சில்லு சில்லாய் - 11 - (Reed Bed) இயற்கை நாணல் படுகை/சம்பு (Narrow Leaf Cattail) – புள்ளி மூக்கு வாத்து (Indian Spot Billed Duck) - ஹோக்கர்கார் (Hokersar) சதுப்பு நிலம்

சில்லு – 1 (Reed Bed) நாணல் படுகை/சம்பு (Narrow Leaf Cattail-Typha) – புள்ளி மூக்கு வாத்து (Indian Spot-Billed Duck)

நாணல் என்பது பேரினங்களைச் சேர்ந்த தாவரங்களுக்கான பொதுப்பெயர். கோரை என்றும் சொல்லப்படுவதுண்டு. நாணல் படுகைகள் என்பது நாணல்களால் நிறைந்து இருக்கும் நீர்நிலைகள் அல்லது சதுப்பு நிலத்தின் ஒரு பகுதி. அவை ஆரோக்கியமான நதி மற்றும் நீர் நிலைகளின் அடையாளம். மீன்கள், முதுகெலும்பில்லாத விலங்குகள் மற்றும் பறவைகள் வாழ்வதற்குச் சிறந்த வாழ்விடத்தை வழங்குகின்றன.

சிறந்த இயற்கை வடிகட்டிகளாக இந்த நாணல் படுகைகள் மூன்று அடிப்படை செயல்பாடுகளைச் செய்கின்றன: (1) கசடுகளை நீக்குகின்றன (2) அதை கனிம மற்றும் மட்கிய கூறுகளாக மாற்றுகின்றன. (3) நீரை ஆக்ஸிஜனேற்றும் போது மாசுகளை நீக்குபவையுமாகவும் செயல்படுகின்றன.

இந்த இயற்கை வடிகட்டிகள் தண்ணீரை சுற்றுப்புறத்திற்குக் குறிப்பாக நீர்ப்பாசனத்திற்கு வெளியேற்றும் முன்  நீரை சுத்தப்படுத்தவும் மேம்படுத்தவும் பயன்படுகிறன. இந்தப் படுகை ஒவ்வொரு நாணலின், பிராணவாயுவை மண்ணிற்குக் கடத்தும் திறனைப் பயன்படுத்திக் கொள்வதோடு கழிவுநீரில் உள்ள அசுத்தங்களை நுண்ணுயிரிகள் உட்கொண்டு ஜீரணிக்க உதவுகிறது.

நீர் மட்டத்திற்கு மேலே சம்பு படுகை உள்ளதில் பிற செடிகள் வளர்ந்திருப்பது தெரிகிறதா

பொதுவாக இந்த நாணல் படுகைகள் வறண்ட நிலத்தை மேம்படுத்துவதோடு  திறந்த நீர்ப்பரப்பு அல்லது ஈரமான நிலத்தில் கொத்து கொத்தாக வளர்கின்றன. நாணல் படுகைகள் வயதாகும்போது, அவை கணிசமான தழை குப்பை அடுக்கை உருவாக்குகின்றன. அந்த தழைகள் அடுக்கு நீர்மட்டத்திற்கு மேலே உயரும் சமயம் புதிய பகுதிகளை உருவாக்கி புதர்கள் மற்றும் மரங்கள் போன்ற பெரிய நிலப்பரப்பு தாவரங்களும் வளர்வதற்கு உதவுகின்றன.

கூடு கட்ட ஏதுவாக படுகைகள் இருந்தாலும் (இப்படமும், கீழே உள்ள படமும்) ஒரு சில பறவைகள் தான் இப்படியான இடங்களில் கட்டுகின்றன. பல பறவைகளும் நீர்த்தாவரப் புதருக்குள் கட்டுவதைத்தான் கண்டேன். பின்ன சுத்தி வட்டமடிக்கும் கழுகுகளிடம் இருந்து குஞ்சுகளைப் பாதுகாக்கணுமே

படுகைகள் நீர் மட்டத்தின் மேலே உயரும் போதும், நாணல் சதுப்பு நிலங்கள் கோடையில் 20 செமீ அல்லது அதற்கு மேற்பட்ட மேற்பரப்பு நீரை கொண்டிருக்கும் போதும் பெரும்பாலும் பறவை இனங்கள் அந்த அடுக்கில் கூடு கட்டி இனப்பெருக்கம் செய்கின்றன. பறவைகள் மட்டுமின்றி சில முதுகெலும்பில்லா விலங்குகள் மற்றும் குட்டி போட்டு வாழும் சிறிய விலங்குகளுக்கும் இவை வாழ்விடமாக அமைகின்றன.

காலநிலை, பருவகால மாறுபாடுகள் மற்றும் நீரில் உள்ள ஊட்டச்சத்துகள் மற்றும் உப்புத்தன்மை ஆகியவற்றைப் பொறுத்து, ஈர நில அமைப்பில் உள்ள இந்த நீர் நிலைகள்/சதுப்பு நிலங்களில் வளரும் தாவர/நாணல் படுகைகள் வேறுபடுகின்றன. நாணல் மற்றும் அதை ஒத்த தாவரங்கள் பொதுவாக மிகவும் அமில நீரில் வளராது. அப்படியான சமயங்களில் அவை அழிவதற்கான வாய்ப்புகள் அதிகம்.

நாணல் படுகைகளின் சிறப்பே நாணல்கள்தான் என்றாலும் இந்த இனத்தைச் சேர்ந்த எல்லா தாவரங்களும், அவை அதிகமாக வளர்ந்தாலும், நாணல் படுகைகளை உருவாக்குவதில்லை. அப்படியான வகைகளின் படுகைகள், பொதுவாக, பராமரிக்கப்படாத ஈரமான புல்வெளிகளிலும் மற்றும் சில வகையான ஈரமான வனப்பகுதிகளிலும் நிலத்தின் அடிமட்டத்தில் உருவாகின்றன.

நீர்த்தாவரங்கள், சதுப்புநிலத் தாவரங்கள், என்ற வகையில் சம்பு/சண்பு/கண்பு எனப்படும் படுகை பற்றித்தான் இங்கு.

நான் பயணம் செய்த இடங்களில் உள்ள சில நீர் நிலைகளில் நாணல் படுகைகள் மற்றும் படத்தில் உள்ள சம்பு நீர்த்தாவரப் படுகையையும் அதில் தாழைக் கோழிகள் இருப்பதையும் கவனித்திருக்கிறேன். அப்போதிலிருந்தே இதைப் பற்றி அறியும் ஆர்வம் தொடங்கினாலும் படங்கள் இல்லாததால் கூகுளில் தேட இயலவில்லை.

இங்கு வந்த பிறகு ஏரிகளுக்கு நடைப்பயிற்சியாகச் சென்ற பொது பல ஏரிகளிலும் இந்த நீர்த்தாவரம் வளர்ந்திருப்பதையும் புதருக்குள் தாழைக் கோழி வகைகள், வாத்துகள் பருவகாலத்தில் கூடு கட்டி அவற்றின் குஞ்சுகளையும் கண்டதும் ஆர்வம் கூடியது. படங்கள் எடுத்திருந்ததால் கூகுளில் தேடியதும் இந்த நீர்த்தாவரப் படுகை பற்றியும் பொதுவாக நாணல்படுகைகள் பற்றிய தகவல்களும் கிடைத்தன.

சம்பு தாவரத்தின் 'இணர்' கம்பின் கதிர் போன்று இருக்கிறது பாருங்க....இரு படங்களிலும். இலைகளின் நடுவில் கொஞ்சம் தடிமனாக ப்ரௌன் நிறத்தில்

இதில் முன்னில் சற்று வளைந்து ஒரு கதிர் தெரிவது உங்களுக்கும் பார்க்க முடிகிறது என்று நினைக்கிறேன்

இதில் கதிர் ஒன்று முற்றி இருப்பது பஞ்சு போன்று உருண்டையாக நடுவில் இருக்கிறது

சம்பு, சண்பு என்றும் பண்டைய இலக்கியங்களில் கண்பு  என்றும் சொல்லப்படுகிறது இந்த வகை நீர்த்தாவரம். இது நீர்நிலைகளிலும், சதுப்புநிலங்களிலும் வளர்கிறது. இதன் ‘இணர்’, கம்பின் கதிர் போன்றது. இதன் இலைகள் 10 அடி வரை வளரும். இதன் தாவரவியல் பெயர் டைபா அங்கஸ்டடா (Typha angustata) 

சம்பு/கண்பு அல்லது எருவை என்று சொல்லப்படும் (படத்தில் இருப்பது) இந்த நீர்த்தாவரம் நீர்ப்பறவைகளுக்குக் கூடு கட்டி இனப்பெருக்கத்திற்குப் பயனுள்ளதாக இருப்பதோடு மனித இனத்திற்கும் மிகுந்த நன்மைகளைத் தருகின்றது. பொதுவாகவே எல்லா நாணல்களின் இளம் இலைகளும் உணவிற்கு உகந்தவைதான் என்றும் சொல்லப்படுகிறது.

இதன் நீண்ட இலைகள்தான் “சம்பு” என்று சொல்லப்படுகிறது. இந்த இலைகளைக் கொண்டு (சம்பு) தட்டிகள், பந்திப்பாய்கள், குடலைகள் செய்வதோடு வீட்டின் மேற்கூரை போன்றவற்றையும் வேய்கின்றனர். அதனால், வெப்ப காலத்தில் அதிக வெப்பத்தைக் கடத்தாமல், குளிர் காலத்தில் அதிக குளிரைக் கடத்தாமல் இதமான வெப்ப நிலையை வீட்டிற்குள் வழங்குமாம். கூடவே  இதன் கதிர், குருத்து எல்லாம் மிகுந்த மருத்துவ குணம் உடையவையாம்.

தகவல்களுக்கு நன்றி – இயற்கை வாழ்வியல் ஆலோசகர் ஞான சுந்தரபாண்டியன்

படுகைகள் இன்னும் உருவாகாத போது...

இப்படி முதிர்ந்த இலைகள் தழைகள் விழுந்து மெதுவாகப் படுகை உருவாகி மறைஞ்சிருக்கு. கூடவே வேறு நாணல் வகைகள் பூக்கொண்டையுடன் வலப்பக்கம் தெரிகின்றன இல்லையா?

ஏரியின் ஓரங்களில் சம்பு எனப்படும் இந்த நீர்த்தாவரத்தைப் பார்க்கலாம். இளம் செடிகளாக படுகை இல்லாமலும், முதிர்ந்து படுகைகளை உருவாக்கிக் கொண்டிருப்பதையும் பார்க்கலாம்.

https://youtu.be/ke0Zzp-FZEI

இந்தப் பெரிய சம்பு/கண்பு படுகை நகர்வதைப் பாருங்கள். 5 நிமிடம் 24 நொடிகள். கொஞ்சம் பெரிய காணொளியோ? முடிந்தால் பாருங்கள். NO COMPULSION.

இந்தக் காணொளியில் தெரியும் படுகை இரு கரைகளையும் இணைக்கும் கற்பாதையின் ஓரத்தில் இருந்தது. பாதையை ஒட்டியிருந்த பகுதியில் படுகைப் புதருக்குள் புள்ளி மூக்கு வாத்துகள் மற்றும் தாழைக்கோழிகள் கூடு கட்டியிருந்தன.

இந்தப் படுகை நகர்ந்த போது அதில் கூடு கட்டியிருந்தவற்றின் Reaction பற்றி சொல்கிறேன் என்று சொன்னேன் இல்லையா அது இங்கே. இப்படுகை கப்பல் போன்று, அதாவது கரையை ஒட்டியிருந்த பகுதி (அதுதான் பறவைகளின் நுழைவுவாயில்) என் பக்கம் திரும்பியதைப் பார்த்ததும் வியப்பாக இருந்தது. யாரோ திருப்புவது போன்று. அதுவும் அது ஓரத்திலிருந்து பிய்த்துக் கொண்டு வரும் போது இலைகள் கீழே சாய்வதையும் பார்க்கலாம்.

வெளியில் வந்து உணவிற்காகத் தண்ணீரில் நீந்திக் கொண்டிருந்த இரு புள்ளி மூக்கு வாத்துகளுக்கு தங்கள் நுழைவுப் பகுதி எப்பக்கம் என்ற குழப்பம். ஒன்று ஏறிக் கொண்டு ஆராய்ந்தது. மற்றொன்று படுகையைச் சுற்றி சுற்றி வந்தது.

படுகை திரும்பியதும், வலப்புற ஓரத்தில் தாழைக்கோழி இருப்பதையும், ஒரு கோழி இறங்கி வருவதையும் பார்க்கலாம். அது இந்தப் பக்கம் வந்து வாத்துகளின் நுழைவுப் பகுதி வழியாகப் புகப் பார்த்ததும் ஏறியிருந்த புள்ளி மூக்கு வாத்து இறங்கிச் சென்று துரத்துவதையும், படுகையின் இடப் புறத்தில், சுற்றிக் கொண்டிருந்த புள்ளி மூக்கு வாத்து மற்ற கோழிகளை அருகில் விடாமல் செய்வதையும் பார்க்கலாம். எனக்கு நேரில் பார்க்க மிகவும் சுவாரசியமாக இருந்தது. கடைசியில் அவற்றிற்கு கூடுகள் இருக்கும் நுழைவுப் பகுதி தெரிந்து ஏறிவிட்டன.

இந்தப் படுகை நகர்ந்து ஏற்கனவே இருந்த படுகையுடன் முட்டி நிற்பதையும் காணொளியின் கடைசியில் பார்க்கலாம்.

(இந்தப் புள்ளி மூக்கு வாத்துகள் பொதுவாகவே ஜோடியாகத்தான் இருக்கும். புள்ளி மூக்கு வாத்துகள் பற்றி தனி பதிவு வரும்)

இப்பதிவு பெரிதாகிவிட்டதால், செயற்கை நாணல்படுகை பற்றி அடுத்த பதிவில் சொல்கிறேன். Stay tuned to our posts! 

****************

சில்லு – 2 – உபரித் தகவல் – ஹோக்கர்சர் பாதுகாக்கப்பட்ட சதுப்பு நிலம் - 'Queen Wetland of Kashmir', Hokersar Wetland Reserve

படங்கள் - நன்றி விக்கி

காஷ்மீரின், கடைசியாக எஞ்சியிருக்கும், நாணல் சதுப்பு நிலம் இந்த ஹோக்கர்சர். எவ்வளவு அழிந்திருக்கின்றன என்று தெரிகிறது. காஷ்மீர், ஸ்ரீநகரில் இருந்து சில கிலோமீட்டர் தொலைவில், பிர் பஞ்சல்(Pir Panjal) மலைத்தொடரின் பின்னணியில், ஹோக்கர்சர் ஈரநில/சதுப்பு நில பாதுகாக்கப்படும் இடம் உள்ளடு. இது ஜீலம் நதி படுகையை ஒட்டிய இயற்கையான வற்றாத ஈரநிலப் பிரதேசம். சைபீரியா, சீனா, மத்திய ஆசியா மற்றும் வடக்கு ஐரோப்பாவைத் தங்கள் தாயகமாகக் கொண்டிருக்கும் பல நீர்ப்பறவைகளுக்கு விசா இல்லாம இம்மாந்தூரம் விமானச் செலவு இல்லாம பறந்து வந்து புகுந்துக்கற ஒரு வாழ்விடமாக இருக்கு பாருங்க.

1978 ஆம் ஆண்டு ஜம்மு-காஷ்மீர் வனப்பாதுகாப்புச் சட்டத்தின் கீழ் ஹோக்கர்சர் பாதுகாப்புச் சதுப்புநிலமாக அறிவிக்கப்பட்டது. 2005 ஆம் வருடம் ஈரநிலப்பாதுகாப்பு மற்றும் நிலையான பயன்பாட்டிற்காக உருவாக்கப்பட்ட ராம்சார் அமைப்பின் கீழ் இது ராம்சார் தளமாக அறிவிக்கப்பட்டது.

இது மூன்று வகையான பகுதிகளைக் கொண்டுள்ளது:

நீர்ப்பறவைகள் கூடு கட்டும் நீர்-நாணல் நிறைந்த சதுப்பு நிலங்கள்

நடுப்பகுதியில் உள்ள ஆழமான பகுதி – நதி நீர் ஓடும் பகுதி.

வண்டல் படிந்த பகுதி – கால்நடைகள் மேயும் பகுதி, விளைச்சலுக்கான பகுதியும் கூட

பெரிய கொக்கு (Egret), கிரேட் க்ரெஸ்ட கிரேப் (Great crested Grebe), சின்ன நீர்க்காகம் (Little Cormorant), காமன் ஷெல்டக் (Common Shelduck), டஃப்டெட் வாத்து மற்றும் அழிந்து வரும் வெள்ளைக்கண்களியன் (White eyed Pochard) போன்ற 68 நீர்ப்பறவைகளின் பாதையில் இது இருப்பதாலும், பல மீன்களுக்கு முட்டையிடும் பகுதியாகவும் நாற்றங்கால் பகுதியாகவும் இருப்பதால் மிகவும் முக்கியத்துவம் வாய்ந்த பகுதி.

இதன் சதுப்பு நிலங்களில் Typha (சம்பு – இங்கு முதல் சில்லில் சொல்லப்பட்டிருப்பது), மற்றும் வேறு வகை நீர்த்தாவரங்கள் உள்ளன. கிழக்கிலிருந்து பாயும் தூத்கங்கா(Dhoodhganga) வின் நீர்ப்பிடிப்புப் பகுதியாக இந்தச் சதுப்பு நிலத்தின் கடைக்கோடி வட பகுதி இருப்பதோடு இந்த ஈர நிலத்திற்கு இந்த துத்கங்காவும் மேற்கிலிருந்து பாயும் சுக்நாக் நல்லா(Sukhnag Nalla) என்ற சிறு ஆறும்தான்  காரணம். 

2014 வெள்ளத்திற்குப் பிறகு தூர் வாரப்படாததால் இதற்கு வரும் நீர் வரத்துக் குறைந்துள்ளதாலும் இதைச் சுற்றிலும் பொறுப்பற்ற கட்டுமானத்தாலும் இதன் பரப்பளவு குறைந்துள்ளதோடு, வறண்டு போன பகுதியும் ஆழமற்ற பகுதிகளும் குப்பைக் கிடங்காக மாறி தொடர்ந்து பாதிப்புள்ளாகி வருகிறதாம். உள்ளூர்வாசிகள் சிலர் ஈர நிலத்தில் மீன் பிடிக்கவும், கால்நடை தீவனம் மற்றும் வீட்டு உபயோக எரிபொருளுக்காகவும் பயன்படுத்துகின்றனர்.

மேலும், கட்டுப்பாடற்ற சுற்றுலாவினாலும் தேவையற்ற மனிதத் தலையீடுகளினாலும் சுற்றுச் சூழலியல் பாதிக்கப்படுகிறதாகவும் தெரிகிறது. பல உயிரினங்களுக்கு வாழ்வாதாரமாக இருக்கும், காஷ்மீரின் புகழ்பெற்ற இந்தக் கடைசி ஈர/சதுப்பு நிலமான ஹோக்கர்சரைக் காப்பாற்ற அரசு ஆவன செய்தால் நல்லது. 

(கொஞ்சம் பெரிய பதிவாகிவிட்டது. பொறுத்துக் கொள்ளவும்)

------கீதா