ஜெயமோகனும் மஞ்ஞும்மல் பாய்ஸும்

 

இதைப் பற்றி ஒன்றும் சொல்லாமலிருக்க என்னால் முடிந்தவரை தாக்குப் பிடித்தேன்.  இனி முடியாது என்பதால்தான் இந்தக் கருத்து.

கேரள மக்களுக்குப் புரட்சி எழுத்தாளர் ஜெயகாந்தனைத் தெரியாது. ஆனால் ஜெயமோகனைத் தெரியும். அவரது படைப்புகளில் சில மலையாள எழுத்துலகில் இடையிடையே பேசப்படுவதுண்டு. அதுதான் காரணம். அதனாலேயே அவர் ஏதேனும் சொன்னால் அது தமிழகத்திலும் கேரளத்திலும் அதிகமாக விவாதத்திற்கு உள்ளாகும்தான்.

அதனால், அவருக்கு உண்மை என்று தோன்றுவதை இவ்வளவு கடினமாகச் சொல்லாமல், தன்மையாகச் சொல்லியிருக்கலாம் என்பதுதான் என் கருத்து.

காரணம், ஒரு கோபத்தில் கிணற்றில் குதித்துவிட்டு அது போல் ஆயிரம் மடங்கு கோபம் வந்தாலும் ஏற படிக்கட்டுகள் இல்லாத கிணற்றிலிருந்து ஏறி வர முடியாது என்று ஒரு பழமொழி உண்டு. அப்படி அவர் சொன்னவிதம் இது போன்ற எல்லோராலும் போற்றப்படும் எழுத்தாளருக்கு ஏற்றதல்ல.

இனி அவர் சொன்ன கருத்துகளைப் பற்றிச் சொல்வதானால், குடிப்பழக்கம், போதைப் பொருள் உபயோகம் இயற்கைக்கும் வனவிலங்குகளுக்கும் துன்பம் விளைவித்தல் என்பது நம் சமூகத்திலிருந்து வேறோடு பிடுங்கி எறியப்பட வேண்டியவைதான்.

அரசும், அதனோடு தொடர்புடைய இலாக்காக்களும் மட்டும் நினைத்தால் செயல்படுத்துவது சிரமம். லஞ்சத்தையும் வன்முறையையும் ஒழிக்கப் பாடுபடுவது போல், இயற்கையையும் வனவிலங்குகளையும் பாதுகாப்பது நம் கடமை, அவை இல்லையேல் நாமில்லை என்ற எண்ணத்தை ஒவ்வொருவரிலும் வேரூன்ற வைக்கப் பாடுபடுவது போல், மது மற்றும் போதைப்பொருள் உபயோகம் மரணத்திற்கான குறுக்குவழியன்றி வேறொன்றல்ல என்பதை வரும் தலைமுறைக்குப் புரிய வைக்க முயற்சிப்பது போல் தொடர்ந்து கொண்டே இருக்க வேண்டும்தான். இதற்குக் காலமும் பொறுமையும் மட்டுமே நமக்குத் துணையாக இருப்பவை.

ஆசிரியர்களான நாங்கள் கல்லூரிகளில் மட்டுமல்ல, பள்ளிகளிலும் இந்த போதைப் பழக்கம் எனும் இந்தக் காட்டுத்தீ படர்வதைக் கண்டு பதைத்து நிற்கிறோம்.

அப்படிப்பட்ட நிலையில் திரைப்படத் துறையில் மட்டும் இது எப்படி இல்லாமல் இருக்கும்? அங்கங்கு இருக்கும் பெரும்பான்மையானவர்கள் இதை எதிர்த்துப் போராடிக் கொண்டுதான் இருக்கிறார்கள். அப்படி இருக்க நட்பை, காதலுக்கு, அதுவும் புனிதமான காதலுக்கு ஒப்பிடும் இப்படத்தை எல்லோரும் பாராட்டும் இப்படத்தை அதன் சிற்பிகளை இந்த அளவுக்குத் தூற்ற வேண்டிய அவசியம் இல்லை என்றே தோன்றுகிறது.

அடுத்து, எர்ணாகுளம் குழுவைப் பற்றி, மறைமுகமாக அதில் அதிகமாக உள்ள ஒரு மதம் சார்ந்தவர்களைக் குறித்துச் சொன்னது பற்றிச் சொல்வதானால், முன்பெல்லாம் மலையாளத் திரைப்படங்களில் கதைகளும் கதாபாத்திரங்களும் கடந்த நூற்றண்டிலிருந்து எல்லாவிதத்திலும் இறக்குமதி செய்யப்பட்டவைகள்.

இப்போது அது போன்ற ஒரு சமூகச் சூழல் கேரளத்தில் இல்லை. நான்கு, எட்டு கட்டு தரவாடுகளும், மேலாள், கீழாள், சம்பிரதாயங்களும் இல்லை. இப்போதைய தலைமுறையினர் காண்பதையும் நிகழ்வதையும் பற்றிப் படமெடுக்கிறார்கள். அவை எல்லாவிதத்திலும் மாறுபட்டதாய் இருக்கின்றன.

திரைப்படத் துறையில் எழுத்து, இயக்கம் மற்றும் தயாரிப்புத் துறையில் முன்பு ஆதிக்கம் செலுத்தியிருந்தது போல் ஓரிரு மதத்தினர் அல்லாமல் எல்லா சாதி, மதத்தினரும் இருக்கிறார்கள். அதனால், ஒரு முஸ்லிம் குடும்பத்தில் நிகழும், அதுவரை அன்னியமாயிருந்த பல நிகழ்வுகளையும் காண்பித்த “உஸ்தாத் ஹோட்டெல்” போன்ற படங்கள் வெளிவந்து வெற்றி பெருகின்றன. தண்ணீர் மத்தன் தினங்கள், கும்பளங்கி நைட்ஸ், ப்ரேமலு போன்ற படங்களை விரும்பும் அவர்களிடம் தேவாசுரம், ஹிட்லர், காட்ஃபாதர், வலிஏட்டன், நரசிம்ஹம் போன்ற படங்களை படங்களின் பெருமை பற்றிப் பேசிப் பலனில்லை. அது அப்போது. இது இப்போது. மாற்றங்கள் இன்றியமையாதது.

இப்போதைய காலம் இந்தத் தலைமுறையின் காலம். அவர்கள் இந்தக் காலகட்டத்தைப் புரிந்து கொண்ட அளவுக்கு முன் தலைமுறையினர் புரிந்து கொள்வது சிரமம்.

எனவே நம் அனுபவம் சார்ந்து தேவைப்படும் போது அறிவுரை வழங்கலாம். இங்கு சில வருடங்களுக்கு முன் தமிழகத்தில் நிகழ்ந்த சாதிக் கொடுமைகள் மற்றும் சாதிக் கொலைகள்  பற்றிச் சொல்லும் போது ஒரு இளைஞர் சொன்ன வார்த்தை நினைவுக்கு வருகிறது. “எங்களைப் போன்ற இளைஞர்கள் மனதில் சாதி வெறி இல்லை. இப்போது 50 வயது கடந்த ஆட்கள்தான் இக் கொலைகளுக்குக் காரணம். அவர்கள் வாழும் வரை இது போன்ற சாதிக் கொலைகள் ஒரு வேளை தொடர வாய்ப்புண்டு. அதன் பிறகு கண்டிப்பாக இது நிகழாது”.

ஆமாம் இது சாதிக்கு மாட்டுமல்ல மதத்திற்கும் பொருந்தும். அதனால் அவர்களுக்கு அறிவுரை வழங்கும் போது, நாம், நமக்கு அவர்கள் 20 ஆண்டுகளுக்கு முன் குழந்தைகள், ஆனால் இப்போது 20 ஆண்டுகள் அனுபவமுள்ள இளைஞர்கள்  என்ற எண்ணத்துடன்தான் சொல்ல வேண்டும்.

சிலர் செய்யும் தவறுகளுக்கு எல்லோரையும் ஒட்டு மொத்தமாகக் குற்றம் சொல்லி, எல்லோரது எதிர்ப்புக்கும் விரோதத்திற்கும் பாத்திரமாகாமல் இருப்பது நல்லது. இல்லையேல் புதிய தலைமுறை பழைய தலைமுறையினரை ஒதுக்கி ஒரு மூலையில் இருக்கச் செய்துவிடும். காரணம் உலக நீதிதான். Survival of the fittest.

------துளசிதரன்