ரங்கனதிட்டு பறவைகள் சரணாலயம் - ஸ்ரீரங்கப்பட்டினம் கோயில் - பயணம் - 3

படங்கள் போட்டு விவரங்கள் எழுதினால், இப்படி எத்தனை பகுதிகள் போகும் என்று!! ஹாஹாஹா! சத்தியமாக எனக்குத் தெரியலைங்க பதிவு எப்படி எழுதுவது என்று! நம் கமலாக்கா, கோமதிக்கா ஆசையோடு படங்களைப் பார்ப்பார்களே என்றும், இடங்களைப் பார்க்கும் வாய்ப்பு கிடைக்காதவர்கள் இப்படியேனும் பார்த்துக் கொள்ளலாமே என்றும் எனக்குத் தெரிந்ததை, நான் பார்த்தவற்றை எல்லாம் பகிர வேண்டும் என்ற ஆவலில், ஆர்வத்தில், பதிவுகள் கொஞ்சம் நிறைய பகுதிகளாகப் பிரித்துப் போடும்படி ஆகிவிடுகிறது.  அதனால் பறவைகள் பகுதி வர தாமதமாகிறது.

இதோ இந்த இடத்துக்குத்தாங்க நாம போகணும். இந்த இடம் பற்றிய தகவல்களை அடுத்த பகுதியில் சொல்கிறேன். டிக்கெட் எடுக்க வேண்டாமா? வாங்கிவிட்டு அப்படியே படகுத்துறைக்குப் போகும் வழியில் இருப்பதைப் பார்த்துக் கொண்டே போவோம். 

இப்பதிவில் படங்களோடு, அதன் கீழே விவரங்களோடு சொல்லிப் போகிறேன். பதிவு பெரிதாகிவிட்டது! அடிக்க வராதீங்க  நான் கொஞ்சம் நேரம் மறைந்து இருக்கிறேன்!!!!!

முந்தைய பதிவில் நாம் உள்ளே செல்லும் நுழைவு வாயில் வரை சொல்லியிருந்தேன், இல்லையா இப்ப உள்ளே போவோம் வாங்க. 

வண்டிகள் நிறுத்துவதற்குத் தாராளமாக இடம் உள்ளது. நாங்க போனப்ப கூட்டமே இல்லையாக்கும்! பல இடங்களிலும் இப்படி அறிவுறுத்தல் பலகைகள் இருக்கின்றன. 

பார்க்கிங்கை ஒட்டியே முகப்புப் பகுதி. ரங்கனதிட்டு அமைப்பின் படம், நுழைவுச் சீட்டு மற்றும் படகுச் சவாரிக்கான டிக்கெட் வாங்கும் இடம், 

கட்டணம் பற்றிய தகவல்கள் பலகை - நுழைவுச் சீட்டு, நபர் ஒருவருக்கு ரூ 75. படகுச் சவாரிக்குக் கட்டணம் தனி. நபர் ஒருவருக்கு ரூ 100.  இது பொதுப்படகு. தனிப்படகுக் கட்டணம் 4-6 பேருக்கு ரூ 1500. படகில் செல்வது பற்றியான சில பரிந்துரைகளை, என் அனுபவத்தில் உணர்ந்ததை, டிப்ஸாக அடுத்த பகுதியில் படகில் ஏறும் போது சொல்கிறேன்.

ரங்கனதிட்டு உருவாகிய தகவல்கள் (நான்காவது படம் இடப்பக்கம் -தகவல்களை அடுத்த பதிவில் சொல்கிறேன் இப்பதிவு பெரிதானதால்.) சலீம் அலி தகவல் மையம் இவைதாங்க முகப்பு. 

நுழைவுச் சீட்டு பெற்றுக் கொண்டு படகுத் துறைக்குச் செல்லும் நுழைவு வாயிலுக்குப் போகும் முன் இந்த முதலை வாயெல்லாம் பல்லாக வாய்திறந்து, வாயார வாங்க வாங்கன்னு நம்மை வரவேற்குது பாருங்க!

முதலையைக் கடந்து படகுகுத் துறைக்குச் செல்லும் நுழைவுவாயில் (காணொளியில்) அங்கிருக்கும் காவலர் நம் உடைமைகளைச் செக் செய்யும் போதே, பேகில் சாப்பாடும் தண்ணீரும்தான், நாங்க உள்ளே சாப்பிட மாட்டோம், விதிமுறைகள் தெரியும் என்றதும் சிரித்துக் கொண்டே அனுப்புகிறார், 

https://youtube.com/shorts/Y03eeVhUy7Q

வாங்க என்னோடு, நாம் படகுத் துறைக்குச் செல்ல உள்ளே சென்றதும் போகும் போது இதை எல்லாம் பார்த்துக் கொண்டே செல்லலாம். 

இடப்புறம் உள்ள படத்தில் அழகான???? தாமரைக்குளம்?? நம்மை வரவேற்கிறது! ஆனால் தாமரைகளைத்தான் காணவில்லை. ஆற்று நீர்தான். காய்ந்த நாணல் புற்கள் கிடந்தன. அந்தப் பக்கம் காவிரி. இந்தக் குளத்திற்கு எதிரில் ஓர் அழகான ஆலமரம் இருக்கிறது. அதைக் காணொளியில் பார்க்கலாம். இங்குள்ள பாதை வழியாகவும் படகுத் துறைக்குச் செல்லலாம். ஆனால் நாம் இப்ப இக்குளத்தின் இடப்புறம் வழியாக கொஞ்சம் மேலே... இங்கே வலப்புறம் உள்ள படத்தில் மஹாராஜா கோபுரத்திற்கு வழி என்று போட்டிருக்கு தெரியுதா? அதைப் பார்க்கப் போகிறோம். 

கோபுரத்திற்குச் செல்லும் வழியில் சலீம் அலி அவர்களின் அழகான வரிகள். (இடப்புறம் உள்ள படம்) பறவைகளைப் பார்த்து பிழைப்பு நடத்த முடியாது என்று மக்கள் நினைக்கிறார்கள். அது ஒருவேளை உண்மையாக இருக்கலாம், ஆனால், மனிதன் வாழ்வதற்குச் சாப்பாடு மட்டும் முக்கியமில்லை என்பதும் உண்மை. எத்தகைய பொழுதுபோக்குகளும் இல்லாமல், தங்கள் நேரத்தையெல்லாம் பிழைப்புக்காக மட்டுமே செலவிடும் மக்கள், 60 வயதிற்குப் பிறகு, பணி ஓய்வு பெறும்போது, தங்கள் முழு நேரத்தையும் என்ன செய்வது என்று தெரியாமல், கடிகாரத்தைப் பார்ப்பதில் மட்டுமே செலவிடுகிறார்கள்! பறவைகளைப் பார்ப்பது போன்ற ஒரு பொழுதுபோக்கை அவர்கள் வளர்த்துக் கொண்டிருந்தால், ஒருவேளை அவர்கள் தங்கள் ஓய்வூதியத்தை அனுபவிக்க நீண்ட காலம் வாழநேரிடலாம்." - சலீம் அலி.

மேலே வலப்பக்கப் படத்தில் ரங்கனதிட்டு பறவைகள் சரணாலயத்தின் மகாராஜா கோபுரத்தின் சிறிய வரலாறு சொல்லும் பலகை. இதோ கீழே அந்த கோபுரம் படம். 

                                         இப்படம் இணையத்திலிருந்து - நன்றி

ராஜா ஸ்ரீ ஜெய சாமராஜேந்திர உடையார் (1950-1971) ஆட்சியின் போது கட்டப்பட்ட, இந்தோ-சாராசெனிக் அமைப்பு. (இந்தோ-சாராசெனிக் கட்டிடக்கலை என்பது பிரிட்டிஷ் ஆங்கிலேயர் நம்மை ஆண்ட காலத்தில் இந்தியாவில் தோன்றிய ஒரு தனித்துவமான கட்டிடக்கலை பாணி என்று விக்கி சொல்கிறார்).

    இப்படமும் இணையத்திலிருந்து - நன்றி      

20 அடி உயரம். இந்தக் கோபுரம் பல்வேறு கட்டிடக்கலை பாணிகளைக் கலந்து மிகவும் திறமையாகக் கட்டப்பட்டுள்ளதாக அங்கு குறிப்பிடப்பட்டுள்ளது. கோபுரத்தின் உச்சியில் அழகான வளைவுகளுடன் இருக்கும் கூம்பு, அக்மார்க் தேக்கு மரத்தில் செதுக்கப்பட்டுள்ளதாம். (கேரளத்தில் இப்படியான கூரைகளைப் பார்க்கலாம் உள் அமைப்பு. நான் பாலக்காடில் பார்த்த ஒன்றை முன்பு பகிர்ந்திருக்கிறேன்) சுவர்கள் கல்லால் ஆனவை. இந்த எண்கோண வடிவத்தில் உள்ள கோபுரத்தில் நான்கு திறந்த வாயில்களும், மற்ற நான்கிலும் திண்டுகள் போன்று உட்கார்ந்து கொள்வதற்கு ஏதுவாகவும் கட்டப்பட்டிருக்கின்றன. இந்த கோபுரம் அரச குடும்பத்தினர் அமர்ந்து பறவைகளைப் பார்க்க பாதுகாப்பாக அமைக்கப்பட்டதாம். பறவைகள் பார்ப்பதில் மட்டுமல்ல, அந்தப் பகுதியின் பாதுகாப்பிற்கும் இக்கோபுரம் பயன்படுத்தப்பட்டதாகத் தகவலில் குறிப்பிடப்பட்டிருக்கிறது.

மஹாராஜா கோபுரத்தின் அருகில் (வலப்புறம் படம்) பார்வையாளர்கள் கோபுரம். நாம் அங்கு ஏறி ரங்கனதிட்டு பகுதி முழுவதையும் பார்க்கலாம். அது காட்டுப்பகுதி என்ற பலகை இருந்ததோடு அங்கு மரக்கிளைகள் வளர்ந்திருந்தன. இந்தக் கோபுரத்தில் ஏறவில்லை. 

காரணம் இக்கோபுரத்தைச் சுற்றி வளைத்து உட்பக்கம் எல்லாம் படம் எடுக்க கோணம் பார்த்துக் கொண்டிருந்த போது அங்கு விளையாடிக் கொண்டிருந்த இரு குழந்தைகள் ஓடி வந்து என் மீது மோதியதில் நான் கீழே விழ, என் மொபைல் தெரித்து விழுந்து பேட்டரி வெளியில் வந்துவிட்டது. நல்ல காலம், கொஞ்சம் உட்கார்ந்து எழுந்ததும் எனக்குச் சரியானதோடு, மொபைலும் உடையவில்லை. அதனால் படங்கள் சரியாக வராததால் அந்த இரு படங்களும் இணையத்தில் இருந்து எடுத்தேன்.

https://youtube.com/shorts/mlp8Py0Hml0

இப்பகுதியைத் தொகுத்து ஒரு சின்ன காணொளி - ஷார்ட்ஸ்

மஹாராஜா கோபுரப் பகுதியிலிருந்து காட்சி

மஹாராஜா கோபுரப் பகுதியிலேயே அமைந்திருக்கும் பால்கனி போன்ற வியு பாயின்டிலிருந்து நதியையும் படகுகள் செல்வதையும், சிறிய தீவுகளையும் அங்குமிங்கும் பறந்து கொண்டிருந்த பறவைகளையும்  பார்த்து ரசித்துவிட்டு (காணொளி) அங்கிருந்தே படகுத் துறைக்குச் சென்றுவிடலாம். செல்லும் வழியில் அழகான பூங்காக்கள் மற்றும் ஆங்காங்கே பறவைகள் பற்றிய குறிப்புகள் தாங்கிய பலகைகள். 4, 5 படங்கள்தான் அதைத் தொகுத்துக் கொடுத்திருக்கிறேன் கீழே.

ஒரு வழியாகப் படகுத் துறைக்கு வந்து சேர்ந்தாச்சு.

படகில் ஏறும் முன் ஜாக்கெட் கண்டிப்பாக அணிய வேண்டும். அதைத் தொட்டுப் பார்த்ததும் பிசுபிசுப்பாக இருந்ததால் எனக்கு அதை எடுத்து அணிய என்னவோ போல் இருந்தது. சுத்தமாக இல்லை. ஆனால் அணியாமல் படகில் ஏற முடியாது என்பதால் இருப்பதில் கொஞ்சம் ஒகே என்று தோன்றியதை அணிந்து கொண்டேன். எல்லோரும் தயாராக இருங்க. அடுத்த பகுதியில் படகில் உலா வருவோம். 

----கீதா