அந்த 276 மாணவிகளைக் காப்பாற்றுங்கள்.....! அவர்களைப் பெற்றோர்கள் கையில் ஒப்படையுங்கள்.........!

     

    

    

     

      
    ஆப்பிரிக்க நாடான நைஜீரியாவில், போர்னோ மாநிலத்திலுள்ள, சிபோக் நகர, அரசு ரெசிடென்ஷியல் பொதுப் பள்ளியிலிருந்து கடந்த ஏப்ரல் 14 ஆம் தேதி நள்ளிரவில் 200 க்கும் மேலான மாணவிகள் துப்பாக்கி முனையில் கடத்திச் செல்லப்பட்டனர். எல்லா மாணவியரும் 12-15 வயதிற்கு இடையே உள்ளவர்கள். இவர்களுடன் 5 ஆசிரியைகளும் கடத்தப்பட்டனர்.  இவர்களைக் கடத்திச் செல்ல இருபதுக்கும் மேற்பட்ட வாகனங்களில் ஆயுதமேந்திய 200 பேர் வந்திருந்தனர். 

முகமது யூசுஃப்

          

       அவர்கள், வட நைஜீரியாவில் உள்ள போர்னோ மாநிலத்தில், 2002ல், முகம்மது யூசுஃப் என்பவரால் உருவாக்கப்பட்ட “போக்கோ ஹராம்” எனும் இயக்கத்தைச் சேர்ந்தவர்கள்.  500 க்கும் மேலான மொழிகள் பேசும், 350க்கும் மேற்பட்ட இனத்தவர்கள் வாழும் நைஜீரியாவிலுள்ள, “ஃபௌசா” எனும் மொழியில் “மேல் நாட்டு கல்வி கற்பது பாவம்” என்பதுதான் “போக்கோ ஹராம்” என்பதன் அர்த்தமாம்.  ஏறத்தாழ 17 கோடி பேர் வாழும் நைஜீரியாவின் வட பகுதியில் முஸ்லிம்களும், தென் பகுதியில் கிறித்தவர்களும் அதிகமாக வாழ்கின்றார்கள். 

அபுபகர் ஷெக்காவு

நைஜீரியாவில் “சரியத்”தைப் பின்பற்றி ஒரு தனி இஸ்லாமிய நாட்டை உருவாக்குவதுதான், “போக்கோ ஹராம்” எனும் இவ்வியக்கதிற்கு உயிர் கொடுத்த முகம்மது யூசுஃபின் நோக்கம்.  யூசுஃபிற்குப் பின் 2009-ல் இவ்வியக்கத்தின் தலைமை பொறுப்பேற்ற “அபுபகர் ஷெக்காவு” இதுவரை ஏறத்தாழ 5000 பேரைக் கொன்று குவித்திருக்கிறார்.  மேல்நாட்டு கல்விக் கூடங்களில் பணிபுரிந்த 170க்கும் மேற்பட்ட ஆசிரியர்கள் கொல்லப்பட்டிருக்கிறார்கள். இதில் ஷெக்காவை எதிர்த்த இஸ்லாமியர்களும் அடக்கம்.  ஏப்ரல் 14 ம் தேதி கடத்திச் செல்லப்பட்ட மாணவியர்களில் ஏறத்தாழ 50 பேர் எப்படியோ உயிர் தப்பி தங்கள் வீட்டை அடைந்திருக்கின்றார்கள். மீதமுள்ள, கடத்திச் செல்லப்பட்ட 276 மாணவியர்களைப் பற்றி இது வரை ஒரு விவரமும் இல்லை. 

 “ஷெக்காவு” இதற்கிடையே வெளியிட்ட ஒரு வீடியோவில் கடத்தப்பட்டவர்களில் 136 மாணவிகள் பர்தா அணிந்து குரான் வாசிப்பதைக் காண்பித்திருக்கிறார்.  கடத்தப்பட்ட மாணவிகளில் பெரும்பான்மையானோர் கிறித்தவ மதத்தவர்கள்.  அவர்களை மதம் மாற்றியதாகவும், சிறையில் அடைக்கப்பட்டுள்ள “போக்கோ ஹராம்” இயக்கத்தைச் சேர்ந்தவர்களை விடுவிக்காவிட்டால், மாணவியர்கள் அனைவரையும் அடிமைகளாக்கி விற்று விடுவேன் என்றும் எச்சரிக்கை விடுத்திருக்கிறார், ஷெக்காவு.

நைஜீரீயா மக்கள் அனைவரும், இனம், மதம், மொழி பாராமல் கடத்தப்பட்ட பரிதாபத்திற்குரிய மாணவிகள் பாதுகாபாகத் திரும்பிவர வேண்டி பிரார்த்தனையிலும், போராட்டத்திலும் ஈடுபட்டு இருக்கிறார்கள்.  இதில் வேதனைக்குரிய விஷயம் என்னவென்றால், மாணவியர்கள் “போக்கோஹராம்” இயக்கத்தால் கடத்தப்படவிருக்கின்றார்கள் என்ற விவரம், கடத்தப்படுவதற்கு 5 மணி நேரத்திற்கு முன்பே, தலைநகரான, ‘மைத்துகுரி’யிலுள்ள ராணுவத் தலைமையகத்திற்குத் தெரிய வந்ததாம்.  அப்படி இருந்தும், தேவையான பாதுகாப்பு நடவடிக்கையை அரசும், ராணுவமும் எடுக்கவில்லை என்பது மிகவும் வேதனைக்குரியது.  மட்டுமல்ல, இதே பள்ளியில், கடந்த மார்ச் 29 ம் தேதி, 29 மாணவ, மாணவியர்களைப் “போக்கோ ஹராம்”  இயக்கத்தினர் கொன்றிருக்கிறார்கள்.  இப்படிப்பட்டச் சூழலில், பள்ளிக்குத் தேவையான பாதுகாப்பு கொடுக்காமலும், “போக்கோஹராம்” இயக்கத்துடன் இராணுவம் நேரடி மோதல் நடத்தாமலும் இருப்பது, நைஜீரிய மக்களிடையே பலவித சந்தேகங்களை ஏற்படுத்தி இருக்கிறது.

ஜனாதிபதி குட்லக் ஜொனாதன்

        ஏர்மார்ஷல், அலெக்ஸ் பேடாஹ்

நைஜீரியாவின் ஜனாதிபதியான குட்லக் ஜொனாதனும், இராணுவத் தலைவர், ஏர்மார்ஷல், அலெக்ஸ் பேடாஹ்னும், மாணவியர்களைச் சிறை வைத்திருக்கும் இடத்தை அறிந்த பின்னும், “போக்கோ ஹராம்” இயக்கத்தைச் சேர்ந்தவர்களுடன் போராடி, அவர்களை மீட்க மாட்டோம் என்று பிடிவாதம் பிடிக்கிறார்கள். இதற்கிடையே 50 மாணவியர்களுக்கு, 100 சிறைப்படுத்தப்பட்ட இயக்கத்தினரை விடுவித்தல் என்று முடிவு செய்து, அவர்களை விடுவிக்கத் தயாரான அரசு, ஏனோ திடீரென அதிலிருந்து பின் வாங்கிவிட்டது.  எனவே, கடத்தப்பட்ட 276 மாணவியர் கதி என்னாகும் என்ற ஆதங்கம் நைஜீரியாவிலுள்ள மக்களுக்கு மட்டுமல்ல, உலகெங்கிலும் உள்ள நல்ல இதயம் படைத்தவர்களின் மனதை வேதனைப்படுத்துகிறது.  இதற்கு எதிராக, ஃபிரான்ஸ், அமெரிக்கா, இங்கிலாந்து போன்ற நாடுகள் நடவடிக்கைகளில் இறங்கிய செய்தி கொஞ்சம் ஆறுதலாக இருக்கிறது.  எப்படியோ, மாணவிகள் காப்பாற்றப்பட்டால் போதும்.

உலகிலுள்ள எல்லா மதங்களிலிருந்தும், மிகவும் எளிமையான, மனித நன்மைக்கும், இறையருளை எளிதாகப் பெறுவதற்கும் தேவையானவற்றை எல்லாம் உட்படுத்தி, நபிகள் நாயகத்தால் உருவாக்கப்பட்ட, மனிதநேயம், சமத்துவம், தியாக மனப்பான்மை போன்ற குணங்கள் எல்லாவற்றிற்கும் வழிவகை செய்யும், மனிதனுக்கும், இறைவனுக்கும் இடையே பிரார்த்தனை ஒன்றைத் தவிர புரோகிதர்களின் மந்திர தந்திரங்கள் அவசியமில்லை எனும் உண்மையை நிலை நாட்டிய இஸ்லாம் மதம், வேத நூலான குரானில் 176 வாகியங்களில் பெண்களின் நலன் மற்றும் பாதுகாப்பைப் பற்றி விவரிக்கும் இஸ்லாம் மதம், பெண்களுக்குக் கல்வி கற்கத் தடை விதிக்கிறது என்பதை மனம் ஏனோ ஏற்க மறுக்கிறது. 

                                       மலேசியாவில் 

துருக்கியில் 

Pictures courtesy : google                                                                  

உலகெங்கிலுமுள்ள 60க்கும் மேற்பட்ட இஸ்லாமிய நாடுகளில், துருக்கி, மலேஷியா போன்ற நாடுகள், முன்னேற்றத்திற்குத் தேவையான மாற்றங்களை, மதத்திற்குக் களங்கம் ஏற்படாத விதத்தில் புகுத்தி முன்னேறிக் கொண்டிருக்கும் இவ்வேளையில் இது போன்ற சம்பவங்கள் நடந்தால் மேன்மையான மதத்திற்குக் களங்கம் ஏற்படாதா?  உலகெங்கிலுமுள்ள அம்மதத்தின் தலைவர்களுக்கு, இது போன்ற சம்பவங்கள் நடக்காமல் பார்த்துக் கொள்ள வேண்டிய பொறுப்பும், அவசியமும் மிகவும் தேவை அல்லவா?.

எல்லா மதங்களும் – மதங்கள் என்றால் மதங்களைக் கையாளும் ஆண்கள் – பெண்களுக்குச் சம உரிமை வழங்குவதில் ஏனோ முக்கியத்துவம் கொடுப்பதில்லை.  “தாயிற் சிறந்த கோயிலும் இல்லை”.....என்று சொல்லும் இந்து மதம் கூட, பெண் மணமாகும் வரை தாய் தந்தையர்களுக்கு பணிவிடை செய்தும், மணமான பின் கணவனுக்கு பணிவிடை செய்தும், அதன் பின் மரணம் வரை குழந்தைகளுக்கு பணிவிடை செய்தும் வாழ வேண்டும் என்று கட்டாயப்படுத்துகின்றது.  ஏராளமான மனைவியருடன் வாழ்ந்த தசரதரையும், அர்சுனனையும், கிருஷ்ணரையும் போற்றிப் பாடும் நம் புராணங்களும், சில காலம் சிறைவைக்கப்பட்ட சீதையின் கற்பைச் சந்தேகித்து, நிறைமாத கர்பிணியான அவர் கானகத்திற்கு அனுப்பப்பட்டதை ஆமோதிக்கத்தானே செய்கின்றன! இப்படி, எக்காலத்திலும் ஆணுக்கொரு நீதி, பெண்ணுக்கொரு நீதிதான் உலகெங்கிலும் வழங்கப்பட்டு வந்திருக்கிறது.

இப்போது பெண்கள் சம உரிமை பெற்று சாதனை புரிந்து வாழும் மேலை நாடுகளில் கூட, கடந்த ஓரிரு நூற்றாண்டுகளுக்கு முன்பு வரை பெண்களுக்குச் சம உரிமை வழங்கப்படவில்லை. 19ஆம் நூற்றாண்டில் இங்கிலாந்தைச் சேர்ந்த ஜேய்ன் ஆஸ்டின் (Jane Austen) எனும் முதல் நாவலாசிரியை, நீண்டகாலம், தான் ஒரு பெண் என்பதை மறைத்து வைத்துத்தான் தன் புதினங்களை (Pride and Prejudice) எழுதிவந்தார்.  மறைந்த விண்வெளி வீராங்கனை கல்பனா சாவ்லா, பெண்களுக்குச்  சுதந்திரம் வழங்கும் அமெரிக்கா சென்றுதான் தன் லட்சியத்தை நிறைவேற்றினார்.  பஞ்சாப் பொறியியல் கல்லூரியில், ஆண்கள் மட்டும் பயின்றுவந்த ஏரோனாட்டிக்கல் பொறியியல் துறையில் சேர அவர் நீண்ட போராட்டமே நடத்த வேண்டியிருந்தது.

எனவே, பெண்களுக்குக் கல்வி அறிவு பெற தடைவிதிக்கும் இது போன்ற செயல்கள் எங்கு நடந்தாலும், எதன் பெயரால் யார் செய்தாலும் அது கண்டனத்திற்குரியதே.  அதை, சாதி, மதம், இனம், மொழி, நிறம் என்று வேற்றுமை பாராமல் எல்லோரும் ஒருங்கிணைந்து எதிர்த்துக் குரல் கொடுத்து ஆவன செய்தால் கண்டிப்பாக மாற்றம் வரும். பெண்கள் சம உரிமை பெற உதவ வேண்டும்! மட்டுமல்ல, கடத்தப்பட்ட மாணவியரைத் தீவிரவாதிகளிடமிருந்துக் காப்பாற்றினால் மட்டும் போதாது, அவர்களிடமிருந்து இஸ்லாம் மதத்தையும் மாசுபடாமல் காப்பாற்ற வேண்டும்! இந்து மதமும், கிறித்தவ மதமும் புரோகித வர்க்கத்தால் பலவீனப்படுத்தப்பட்டது போல், “போக்கோ ஹராம்” போன்ற தீவிரவாத இயக்கத்தால், உலகிலுள்ள மற்ற மதங்களைப் போல் அதிக காலம் உயிர் வாழ வேண்டிய இஸ்லாம் மதம் பலவீனம் அடைந்துவிடக் கூடாது.  பெர்ட்ரன்ட் ரஸ்ஸலின் கருத்துப்படி மதங்களின் ஆயுள் கூடிப்போனால், 5000 வருடங்கள் என்பதை இங்கு நினைவு கூறுவோம்!

கின்னஸ் ரெக்கார்டுக்குச் சமமான,......ஆனால் வித்தியாசமான பயணம்!

      திரைப்படங்களில் கதாநாயகர்களும், வில்லன்களும் ரயிலுக்கு அடியில் ஊர்ந்து சென்றுத் தங்களது எதிரிகளுடன் போராடுவதையும், எதிரிகளிடமிருந்துத் தப்பிச் செல்வதையும் பார்த்திருக்கின்றோம். அவை எல்லாம் திரைப்படங்களில் வந்தக் காட்சிகள்.  அவற்றை எல்லாம் திரைப்பமாக்க எவ்வளவோ பாதுகாப்பான நடவடிக்கைகள் எடுத்த பின் படமாக்கப்பட்டவை.  அதில் கொஞ்சம் கடினமான வேலைகளைச் செய்ய சாக்சம் புரியும் டூப் நடிகர்கள் இருந்திருப்பார்கள்.  ஆனால், அவர்கள் கூட ஏராளமானத் தற்காப்பு முறைகளின் உதவியுடன்தான் அது போன்ற காட்சிகளில் நடித்திருப்பார்கள்.

     ஆனால், உயிருக்குப் பயந்து ஒரு மனிதன் வேறு வழியின்றி புகைவண்டியின் சக்கரங்களைப் புகைவண்டியின் பெட்டியுடன் இணைக்கும் ஃபௌண்டேஷனுக்கும் (வீல் செட்), புகைவண்டிப் பெட்டியின் அடித் தட்டிற்கும் இடையே உள்ள ஒரு சிறிய இடைவெளியில் நுழைந்து படுத்த படி நீண்ட 4 மணி நேரம், எர்ணாகுளத்திலிருந்து திருவனந்தபுரம் வரை, வஞ்சிநாடு விரைவு வண்டியில் பயணம் செய்திருக்கிறான்.  பாவம்!..... ஏதோ ஒரு வேகத்தில் எடுத்த முடிவாக இருந்தாலும், இடையே அங்கிருந்துவெளியே வர முடியாத நிலையில், மனம் மற்றும் உடல் வலுவிழந்த நிலையில், வேகமாகப் புகைவண்டி ஓடிய பொழுது உண்டாகும் தூசியைச் சுவாசித்ததாலும், தொடர்ந்து இடைவெளி இல்லாமல் 4 மணி நேரம் தன் உடல் மேலும், கீழும் உள்ள சூடான இரும்புத் தட்டில் அடி பட்டதனாலும், தளர்ந்த அம்மனிதன் திருவனந்தபுரத்திற்குப் புகைவண்டி சென்றடைந்த பின்னும் 1 மணி நேரம் வரை அசைவின்றி மயங்கிய நிலையிலேயே கிடந்திருக்கின்றான்.

     இப்படிப்பட்ட, யாருமே சிந்தித்துக் கூடப் பார்க்க முடியாத ஒரு பயணம்!  எந்த நிமிடத்திலும் தெரித்து புகைவண்டிக்கும், தண்டவாளத்திற்கும் இடையே சிக்கி, உடல் பல துண்டுகளாகச் சிதைந்து போகக் கூடிய வாய்ப்புள்ள பயணம்!  இப்படிப்பட்டப் பயணத்தை மேற் கொள்ள வேண்டி வந்த அந்த பரிதாபத்திற்கு உரிய 23 வயது இளைஞனின் பெயர் டியோல் பதமட்டாரி.  அஸ்ஸாமிலுள்ள தலபாரி மாவட்டத்திலுள்ள பக்னாரி எனும் இடத்தைச் சேர்ந்தவர்.  எர்ணாகுளதிலிருந்து தன் நண்பர்களுடன் திருவனந்தபுரத்திற்குப் புகைவண்டி ஏற வந்த இவர், தன் நண்பர்களுடன் எதிர்பாராத விதாமாகச் சண்டையிட வேண்டியதானது.  அவர்களுடன் சேர்ந்து பயணம் செய்வதற்குப் பயந்து, இந்த முடிவிற்கு வந்திருக்கிறார்.  புகைவண்டி ஓடத் தொடங்கியதும்தான் பாவம், அதிலுள்ள ஆபத்தை உணர்ந்திருக்கின்றார்.  உணர்ந்த போதோ ஒன்றும் செய்ய இயலாத நிலை.  அப்படியே மயங்கிக் கிடந்திருக்கிறார்.

     திருவனந்தபுரம் சென்ட்ரல் புகைவண்டி நிலையத்தை அடைந்து, ஒரு மணி நேரத்திற்குப் பின், புகைவண்டிப் பெட்டிகளைச் சுத்தம் செய்ய “யார்டுக்கு”, வண்டியைக் கொண்டு சென்ற போதுதான் ப்ரேக்கை விடுவிக்க, ரயில் பெட்டிக்கு அடியில் சென்ற ஒரு மெக்கானிக் ரயில் சக்கரத்திற்கு மேலாக ஒரு “காலை”க் கண்டிருக்கின்றார்.  இப்படிச் சுத்தம் செய்யும் போது, மனித மற்றும் மிருகங்களின் உடல் பாகங்கள், புகைவண்டிச் சக்கரங்களின் மேல் பகுதிகளில் சிக்கியிருப்பது இடையிடையே நடக்கும் ஒன்றானதால் அவர் “அதை” அங்கிருந்து கீழே தள்ளி விட முயன்றிருந்திருக்கிறார்.  ஆனால், திடீரென அந்தக் கால் உள்ளே இழுக்கப்பட்டதும் பயந்து போன அவர், கூச்சல் போட்டு மற்ற தொழிலாளர்களை வரவழைத்து பரிசோதித்த போதுதான், உள்ளே ஒரு மனிதன் சிக்கிக் கிடப்பதைக் கண்டிருக்கிறார்கள்.  எப்படியோ, எல்லோரும் மிகவும் கஷ்டப்பட்டு கரியின் தூசும், கிரீசும் நிறைந்து தீக்காயங்களுடன் கூடிய ஒரு கரிக்கட்டை மனிதனைப் போல தோற்றம் அளித்த பதமட்டாரியை வெளியே எடுத்து புகைவண்டி நிலைய காவல்துறையினரின் உதவியுடன் அவரை மருத்துவமனைக்குக் கொண்டு சென்றிருக்கிறார். இறையருளால், பதமட்டாரி குணமாகி வருகின்றார்.

     இந்தச் சம்பவம், ரயில்வே துறைக்கு வேறு ஒரு பிரச்சினையை உண்டாக்கி இருக்கிறது.  இனி ரயில் பெட்டிகளின் அடிபாகத்தையும், புகைவண்டி புறப்படும் முன் பரிசோதிக்க வேண்டும் என்ற நிலை.  முன்பு எப்போதோ, ஆந்திராவிலிருந்து வந்த ஒரு புகைவண்டியின் பெட்டியின் அடியிலுள்ள இப்பகுதியில் கஞ்சா வைத்துக் கடத்தப்பட்டிருக்கிறதாம்.  இப்போது இதைப் பற்றி அறியும் தீவிரவாதக் கும்பல்கள் இந்த இடத்தை உபயோகித்து, தீவிரவாதச் செயல்கள் செய்ய வாய்ப்பு உள்ளதால் இனி ரயில் பெட்டிகளின், அடி, முடி, உள் இப்படி எல்லா பாகங்களையும் பரிசோதித்தே ஆக வேண்டும் என்ற கட்டாயம் இப்போது ரயில்வே துறைக்கு இதனால் ஏற்பட்டுள்ளது.  கவனமாக இருக்கத்தான் வேண்டும்!

                           

ஒரு மனிதன் (ஒரு ஓட்டு)?!......இரு கால்கள்.........இரு தோணிகள்....!!!?????

திரு.N.R./ N. ரங்கசாமி         திரு நாராயணசாமி

 சாமிகள் தான் வரம் கொடுக்கும்.  ஆனால் இங்கு, பாண்டிச்சேரியில் எந்த சாமிக்கு தாங்கள் கொடுத்த வரம் கிடைக்கப் போகின்றது என்று மே 16ஆம் தேதி, பாண்டிச்சேரி மக்கள் அனைவரும் டி.வி. முன், பரபரப்புடன் அமர்ந்திருந்ததைக் கண்டோம்.  

  

 நாம் சமீபத்தில் எடுத்த "பரோட்டா கார்த்திக்”கின் ப்ரிவியூ ஷோவை, பாண்டிச்சேரியில், அரசாங்கப் பள்ளியில் திரையிடும் முன், அதற்கு முன் எடுக்கப்பட்ட “பரோல்” குறும்படத்தை ஒரு முன்னோட்டமாகத் திரையிட்டு, மாணவர்களுடன் ஒரு உரையாடல் நிகழ்த்திப் பார்க்கலாமே என்ற எண்ணத்துடன், பாண்டிச்சேரி கல்வித் துறையின் இணை இயக்குனர் அவர்களைச் சந்தித்து அனுமதி பெற வேண்டி, (அது ஒரு பெரிய Procedure. அதாவது, படம் திரையிடும் நோக்கம், என்ன செய்ய விழைகின்றோம் என்பதை எழுத்துப் பூர்வமாகத் தெரிவித்து, அத்துடன் சிடி யைக் கொடுத்து, சென்சார் போர்ட் அதைப் பார்த்து படம் திரையிடத் தகுதி பெற்றதா என்ற “No objection” சான்றிதழ் பெற்ற பிறகே, அனுமதி வழங்கப்படும்) சென்றிருந்த போது, அன்று நாம் கண்ட பாண்டிச்சேரி மக்களின் உணர்வு பூர்வம் தான் இந்தப் பதிவு.

திரு. ராதாகிருஷ்ணன்

 

எங்களுக்கும் ஆர்வம் தொற்றிக் கொண்டது, எந்த சாமிக்கு மக்கள் வரம் அருளியுள்ளார்கள் என்று அறிந்து கொள்ள.  விஷ்ணுவின் பெயர்களில் இரண்டைத் தாங்கி நிற்கும் இரண்டு சாமிகளுக்கும் – அதாங்க N.R என்று அழைக்கப்படும் “ரங்க", “நாராயண" "சாமி”களுக்கு மக்கள் அருளியது யாது என்று!  பாண்டி முதல்வர் ரங்கசாமியா நின்றார் என்று நீங்கள் வியப்பது புரிகின்றது!  அவர் நிற்கவில்லைதான். அவரது கட்சியான N.R. காங்கிரஸைச் சேர்ந்த, முதல்வருக்கு நெருக்கமான,  பாரம்பரிய குடும்பத்தைச் சேர்ந்த, மக்களிடம் நல்ல வரவேற்பு பெற்றிருக்கும் திரு. ராதாகிருஷ்ணன் தான் நின்றார்.  ஆனால், ராதாகிருஷ்ணனை அன்று தொலைக்காட்சியில் பார்க்க முடியவில்லை! மக்களும் அவரைப் பற்றிப் பேசவில்லை!  எல்லாமே N.R. மயம்தான்.

 

ஊடக நண்பரிடமிருந்து 11 மணியளவில் ஒரு செய்தி வந்தது.  திரு நாராயணசாமிதான் முன்னிலையில் இருப்பதாக. ஊடகச் செய்தியாயிற்றே! அதுவும் நண்பரிடமிருந்து! அடுத்த 45 நிமிடத்தில் சரவெடி காதைப் பிளந்தது.  எங்களுக்கு ஆச்சரியம்!  ஏனென்றால், நாங்கள் இருந்த முத்தரையர்பாளையம் ஏரியா, முதல்வர் ரங்கசாமியின் ஏரியா.  அவர் இருப்பது அதே பகுதியில் திலாசுப்பேட்டை என்ற ஏரியாவில், அதாவது ராஜீவ் காந்தி சிலையிலிருந்து பிரிந்து செல்லும் வழுதாவூர் ரோடில். அவர் சர்வ சாதாரணமாக அருகே உள்ள சிறிய டீ கடையில், பெஞ்சில் அமர்ந்து டீ குடிப்பதை நாங்கள் பார்த்திருக்கின்றோம்!  அப்படி இருக்க, நாராயணசாமிக்குச் சரவெடியா? இங்கு? சந்தேகம் தலைக்கேறியது! அதை நிவர்த்தி செய்து கொள்ள -இல்லையென்றால் சிந்து பைரவி திரைப்படத்தில் வரும் ஜனகராஜின் தலை வெடித்துவிடுவது போல காண்பிக்கப்படுமே அது போன்று எங்கள் தலையும் சூடாகியது -  வீட்டை விட்டு வெளியில் வந்து ரோட்டில் நடந்தோம்.  ரோட்டில் போவோர், வருவோர், வாகனங்கள், பேருந்து, லாரி முதற்கொண்டு நிறுத்தப்பட்டு இனிப்புகள் வழங்கப்பட்டது. அதற்குள் முழு முடிவுகள் வெளியாகிவிட்டதா என்ற அடுத்த ஆச்சரியத்தில் எங்கள் புருவங்கள் உயர்ந்தன!  எனவே அங்கு பாதுகாப்பிற்காக நின்ற போலீசாரிடம் விசாரித்தோம்! 

“என்னது?! நாராயணசாமியா?...இல்ல....இல்ல......ரங்கசாமிதான் ஜெயிச்சுகிட்டுருக்காரு....”

“இல்லைங்க இப்பதான் கொஞ்ச முன்னாடி ஊடக நண்பர் சொன்னாரு நாராயணசாமி முன்னிலைலனு...அதாங்க”

“அதெல்லாம் சும்மா.....அப்படித்தான் சொல்லுவாங்க....”

நின்றது திரு. ராதாகிருஷ்ணன்.  ஆனால், தேர்தல் முடிவுகள் வெளிவந்து அறிவிக்கப்படும் முன்னரேயே தொண்டர்கள் அனைவரும் இனிப்புகள் வழங்கி, ரங்கசாமியின் உருவப்படத்தைத்தான் உயர்த்திப் பிடித்துக் கொண்டிருந்தனர்.  இனிப்புகள் பல ஏரியாக்களிலும் வழங்கி, மேளதாளத்துடன், சினிமாப் பாடல்களுக்கு நடனம் புரிந்து, ட்ராஃபிக் ஜாம் உருவாக்கி மகிழ்ந்தனர்!

“அப்பா பைத்தியம் சாமி” (இதுவும் சாமி) சித்தரின் பக்தராகிய ரங்கசாமி (இதுவும் சாமிதான்) பாண்டியில், கோரிமேட்டில், இந்த சித்தருக்காகக் கட்டியிருக்கும் கோவிலுக்குத் தினமும் இரவு 9 மணிக்கு மேல் வருகை புரிந்து, பூஜை செய்து, அன்னதானம் செய்வது வழக்கமாம்.  அந்த “சாமிதான்” இந்த சாமிக்கு வரம் கிடைக்க அருளப் பெற்றாரோ?!!! அப்படித்தான் இந்த சாமி சொல்கின்றார்.

   தேர்தல் கமிஷனின் கெடுபிடிகளையும் மீறி, பணம் நிறைய கொடுக்கப்பட்டதாக அறிந்தோம்! எப்படியோ, ரங்கசாமி/ராதாகிருஷ்ணன் அவர்களுக்கு மக்களிடமிருந்து வரம் கிடைத்துவிட்டது! மக்களுக்கு ரங்கசாமி மேல் மிகுந்த நம்பிக்கை போலும்!  ஒரு தனி மனிதருக்கு, அதுவும் ஒரு அரசியல்வாதிக்கு இத்தனை ஆதரவா என்று! எங்களுக்கு மிகுந்த ஆச்சரியம்! அப்படித்தான் தெரிந்தது! சென்ற பாண்டிச்சேரி சட்டசபைத் தேர்தலுக்கு தொண்டர்களால் வைக்கப்பட்ட கட்-அவுட்களும், இப்போது மக்களிடம் பேசிய போது, ரங்கசாமி பல நன்மைகள் செய்திருப்பதாகவும், அவர் தவறே செய்திருந்தாலும், மக்களுக்கு நல்லதும் செய்கின்றார் என்றும் அதனால்தான், திரு ராதாகிருஷ்ணன் அவரது கட்சி என்பதால் தான் ஓட்டுப் போட்டோம் என்றும் பெரும்பான்மையான மக்கள் திரு. ரங்கசாமிக்கான ஆதரவை வெளிப்படையாகவே பேசுகின்றனர், சாதாரண மக்களும் சரி, படித்தவர்களும் சரி! இந்த சாமி, இப்படித் தன் மீது மிகுந்த பாசமும், நம்பிக்கையும் வைத்திருக்கும் பாண்டிமக்களுக்காக, மத்தியில் தனது M.P. ராதாகிருஷ்ணனைப் பேசவைத்து, மக்கள் அருளிய வரத்தை இருமடங்காக/பலமடங்காகத் திருப்பிக் கொடுப்பாரா?! பார்ப்போம் பொறுத்திருந்து!

இதில் ஒரு வேடிக்கை! பாண்டிச்சேரி வரைபடத்தைப் பார்த்தவர்களுக்கும், பாண்டியில் இருந்தவர்களுக்கும் இந்த வேடிக்கைத் தெரிந்திருக்க வாய்ப்புண்டு! நாம் பேருந்தில் பயணித்தால், நேர் ரோடிலேயே, பாண்டிச்சேரி நெருங்கும் சமயம் “பாண்டிச்சேரி எல்லை வரவேற்கின்றது” என்ற வாசகத்தைக் காணலாம்.  சிறிது தூரம் சென்றதும், “தமிழ்நாட்டு எல்லை, காஞ்சிபுரம் மாவட்டம், ஊராட்சி ஒன்றியம் வரவேற்கின்றது” என்ற வாசகத்தைக் காணலாம். சற்று தூரம் சென்றதும், “தமிழ் நாட்டின் நன்றி” உரையைக் காணலாம். சற்றுத் தூரம் கடந்ததும், உங்களை விழுப்புரம் மாவட்டம் வரவேற்கும். 2 கி.மீ. தூரம் கூட கடந்திருக்கமாட்டீர்கள், விழுப்புரம் நன்றி சொல்லும்.....பாண்டி எல்லை வரவேற்கும். இப்படித் தமிழ்நாடும், பாண்டியும் மாறி, மாறி வரவேற்கும் நீங்கள் எந்தத் திசையில் பயணித்தாலும்!

பல இடங்களில், மக்கள் நெரிசலாக வாழும் பகுதிகளிலேயே ஒரு தெரு தமிழ் நாட்டு எல்லைக்குள்ளும், அடுத்த தெரு பாண்டிச்சேரி எல்லைக்குள்ளும் இருக்கும்!  இன்னும் ஒரு வேடிக்கை என்னவென்றால், கோரிமேட்டில் உள்ள ஒரு பகுதியில், ஒரு வீடு இரண்டு திண்ணைகளைக் கொண்டது.  அந்த வீட்டை இரண்டாகப் பிரித்தால் ஒரு பகுதி, ஒரு திண்ணை தமிழ்நாட்டைச் சேர்ந்தது.  மற்றொரு பகுதி பாண்டியைச் சேர்ந்தது! அது சரி, தெருவில் தண்ணீர் குழாய் இது போன்று இருக்கின்றது.....தண்ணீர் பிரச்சினை?!!!  அதில் வசிக்கும் அந்தக் குடும்பம் ஒரு கால் தமிழ்நாட்டிலும், மற்றொரு கால் பாண்டியிலுமாக, இரண்டு ரேஷன் கார்டுகளுடன் வாழ்கின்றார்கள்! அப்படியென்றால் ஓட்டு? அதுவும் அப்படித்தான் இருக்குமோ?  அங்கு ஏதோ ஒரு சாமிக்கும், இங்கு தமிழ் நாட்டிலும் போட்டிருப்பார்களோ?  அப்படித்தான் கேள்விப்பட்டோம்!  இது எப்படி இருக்கு??!  அது சரி...ஒரு பெரிய சந்தேகம்!  இந்தப் பகுதிக்கு வேட்பாளர்கள் ஓட்டு கேட்க வந்திருப்பார்களா? வந்திருந்தால் எப்படிக் கேட்டிருப்பார்கள்?! தமிழ்நாட்டு வேட்பாளரும், பாண்டிச்சேரி வேட்பாளரும் குழம்பித் தலைமுடியைப் பிய்த்துக் கொண்டிருப்பார்களோ?!!!!! ஒரு குடும்பத்தின் ஓட்டு என்றால் சும்மாவா?!!

                                                                        

பாண்டிச்சேரி முதல்வர் திரு.ரங்கசாமியோ, அம்மாவோ இதைக் கவனித்தார்களா/கவனிப்பார்களா? இல்லை இது தங்களுக்கு ஆதாயம்தானே என்று கண்டு கொள்ளாமல் இருக்கின்றார்களோ?  அப்படி என்றால் தேர்தல் ஆணையம் இதற்குப் பொறுப்புதானே? இது போன்ற இரு மாநில எல்லை வாசிகளின் குழப்பத்தைப் போக்கத்தான் Smart Card என்று ஒன்று வந்ததே!  என்னாயிற்று?  என்ன பிரயோசனம்? பதில் யாரிடம் உள்ளது?!