மஞ்ஞும்மேல் பாய்ஸ் - குணா குகை உண்மை நிகழ்வு

 

கடந்த ஆண்டு வெளிவந்த ஜூட் ஆண்டனியின் 2018 எனும் படம் உண்மை சம்பவத்தை அடிப்படையாகக் கொண்டு எடுக்கப்பட்ட அருமையான படம். புதிய திரைப்படக் கலைஞர்களும் நடிக நடிகையர்களும் டெக்னாலஜியும் ஒன்றுபட செயல்படும்போது மிக அருமையான படங்கள் நம் கண்களுக்கு விருந்தாகி மனதில் பதிவதுண்டு. கடந்த தினம் அப்படிப்பட்ட ஒரு திரைப்படம் பார்க்க நேர்ந்தது. அதை உங்களுடன் பகிர்ந்து கொள்ளத் தான் இந்தப் பதிவு.

1992ல் வெளிவந்த கமலஹாசனின் குணா திரைப்படம் ஏராளமான புதுமைகளை சுமந்து வந்த அருமையான படம். அதில் கதாநாயகியைக் கடத்திச் சென்று ஒரு குகையில் தன் காதலை வெளிப்படுத்துவார் கமலஹாசன். படப்பிடிப்பு நடந்த கொடைக்கானலில் இருந்து 12 கிலோமீட்டர் தொலைவில் உள்ள Devil's Kitchen என்று பெயருடைய, 1821 இல் பிரிட்டிஷ்காரர்களால் கண்டுபிடிக்கப்பட்ட அந்த குகை அதன் பின் குணா குகை என்ற பெயரில் பிரபலமானது.

பலரும் ஆபத்தான அந்த குகைக்குச் சென்று ஆபத்தில் மாட்டி இறந்திருக்கிறார்கள். ஏறத்தாழ 13 பேர்களின் துர்மரணத்திற்குக் காரணமான குகை அது. அங்கு 2006 இல் நடந்த ஒரு உண்மை சம்பவத்தை தழுவி எடுக்கப்பட்ட படம் தான், சிதம்பரம் எனும் இயக்குனரின் மஞ்ஞும்மல் பாய்ஸ். சௌ பின், ஸ்ரீநாத் கணபதி, பாலு வர்கீஸ் மற்றும் தீபக் போன்றவர்கள் நடித்துள்ள படம்.

10 பேர் அடங்கிய ஒரு நண்பர்களின் குழு எர்ணாகுளம் மஞ்ஞும்மல் என்னும் இடத்திலிருந்து பழனி வழியாக கொடைக்கானல் செல்கிறார்கள். எல்லா இடங்களையும் கண்டு களித்த பின் இறுதியாகக் குணா குகைக்குச் செல்கின்றனர். தடை செய்யப்பட்ட குகைக்கு இறங்கிச் செல்லும் வழியில் சிலர் நிற்பதைப் பார்த்ததும் இவர்களும் கீழே இறங்கி குணா குகைக்குச் செல்கிறார்கள்.

அப்போதெல்லாம் வனஇலாக்காவின் காவலர்கள் கண்ணில் படாமல் சிலர் இப்படி போவதுண்டாம். பல இடங்களிலும் இரும்பு கிரில் போடப்பட்டிருந்தது. பிளவு பட்ட நீண்ட பாறைகளுக்கு இடையே உள்ள குகை பக்கவாட்டிலும் கீழுமாக அமைந்த Pit Caves எனும் வகையைச் சேர்ந்தது. அருகில் உள்ள Suicide Point  மேலிருந்து கீழ் 5000 அடி என்று சொல்லப்படுகிறது. ஆனால் இந்த குகைகளின் கீழே காணப்படும் இடைவெளி குழிகளின் ஆழம் எவ்வளவு என்று இதுவரை கணிக்கப்படவில்லையாம். மட்டுமல்ல விழுந்தவர்கள் யாரும் மீட்கப்பட்டதாக தகவல்களும் இல்லை.

Devil’s Kitchen குகை கண்டுபிடிக்கப்பட்ட 1821க்குப் பிறகு பலரும் இறந்திருக்கலாம். அதனால் தானோ என்னவோ வெள்ளையர்கள் அப்படி ஒரு பெயரை அந்த குகைக்கு இட்டு விட்டார்கள். Devil’s Kitchen. சாத்தானின் சமையலறை.

இதைப் பற்றி எல்லாம் ஒன்றும் தெரியாத மஞ்ஞும்மல்லைச் சேர்ந்த இளைஞர்கள் குகைக்குள் நுழைந்து வரிசையில் ஒருவர் பின் ஒருவராக நடக்கையில் அபிலாஷ் எனும் ஒரு இளைஞன் திடீரென நடுவில் இலைகளால் மூடப்பட்ட ஒரு குழியில் விழுந்து விடுகிறான். திகைத்துப் போன மற்ற நண்பர்கள் இலைகளை நீக்கி பாறை இடுக்கைக் கண்டு திகைத்துப் போகிறார்கள். அந்தப் பிளவு வழியாகக் கத்தி அபிலாஷைக் கூப்பிட்டும் பலன் இல்லை. இறங்கவும் பயம். உள்ளே ஒன்றும் தெரியாத அளவு இருட்டு. அதன் வழியே ஏராளமான வவ்வால்கள் பறந்து வந்ததும் பயந்தே போகிறார்கள்.

பின்னர், ஓடி பலரையும் உதவிக்கு அழைக்கிறார்கள். காவல் துறையினர், வனக்காவலர்கள், தீயணைப்புப் படையினர், அருகே கடைகள் நடத்துபவர்கள், டூரிஸ்ட் கைட் மற்றும் புகைப்படம் எடுப்பவர் என்று எல்லோரும் கூடி கயிறு கட்டி உள்ளே இறக்கி அபிலாஷைக் கூப்பிட்டு கயிற்றைப் பிடித்து ஏறி வர சொல்லி குரல் கொடுக்கிறார்கள். பதில் குரல் கேட்டதும் கயிற்றில் பிடித்து இறங்கத் தீர்மானிக்கிறார்கள்.

ஆனால், அதற்கு, அங்கு உள்ள யாரும் தயாராகாத நிலையில் நண்பர்கள் குழுவில் உள்ள சிஜு டேவிட் எனும் குட்டன் தயாராகிறார். உயிரைப் பணயம் வைத்து தன் நண்பனை தன்னுடன் சேர்த்துக் கட்டி மேலே கொண்டு வருகிறார். மருத்துவமனையில் மருத்துவர்களின் ஆலோசனையின்படி எர்ணாகுளத்திற்கே அடுத்த நாள் கொண்டு செல்கிறார்கள்.

ஊரில் யாரிடமும் நடந்ததைச் சொல்லாமல் பாறையில் வழுக்கி விழுந்ததாகச் சொல்கிறார்கள். இந்தச் சம்பவம் தமிழகத்தில் நாளிதழ் மற்றும் டிவி சேனல்களில் வந்ததை அறிந்த ஒருவர் ஊரில் உள்ளவர்களிடம் அறிவித்திட இந்த அதிசய சம்பவம் எல்லோருக்கும் தெரிய வருகிறது.

அதைத்தொடர்ந்து சிஜு டேவிடிற்குக் கேரள முதல்வரின் பரிசும் ஜனாதிபதி விருதும் வரை கிடைக்கிறது. 18 ஆண்டுகளுக்குப் பின் இது திரைப்படமாகும் போது அதை அருமையாகத் திரைக்கதை, நடிப்பு, கேமரா, இசை. செட்டிங்ஸ் என்று ஒவ்வொன்றிலும் ஒவ்வொருவரும் அவரவர் திறமைகளைக் காண்பித்திருக்கிறார்கள். ஷிஜூ காலித்தின் படப்பிடிப்பு பிரமாதம். சுஷின் ஷ்யாமின் இசை பிரமிக்க வைக்கிறது. விவேக் ஹரிஹரனின் படத்தொகுப்பும் அருமை. புரொடக்ஷன் டிசைனர் அஜயன் சாலிசேரி பெரம்பாவூரில் உள்ள உபயோகிக்கப்படாத ஒரு Godown ஐ குணா குகையின் செட்டாக மாற்றி இருக்கிறார். இதற்காக உள்ளே போக வழி உள்ள மூன்று 50 அடி குழிகளை தோண்டி எடுத்து செட் அமைத்திருக்கிறார். பார்த்தால் குணா குகைக்குச் சென்று படமாக்கியது போல்தான் தோன்றும். அவ்வளவு துல்லியமாக செட்டும், கேமரா இசை மற்றும் நடிப்பும் கை கொடுத்திருக்கிறது.

கேரளம் எங்கும் படத்துக்கு நல்ல வரவேற்பு. மட்டுமல்ல உண்மை நாயகர்களான மஞ்ஞும்மல் பாய்ஸை நேர்முகக் காணலில் காண்பித்து அவர்களிடம் நிகழ்வுகளைப் பற்றிக் கேட்டு அறிந்து கொள்ளும் நிகழ்ச்சிகளுக்கும் நல்ல வரவேற்பு.

அவிலாஷுக்குக் கிடைத்தது போல் உயிரை பணயம் வைத்து தன் நண்பனைக் காக்கும் நண்பர்கள், அதில் இறந்த பலருக்கும் கிடைத்திருந்தால் அவர்களில் பலரும் இப்போதும் உயிருடன் இருந்திருப்பார்கள் என்று எண்ணும் போது மனம் வலிக்கிறது.

மட்டுமல்ல அபிலாஷ் விழுந்தது 300 அடி ஆழத்தில் கொஞ்சம் முன்னோக்கித் தள்ளி நின்ற ஒரு பாறையிலாம். அங்கிருந்தும் நழுவி அவர் அன்று கீழே போயிருந்தால் விஜுவால் காப்பாற்றி இருக்கவும் முடியாதுதான். இடைவேளைக்குப் பின் திரைப்படம் நம்மை இருக்கையில் நுனிக்குக் கொண்டு சென்று படம் முடியும் வரை மூச்சடக்கிப் பார்க்க வைக்கும் அளவு அருமையாக உருவாக்கிய சிதம்பரத்திற்குப் பாராட்டுகள். கூடவே அதில் நடிக்காமல் வாழ்ந்த நடிகர்களுக்கும்.

-----துளசிதரன்

(படங்கள் அனைத்தும் இணையத்திலிருந்து எடுக்கப்பட்டவை. Picture courtesy - internet)