங்காங்கே ஒரு ஸ்பூன் கெட்டித் தயிர் விட்டேன். வெள்ளைத் தயிரை அப்படியே வைத்தால் அழகாய் இருக்குமோ? அதனால், தயிரின் மேல் தக்காளி சாசை ஒரு பொட்டு போல் வைத்து, நடுவில் ஒரு சப்பாத்தியை கோன் போல சுருட்டி நுனி பாகத்தை நடுவில் செருகி, வைக்க அது அதிசயமாய் நிற்க, அதன் மேல் பாகத்தில் பூ சாடி போல் இருந்த வாயில் கொத்துமல்லித் தழைகளைக் காம்புடன் நிற்க வைத்து…அலங்காரமாக வைத்தேன்.

எப்போதுமே புதிதாய் ஒன்று செய்ததும் அதற்குப் புரியாத மொழியில், புரியாத வகையில் ஒரு பெயர் சூட்டும் நிகழ்வை மனதில் நடத்துவது போல் அன்றும் அவர்கள் வரும் முன் மனதிற்குள் நிகழ்த்தினேன்! சூட்டினேன்!

இந்த மீந்ததற்கு மாறுவேடம் இட்டு இப்படி அலங்காரமாக்கி, புரியாத பெயர் வைத்து சேல் போட முயன்றேன். அப்படியேனும் போணியாகுமா என்ற நப்பாசைதான்!

ஒவ்வொருவராக வந்து எட்டிப் பார்த்தார்கள்.

“ஹும் என்னத்தெல்லாமோ கலந்து காமா சோமானு வைச்சுருக்கா” இது என் அப்பா…

“வாவ்! அண்ணி கலக்கிட்டீங்க போங்க. என்னென்னவோ கலர் கலரா இருக்கே ஸ்பீக்கர் ஷேப்பை பூச்சாடியாக்கி….ம்ம்ம்”

“ஓ! பெரிம்மா யு ரியலி ராக்! ஒல்ட் வைன் இன் ந்யூ பாட்டில்! ஆம் ஐ ரைட்” என்று சில கிளிக்ஸ் எடுக்க முயன்றாள்.

ஐயோ ரகசியம் வெளியாகிடுச்சே! “ஹேய் உன் ஃபேஸ்புக்ல எல்லாம் போட்டுறாத”

“ஓ! அண்ணி அப்ப நேத்து மீந்ததா…..” என்று அவர்கள் முகங்கள் அஷ்ட கோணலாக...

“ஹேய் அப்படில்லாம் இல்லப்பா…….”

பெண்ணின் நண்பன் வந்தான்.  நேரே வந்து இதன் அழகில் மயங்கி(??!!!) ஒரு ஸ்பூன் எடுத்து வாயில் போட்டான்! ரியலிட்டி ஷோவில் முடிவுகளை வெளியிடத் தாமதிக்கும் அந்தக் கடைசி தருணங்களில் பின்னணியில் ஒரு இசை ஒலிக்குமே, பார்வையாளர்கள் ஒருவித டென்ஷனில் முகத்தை வைத்துக் கொள்வார்களே, அப்படி நானும், என் முகத்தைக் கைகளால் மூடிக் கொண்டு காதுகளை தீட்டிக் கொண்டு……

அவன் வாயில் ஸ்லோ மோஷனில் போட்டு, ஸ்லோ மோஷனில் மெல்ல….வந்தன வார்த்தைகள், “வாவ் ஆண்டி ஆசெம்! கலக்கிட்டீங்க போங்க”

“ஹே’…..

மெய்யாலுமே “கலக்கல்”தாம்பா!!! என்று மனதிற்குள் சொல்லிக் கொண்டேன்! சரி அதன் திருப்பெயரைச் சொல்லவே இல்லையே…….“லெங்லுஓ ஷிப்பின் சாட்” (கில்லர்ஜி, அபயா அருணா சுப்!).

---கீதா

வாட்சப்பில் தமிழ்ப் பதிவர்களுக்குத் திரட்டி!!!!

படம் இணையத்திலிருந்து

நாம் ஒவ்வொருவருக்கும் நம் எழுத்துகள் ஏதேனும் மாத இதழிலோ, வார இதழிலோ வெளிவராதா என்ற ஏக்கம் இருக்கத்தான் செய்கிறது. நம் பதிவர் நண்பர்கள் பலரும் அதனைத் தீவிரமாக முயற்சி செய்து வெற்றியும் கண்டுள்ளனர். என்றாலும் அப்படி முயற்சி செய்யாமலும், முயற்சி செய்து, வெளிவராமலும் ஏக்கத்துடன் இருப்பவர்களுக்கு, நாமே அரசன், நாமே மந்திரி என்று உதவும் வகையில் வலைத்தளம்/வலைப்பூ இருக்கிறது. அதுவும் இலவசமாகத் தொடங்கி எழுதலாம் என்றால் மகிழ்ச்சிதானே! அப்படித்தான் நாம் அனைவரும் நமது அனுபவங்களையும், நாம் கற்றவற்றையும், உணர்ந்தவைகளையும், தேடல்களையும், கற்பனைகளையும், புனைவுகளையும், சமூகத்தில் நடக்கும் அநீதிகளுக்கு எதிராகக் குரல் கொடுத்தும், நல்லது நடந்தால் பாராட்டியும் எழுதி வருகிறோம்.

அதுவும் நம் வலைப்பதிவர்கள் ஒருவருக்கொருவர் அவரவர் திறமையை வெளிப்படுத்தியும், நட்புடனும், அன்புடனும், எதிர்மறைக் கருத்தானாலும் சரி, நேர்மறைக் கருத்தானாலும் சரி அதனை வெளிப்படுத்திக் கொண்டும் வருகிறோம். கருத்துப் பரிமாற்றங்களினால் நாம் பல கற்க முடிகின்றது. பிறர் அனுபவங்களையும் அறிய முடிகிறது. அதிலிருந்து பாடங்களும் கற்று வருகிறோம் என்றால் மிகையல்ல.

அப்படி நாம் எழுதுவது இவ்வுலகம் முழுவதும் இருக்கும் தமிழன்பர்கள் அனைவருக்கும் சென்றடைய வேண்டும் என்றால் அதற்கு ஒரு திரட்டி இன்றியமையாததுதானே! பல திரட்டிகள் இருந்தன என்றாலும் அனைத்தும் வெகு சில நாட்களில், மாதங்களில் செயலற்றுப் போயின என்பது மிகவும் வருந்தத் தக்கதே. திரட்டிகளில் தமிழ்மணம்தான் சிறப்பான திரட்டியாக இருந்து வந்தது என்றாலும், அதில் தரம் என்பது குறைந்து வரத் தொடங்கியது. அதன் செயல்பாடு பல சமயங்களில் புரியாமல்தான் இருந்து வந்தது. நல்ல திரட்டியாக இருந்து வந்த தமிழ்மணம் திரட்டி சமீபகாலமாகச் சரியாகச் செயல்படவில்லை என்பது நாம் அனைவரும் அறிந்ததே. ஏனோ அதில் பல சிக்கல்கள் இருந்து வருகின்றன. அதனைப் பற்றி தெரியாததால் இங்கு குறிப்பிடவில்லை. நமக்குக் கவலையில்லை.

ஏன் கவலையில்லை? இதோ நம் தமிழ் வலையுலகிற்கான, தமிழ் எழுத்தாளர்களுக்கான, நமக்கே நமக்கான ஒரு திரட்டி உருவாகி வருகிறது. அதற்காக நமது புதுக்கோட்டை வலையுலக அரசர்களான முத்துநிலவன் ஐயா/அண்ணா, மற்றும் செல்வா அவர்களும் வலைச் சித்தர், சுறு சுறுப்புத் தேனீ என்று செல்லமாகப் பெயர் சூட்டபெற்ற டிடி அவர்களும் இணைந்து தமிழ்வலையுலக பதிவர்கள் அனைவரையும் ஒரே குடும்பமாக்கிடவும், நம் பதிவுகளை அதில் இணைக்கும் திரட்டியாகவும், அனைவரையும் ஒரே இடத்தில் சந்திக்கும் படியுமாக காண்செவிக் குழுவில் தமிழ் வலைப்பதிவகம் என்ற திரட்டி ஒன்றை முன்னோட்டமாகத் தொடங்கிட இதோ வெற்றி நடை போட்டு வருகிறது.

நிர்வாகக் குழுவினர் அனைவரது உழைப்பிற்கும், அதனைச் செயல்வடிவமாக்கியதற்கும் பதிவர்கள் அனைவரும் சிரம் தாழ்த்தி வணக்கம் கூறுகிறோம். எங்கள் அனைவரது பாராட்டுகளும், வாழ்த்துக்களும்!

இப்போது இது வரை அறிந்திராத பல வலைப்பதிவர்களையும், புதிய வலைப்பதிவர்களையும் இதில் காண முடிகிறது. பலரது படைப்புகளும் பலரையும் சென்றடையும் என்பதும் உறுதி. அதற்கு உதவும் காண்செவி தொழில் நுட்பத்தையும் பாராட்டுவோம்! நம் எல்லோரையும் இணைக்கும் இணையத் தொழில்நுட்பத்தையும் பாராட்டுவோம்! என்னே ஓர் அருமையான வாய்ப்பு!

அப்படிப்பட்ட ஒரு வாய்ப்பை அளித்த நம் அன்பர்கள், நிர்வாகக் குழுவினருடன் நாம் விதிமுறைகளைப் பின்பற்றி ஒத்துழைக்க வேண்டும்தானே! எனவே நாம் அனைவரும், அதில் தேவையற்ற செய்திகளைப் பரப்பாமல், பகிராமல், நாம் எழுதும் இணைப்புகளை மட்டுமே அதில் இணைத்துப் பகிர்ந்து, பிற பதிவர்கள் எழுதும் பதிவுகளையும் முடிந்தவரை, நேரம் உள்ள போது வாசித்துக் கருத்திட முடிந்தால் கருத்திட்டு, இல்லை என்றால் வாசித்து அவர்களை ஊக்கப்படுத்தாலாமே! தமிழ்வலையுலக ஒற்றுமை தழைத்தோங்கிடுமே!

இணையாத வலைப்பதிவர்கள் இணையுங்கள். தங்கள் திறமையை, எழுத்தாற்றலை வெளிப்படுத்துங்கள். புதிதாய் எழுத வருவோருக்கும் இது பொருந்தும்! தமிழ் எழுத்தாளர்கள் பெருக வேண்டும். மேன்மேலும் சிறப்படைய வேண்டும். தமிழ் மொழி! தமிழ் எழுத்துக்கள் இவ்வுலகம் முழுவதும் சென்றடைந்து சிறக்கட்டும்! தழைக்கட்டும்! தமிழின் மணத்தைப் பரப்புவோம்.

தயவான வேண்டுகோள்! நம் பதிவர் நண்பர்கள் அதில் தங்கள் படைப்புகளை மட்டுமே இணைத்துப் பயன் பெறுங்கள். தங்கள் பெயர், ஊர், தளத்தின் பெயர், மற்றும் அலைபேசி எண் அல்லது மின் அஞ்சல் முகவரி கொடுத்து அறிமுகப்படுத்திக் கொள்ளலாம். வேறு செய்திகள், தகவல்கள் வேண்டாமே! அவற்றைப் பகிர பல குழுக்கள், நம் நண்பர்களின் தனிப்பட்ட காண்செவி எண் உள்ளதே! அதில் பகிர்ந்து கொள்ளலாம் இல்லையா! தேவையற்றவை வரும் போது நாம் இணைக்கும் பதிவுகளின் இணைப்புகள் எங்கோ காணாமல் நம் கண்களில் படாமல் போகும் வாய்ப்பும் உண்டுதானே!

எனவே நாம் அனைவரும் நிர்வாகக் குழுவுடன் ஒத்துழைப்போம், மேலும் சிறக்கச் செய்வோம்! முத்தாய்ப்பாக, நம் அன்பிற்கும், மதிப்பிற்கும் உரிய புகழ்பெற்ற வலைப்பதிவர் தேனம்மை அவர்கள் தன் தளத்தில் இட்டிருக்கும் வார்த்தைகளுடன்

வலைப்பதிவர்  ஒற்றுமை  ஓங்கட்டும்.!

என்றும்  நம்முள்  வலிமை  பெருகட்டும்.!

துளசிதரன்,  கீதா

எனது மூன்றாவது விழியின் பார்வையில் - 4 - நவராத்திரி கொலு

இந்த வருட நவராத்திரி கொலு - என் பார்வையில் பட்டதை மூன்றாவது விழியிலும் சேமித்தேன். கொலு முடிந்து மூன்று மாதங்கள் ஆகிவிட்டன. தாமதமாகத்தான் வெளியிடுகின்றேன். ஒரு வழியாக இன்று வெளியிட்டுவிடலாம் என்று இதோ உங்கள் பார்வைக்கு....கொலு மட்டும்தான் சுண்டல் எதுவும் கிடையாது! ஊசிப்போய்விட்டது. 

நல்ல காலம்! அந்த நேரத்தில் மோடியின் திட்டம் அறிவிக்கப்படவில்லை! .....பட்டிருந்தால் பல பொம்மை வியாபாரிகளுக்கும், கலைஞர்களுக்கும் கடுமையான பாதிப்பு ஏற்பட்டிருக்கும்!  இப்போது டிசம்பர் மாத இசை விழா சோக கீதம் பாடுவது போல் அப்போதே நவராத்திரி பொம்மைகள் எல்லாம் சோகமே வடிவாக இருந்திருக்கும். மக்கள் எல்லோரும் ஏடிஏம் வாசலிலும், வங்கிகளின் வாசலிலும் தவமிருந்திருப்பார்கள்! 

இதோ புகைப்படங்கள்..

கும்பகர்ணன் செட் 

-----கீதா

வார்த - என் பார்வையிலும், எனது மூன்றாவது விழியின் பார்வையிலும் -3

சென்னையின் இயல்பு வாழ்க்கையையே ஒரு சில மணி நேரங்களில் வாரிக் கொண்டுச் சென்ற வார்த. ஒரு சில மணி நேரங்கள்தான்! ஆனால், சுழற்றிச் சுழற்றி அடித்து வாரி ஆட்டம் போட்டது. இயற்கை அன்னையின் சிக்சர் பௌன்சர்! இயற்கை அன்னை எவ்வளவு அழகானவளோ, எவ்வளவு அமைதியானவளோ, எவ்வளவு நன்மை தருவாளோ, அத்தனைக்கும் நிகராக, அந்த அன்னை சீற்றம் கொண்டால் பெரும் சீற்றத்துடன், பேரிசைச்சலுடன், தாண்டவம் ஆடி எல்லாவற்றையும் புரட்டியே போட்டும் விடுவாள். எங்கள் வீட்டின் - முதல் மாடி - பால்கனி வழியாகத் தண்ணீரை அறைக்குள் தள்ளிக் கொண்டே இருந்தாள். நாங்களும் ஒவ்வொரு 5 நிமிடத்திற்கும் தள்ளி விட்டுக் கொண்டே இருந்தோம். அன்னையின் இந்தச் சீற்றத்திற்கான காரணங்கள் என்னவாக இருக்கும் என்று எண்ணிக் கொண்டே, பல எண்ணங்களுடன், நான் வார்த புயலையையும் , மழையையும் ரசித்தேன்.

புயல் காற்று நின்றதும் நான் எங்கள் பகுதியைப் பார்வையிடச் சென்றேன். புயல் கரையைக் கடந்து சென்றதும், போருக்குப் பின் அமைதி என்பது போல் அப்படியொரு அமைதி. ஆனால் நிலமோ, போருக்குப் பின் வீரர்களும், யானைகளும், குதிரைகளும் மடிந்து இரத்த வெள்ளத்தில் பிணக்குவியல்கள் மலை போல் காணப்படுவது போல், மரங்கள் வேரோடும், ஒடிந்தும் வீழ்ந்து, சாய்ந்திருக்க, நின்றிருந்த மரங்களில் பல, கணவரைப் போரில் இழந்த விதவைகள் போல் இலைகள் உதிர்ந்து மொட்டையாய், ஒரு போர் பூமி போல் காட்சியளித்தது. அளிக்கிறது. ஆடி அடங்கியபிறகு சிறிது நேரத்தில் வருடிக் கொடுக்கும் சிறிய காற்று!

“அடிப்பாவி! நீயா சற்று நேரம் முன்பு இப்படித் தலைவிரித்தாடியது? ஒன்றுமே நடவாதது போல் இப்படி வருடிக் கொடுத்துக் கொண்டு அமைதி காக்கிறாயே! பிள்ளையையும் கிள்ளி விட்டுத் தொட்டிலையும் ஆட்டுவது போல் அல்லவா இருக்கிறது உன் செயல்! உன் சீற்றத்திற்கான காரணம்தான் என்னவோ?” என்றும் என் மனம் கேட்டது.

“ஏய் மனிதா நீ உன் பேராசையில், உனக்கு நிழல் கொடுத்த, கனிகள் கொடுத்த, மண் அரிப்பைத் தடுத்த, நிலத்தடி நீரை சேமிக்க உதவிய என் மரங்களை வெட்டி வீழ்த்தி அதில் அடுக்கடுக்காய் கட்டிடங்கள், அடுக்குமாடிக் குடியிருப்புகள் என்று கட்டினாயே! இப்போது பார் அதே மரங்களை நான் வீழ்த்துகிறேன்! இப்போது பார் நீ வசிக்கும் நிலத்தை. வெட்ட வெளியாகிவிட்டது இல்லையா? ஒவ்வொரு மரத்தையும் வளர்க்க எத்தனை ஆண்டுகள் ஆகும் என்பதை உற்றுக் கவனித்துக் கற்றுக் கொள்! இனி வரும் கோடை மேலும் கடும் கோடையாக இருக்கும் என்பதை நினைவில் நிறுத்திக் கொள். அத்தண்டனையை அனுபவி. இனியேனும் உனக்குப் புத்தி வரட்டும்!” என்று சொல்கிறாளோ என்பது போல் தோன்றியது.

"சரி மனிதனைத் தண்டிக்க நினைக்கிறாய்! மிகவும் சரியே! ஆனால், வாயில்லா உயிர்களான பறவைகளும், குஞ்சுகளும், இன்னும் குஞ்சுகள் வெளிவராத நிலையிலான முட்டைகளும் அல்லவா  அன்று இறந்தன." என்ற என் கேள்விக்கு அவளிடம் பதில் இல்லை. இல்லை இல்லை என் மூளைக்குள் அதற்கான பதில் இல்லை!

 

இந்திராநகர் பேருந்து நிறுத்தம்

நான் நடைப்பயிற்சி மேற்கொள்ளும் பகுதி

எங்கள் பகுதி முழுவதும் நிழற்சாலைகள். பசுமை நிறைந்த இடம். ஆனால், நான் கண்டதோ? நான் நடைப்பயிற்சி செய்யும் மரங்கள் அடர்ந்த நிழற்சாலைகள் அனைத்தும் வெட்டவெளியாய், வேரோடு சாய்ந்த பெரிய மரங்கள், இலைகள் இழந்து மொட்டையாய் மரங்கள், கிளைகள் ஒடிந்து ஊனமுற்ற மரங்கள் என்று சாலையில் குவிந்து இருந்தக் காட்சியைக் கண்டு என் மனம் வெம்பி, விக்கித்து நின்றுவிட்டேன், இனி எத்தனை வருடங்கள் ஆகும் மீண்டும் இச்சாலைகள் அனைத்தும் முன்பு போல் நிழல் தருவதற்கு?

மறு தினமே அடித்த வெயிலின் கடுமை தெரிந்தது! பல இடங்கள் சென்றேன். அனைத்துச் சாலைகளிலும் மரங்கள் வீழ்ந்து போக்குவரத்தைத் தடுத்திட போக்குவரத்து நெரிசல். போக்குவரத்தை ஒழுங்கு படுத்திட நிறையக் காவலர்கள் பணியில் ஈடுபட்டிருந்தனர். பல இடங்களில் கார்களும், கட்டிடங்களும் பாதிக்கப்பட்டிருக்கின்றன. பேருந்து ஒன்று கவிழ்ந்தது என்று சொல்லப்பட்டு விழுமியம் பகிரப்பட்டது. எனக்குக் கிடைக்கவில்லை.

எல்லா இணையத் தொடர்புகளும் அற்று, அலைபேசிகள் தொடர்புச் சேவையும் செயலிழந்து, மின்சாரம் தடைப்பட்டு, தண்ணீரில்லாமல் என்று இதுவரை இன்னும் முழுவதும் மீண்டபாடில்லை. இணையத் தொடர்பும், அலைபேசித் தொடர்புகளும், மின்சாரமும் அவ்வப்போது செயலிழந்து விட்டுவிட்டுத்தான் வருகிறது.

அன்று புயல் நின்றதும், அந்தந்தப்பகுதியைச் சேர்ந்த மக்களே, பொதுச் சேவையை எதிர்பார்க்காமல் மரங்களை வெட்டி அகற்றிச் சாலையில் போக்குவரத்தை ஒழுங்குப்படுத்தத் தொடங்கிவிட்டனர். தற்போது பொது மக்களுடன், பொதுச் சேவைப் பணியாளர்களும், மலை போல் குவிந்து கிடக்கும் மரங்களையும், குப்பைகளையும் அகற்றிடத் துப்புரவு பணியாளர்களும் இணைந்து கொண்டு மீட்புப் பணிகள் நடக்கின்றது, என்றாலும், சென்னை முழுவதும் இயல்பு நிலைக்குத் திரும்பிட இன்னும் பல நாட்கள் ஆகலாம் என்றே தோன்றுகின்றது. கட்டிடக் காடாக இருந்த சென்னை இப்போது காடு போல் காட்சியளிக்கிறது. கட்டிடங்கள் பெருகிவரும் சென்னையில் இத்தனை மரங்களா என்ற வியப்பு ஒரு புறம். ஐயகோ! இருந்த மரங்களும் இப்படி வீழ்ந்துவிட்டனவே என்று வேதனை மறுபுறம். என்ன செய்வது? நம்மை எல்லாம் மீறிய வலுவாய்ந்த இயற்கையின் சீற்றத்தை எதிர்க்க முடியுமா!!! 

நான் எடுத்த சில புகைப்படங்களுடன் எனது உறவினர் அனுப்பிய மூன்று புகைப்படங்களும்.

 

படத்திலேயே எந்த அலுவலகம் என்று தெரிந்துவிடும். டைடல் பார்க்கிற்கு அடுத்திருப்பது

 டைடல் பார்க் முன் - புயல் நின்றதும் எடுத்த படம்மேலே நந்தனம் சிக்னலில்  

கீழே கோடம்பாக்கம் பகுதி

 மறுதினமே வெயில் சுளீரென்று அடித்தது

 

 கீழே நீலாங்கரையில்

 

----- கீதா

படங்கள் எல்லாம் புயல் அன்றும் அடுத்தும் எடுத்து, பதிவும் எழுதியிருந்தாலும் இணையத் தொடர்பு சரியாக இல்லாததால் இன்றுதான் வெளியிட முடிகிறது. இன்னும் முழுவதும் சரியாகவில்லை.