துபாய் நாட்கள் - இரண்டாம் நாள் - 27-10-2023

துபாய் நாட்கள் பகுதி 1  வாசித்தவர்கள், கருத்திட்டவர்கள் அனைவருக்கும் மனமார்ந்த நன்றி. வாசிக்காதவர்கள் விரும்பினால் இச்சுட்டி சென்று வாசித்துக் கொள்ளலாம். 

இதோ இரண்டாம் நாள் பகுதி.

‘Snakit’

27-10-2023 காலை தங்கியிருந்த இடத்தின் கீழே உள்ள ‘Snakit’ எனும் தேநீர்க் கடைக்குப் போய் தேநீர் குடித்து (1 அமீரக திர்ஹாம்) மூன்று இட்லி வடை செட் (3 அமீரக திர்ஹாம்) சொன்னோம்.  அறைக்குக் கொண்டு வந்து கொடுத்தார்கள், Disposable தட்டுகளில்.

அன்று ஜமால் வரமுடியாத நிலை. அவர் பணிபுரியும் மருத்துவமனைக்குச் செல்ல வேண்டிய கட்டாயம். அடுத்த இரண்டு நாட்கள் அவர் எங்களுடன் வருவதாகச் சொன்னார். அதனால் எங்களுக்கு அன்றைய தினம் மெட்ரோ ரயிலில் ஏறி Museum of the Future – (மியூஸியம் ஆஃப் த ஃப்யூச்சர்) மற்றும் துபாய் மால் செல்லத் தேவையான அறிவுரைகளை வழங்கியிருந்தார்.

Baniyas Square Metro

 அட்டை,  NOL கார்டு - Nol, which means 'fare' in Arabic, is a smart card thoughtfully created by the Dubai Roads & Transport Authority (RTA) to make your public transportation experience smooth and hassle-free. அரபு மொழியில் கட்டணம் என்று சொல்லப்படும் இந்த ஸ்மார்ட் கார்ட் பொதுப்போக்குவரத்தான மெட்ரோ ரயில், பேருந்து என்று எல்லாவற்றிற்கும் பயன்படுத்தும் வகையில் எளிதாக, சௌகரியமாகப் பயணம் செய்யும் வகையில் துபாய் போக்குவரத்து அமைப்பால் உருவாக்கப்பட்ட ஒன்று

அருகிலுள்ள Baniyas Square Metro – Bபனியா ஸ்கொயர் மெட்ரோ ரயில் நிலையம் சென்று ஒவ்வொருவருக்கும் 25 அமீரக திர்ஹாம் செலுத்தி மெட்ரோ ரயில் நிலைய (Counter)கவுன்டரிலிருந்து 6 அட்டைகள், 6 NOL கார்டுகள் எடுத்தோம். மெட்ரோவில் பணிபுரியும் ஒரு பெண்மணி எங்களுக்கு உதவினார். 

Union Station ல் இறங்கி Red line ல்

அங்கிருந்து அடுத்த Union Station ல் இறங்கி Red line ல் - சிவப்பு லைன் தடத்தில் - செல்லும் ரயிலுக்கு மாறி எமிரெட்ஸ்/அமீரக மால் ஸ்டேஷனில் இறங்கி Museum of the Future கண்ட பின், திரும்ப துபாய் மால் மெட்ரோ ரயில் நிலையத்திற்கு வருவது நல்லது என்றார். நாங்களும் சொன்னபடி செய்தோம்.

துபாய் மால் மெட்ரோ

யூனியன் மெட்ரோ நிலையம்உலகிலேயே பூமிக்கு அடியில் உள்ள மிகப் பெரிய  நிலையம் 

யூனியன் மெட்ரோ நிலையம் (துபாய் மெட்ரோ) Deira – தேராவில், Union Square-யூனியன் ஸ்கொயருக்கு கீழே பூமிக்குள் இருக்கிறது. இது துபாய் கிரீக்கின் மத்திய பகுதிக்கு மிக அருகில் உள்ள மெட்ரோ நிலையங்களில் ஒன்று. மட்டுமல்ல உலகிலேயே பூமிக்கு அடியில் உள்ள மிகப் பெரிய நிலையமும் கூட. 

எல்லா இடங்களுக்கும் வழி காட்ட எல்லா இடங்களிலும் அறிவிப்புப் பலகை இருந்தது. அதே போல் மெட்ரோ தட வரைபடமும் உதவியது. மெட்ரோவில் அறிவிப்பும் துணையானது. 

அமீரக மெட்ரோ நிலையம் செல்லும் வழியில் இரு புறமும் துபாய் நகரத்தின் வானளாவிய கட்டிடங்களும், விசாலமான சாலைகளும், சிக்னல்களுக்குக் காத்திருக்கும் அவசியமில்லாத விதத்தில் அமைக்கப்பட்ட சுரங்கப் பாதை வழிகளும் மேம்பாலச் சாலைகளும் பிரமிப்பூட்டின. (காணொலியில்)

அமீரக டவர் மெட்ரோ நிலையத்திலிருந்து (Emirates Tower Metro Station) Museum of the Future – ம்யூஸியம் ஆஃப் த ஃப்யூச்சருக்குச் செல்ல ஒரு ஆகாயப் பாதை, வெண் மேகக் குகை மிக அருமையான வடிவமைப்பு. சிறிது தூரத்திற்குப் பின் இரு புறமும் காணும் விதத்தில் கண்ணாடிப் பாதையாய் மாறி நம்மை Museum of the Future – ம்யூஸியம் ஆஃப் ஃப்யூச்சரின் தரைத்தளத்திற்குக் கூட்டிச் செல்கிறது.

இதில் சில விவரங்கள். வாசிக்க முடிகிறதா? பெரிதாக்கி முடிகிறதா என்று பார்க்கலாம்

அடுத்த 50 ஆண்டுகளுக்குப் பின் துபாய் எப்படி இருக்கும் என்பதை விளக்குவதுதான் Museum of the Future – ம்யூஸியம் ஆஃப் த ஃப்யூச்சர். 78 மீட்டர் உயரமும் 7 மாடிகளையும் கொண்ட இது இரும்புச் சட்டங்களால் உருவாக்கப்பட்ட கட்டிடம். உள்ளே சென்றால் ஒரு விண்வெளி நிலையத்தில் (Space Station) நிற்பது போன்ற ஓர் உணர்வு. 

 

அதை உருவாக்கியவர்களில் ஒருவரான Mattar Bin Lahej

கட்டிடம் முழுக்க உள்ளும் புறமும் அரபி மொழி. அதனால்தான் அதை உருவாக்கியவர்களில் ஒருவரான Mattar Bin Lahej – மட்டர் பின் லாஹெஜ் – எனும் கலைஞர் இதை அரபு மொழி பேசும் கட்டிடம் என்று அழைக்கிறார்.  அரபு மொழியில் அதன் வாயிலில் அமீரகத்தின் பிரதமர் திரு முகம்மது பின் ராஷித் அவர்கள் எழுதிய அரபி வாசகத்தின் ஆங்கில மொழி பெயர்ப்பும் கொடுக்கப்பட்டுள்ளது. நூற்றாண்டுகளுக்குப் பின் நாம் வாழ முடியாதெனினும் நம் படைப்பாற்றல்கள் வாழும் என்று.

நுழைவுக்கட்டணம் 145 AED (ஏறத்தாழ 3300 ரு). Museum of the future க்கான நுழைவுச் சீட்டை இணையத்தில் பதிவு செய்ய வேண்டும் என்பதால் அதன் தரைத்தளம் மற்றும் முதல் தளத்திலிருந்தும் அதன் முன்பில் நின்று அதன் அழகை ரசித்ததுடன் படங்களும், காணொளிகளும் எடுத்துக் கொண்டோம்.

தூரத்தில் தெரியும் புர்ஜ் கலிஃபா

அதன் பின் மெட்ரோ ஏறி துபாய் மால் நிலையத்தில் இறங்கினோம். மெட்ரோ நிலையத்திலிருந்தே துபாய் மாலுக்கு நீண்ட ஒரு ஆகாயப் பாதை.  கீழே 8 வழிச் சாலைகள் தூரத்திலிருந்தே தெரிகின்ற Burj Khalifa.

துபாய் மால்

துபாய் மால் பிரமிப்பூட்டியது. இருந்தாலும் லுல்லு மால் போன்ற பல மால்களை இங்கு கண்டிருந்ததாலோ என்னவோ அதிகம் வியப்பில்லை. நாங்கள் நடந்து மீன் அருங்காட்சியகத்தை அடைந்தோம். நுழைவுச் சீட்டு எடுத்து உள்ளே சென்று பார்க்க வேண்டிய அவசியமே இல்லை என்று தோன்றியது. முன்பிலும், இடப்புறமும் கடல் வாழ் உயிரினங்களின் காட்சியே போதும். நீண்ட நேரம் பார்த்து படங்களும் எடுத்துக் கொண்டோம். 

தரைத்தளத்திலிருந்து Burj Khalifa வின் நீரூற்றிற்கு வழி

தரைத்தளத்திலிருந்து Burj Khalifa வின் நீரூற்றிற்கு வழி இருக்கிறது. அதன் வழியாக நீரூற்றை அடைந்த போது அங்கு சுற்றுலாப் பயணிகள் கடலெனத் திரண்டு நின்றிருந்தார்கள். கொஞ்ச நேரத்தில் இசையுடன் கூடிய நீரூற்றின் அழகைக் கண்டு களித்தோம். (புர்ஜ் கலிஃபா பகுதி காணொளியில்)

Burj Khalifa சிறிய காணொளி - பதிவின் முழு காணொளியில் இதை இன்னும் விரிவாகக் காணலாம் இசையுடன் கூடிய நீரூற்றுடன்

மீண்டும் Burj Khalifa வின் இரவு அழகை ரசிக்க வர வேண்டும் என்று முடிவு செய்து அங்கிருந்து கிளம்பி Baniyas Square ரயில் நிலையத்தை அடைந்தோம். 

பின் அங்கிருந்து நடந்தே அருகிலுள்ள Gold Souk-கோல்ட் ஸூக் - கிற்குச் சென்றோம். தங்கத்தால் ஆன அணிகலன்கள் மட்டுமல்ல, ஆடைகளே இருந்ததை வார்த்தைகளால் விவரிக்க முடியாது. பார்க்கத்தான் வேண்டும். (காணொலியில்)

குங்குமப்பூ குவியல்

தங்கம் மட்டுமா! அதிசயமாய் பொன் தோட்டத்தில் பூத்திருக்கும் குங்குமப்பூ குவியலைக் கண்டதும் வியப்புடன் பாத்தோம். பின் அறையை அடைந்து தூங்கினோம். மறு நாள் அதாவது மூன்றாம் நாள், ஜமாலுடன் எங்கு சென்றோம் என்பதை அடுத்த பதிவில் சொல்கிறேன்.

https://youtu.be/MxADNPD-FNc

பதினோரு நிமிடங்கள் 25 நொடிகள். முடிந்தால் நேரமிருந்தால் பாருங்கள்

மூன்றாம் நாள் இடங்களைக் காண பயணத்தில் என்னோடு இணைந்திருப்பீர்கள்தானே!  

-----துளசிதரன்