ஓணப்பண்டிகை - 2

 

எங்கள் கல்லூரியில் நடந்த ஓணப் பண்டிகை கொண்டாட்டங்களைப் பற்றி முடிந்த அளவு சொல்கிறேன் என்று சொல்லி முடித்திருந்தேன். இதோ இப்போது அந்த நிகழ்வுகள் பற்றி.

அத்தப் பூக்களம் பற்றியும் அதற்கு பூக்கள் கிலோ கணக்கில் வாங்க வேண்டிவரும் என்றும் சொல்லியிருந்தேன்.  வெளி மாநிலங்களான கர்நாடகாவிலுள்ள மைசூர், மங்கலாபுரம், தமிழ்நாட்டில் தெற்கே கன்னியாகுமரி மாவட்டத்தில் உள்ள தோவாளை, இப்பக்கம் உள்ள  மதுரை, பொள்ளாச்சி, கோயம்புத்தூர் போன்ற இடங்களில் இருந்துதான் பூக்கள், காய்கறிகள் உட்பட கேரளத்திற்கு வருகின்றன. எனவே பூக்களை முதல் நாளே வாங்கி வந்து பிரித்து வைத்துக் கொண்டு தயாராக இருக்க வேண்டும்.

அதன் பின் பூக்களத்தை நிரப்ப வேண்டிய வடிவத்தை வரைந்து, எந்த இடத்தில் என்ன வண்ணப் பூ என்பதை எல்லாம் தீர்மானித்தனர். அப்படிச் செய்து, எங்கள் கல்லூரியில் காலை 9 மணிக்கு முன்பே பிள்ளைகள், ஆசிரியர்கள் எல்லோரும் வந்து வடிவம் வரைந்து அதில் ஒரு குழு பூக்களைப் பிரிக்க, மற்றவர்கள் வடிவத்தை நிரப்ப அந்த வேலைகள் ஒரு பக்கம் நடந்து கொண்டிருந்தன.

எல்லோருமே குறிப்பாகப் பெண்கள் ஓணத்திற்கான பாரம்பரிய உடையான செட் சாரி என்று சொல்லப்படும் – கிட்டத்தட்ட நம் தமிழ்நாட்டு தாவணி போன்றதுதான் ஆனால் இது சந்தன நிறத்தில் மட்டுமே இருக்கும், உடையை அணிந்து வந்திருந்தனர்.  பூக்களம் நிரம்பும் நேரத்தில் மற்றொரு புறம் திருவாதிரைக் களியில் பங்கெடுக்கும் பெண்கள் அனைவரும் – கல்லூரியில் பயிலும் எல்லா மதத்தைச் சேர்ந்தவர்களும் பங்கெடுத்தனர் – அதற்குத் தலையில் தட்டம் வைப்பது முதல் எல்லாம் செய்துகொண்டு தயாராகிக் கொண்டிருந்தனர்.

அத்தப்பூக்களம் நிறைவுற்று அதை எல்லோரும் பார்த்து ரசித்து புகைப்படங்கள் எடுத்துக் கொண்டோம். பிள்ளைகளும் அதன் முன் நின்று புகைப்படங்கள் எடுத்துக் கொண்டனர்.

அதன் பின் திருவாதிரை களி.  விளக்கை நடுவே வைத்து அதைச் சுற்றி பெண் பிள்ளைகள் நடனமாடினர். சகோதரி கோமதி அரசு அவர்கள் இது கிட்டத்தட்ட கும்மி போன்ற ஒன்று என்று தன் அனுபவங்களையும் பகிர்ந்திருந்தது மகிழ்ச்சியளிக்கிறது.  ஆமாம் கும்மி போன்ற நிகழ்வுதான். இதை நான் காணொளியிலும் சொல்லியிருக்கிறேன்.

இந்த இரண்டு நிகழ்வுகளும் முடிந்தவுடன் ஓணக் களிகள் களிக்கும் சமயம். ஆனால் இடையில் மழைத்தூரல் தொடங்கியது. அது நின்ற பிறகுதான் களிகள் எனவே பசிக்கும் வயிற்றிற்கு உணவாக அட(டை)ப்பிரதமன் பாயாசம் விநியோகம் நடைபெற்றது. பாயாசங்களில் பல வகைகள் இருந்தாலும், கேரளத்தின் புகழ்பெற்ற அட(டை)ப்பிரதமன் பாயாசம் தான் செய்தோம்.

கயிறு இழுத்தல்

மழைச்சாரல் நின்றதும் அடுத்து ஓணக்களிக்கள் தொடங்கின.  ஸ்பூனில் எலுமிச்சை வைத்து வாயில் வைத்துக் கொண்டு ஓடுதல்,  வடம் வலி என்று சொல்லக் கூடிய கயிறு பிடித்து இழுத்தல் போன்ற விளையாட்டுக்களைப் பிள்ளைகள் போட்டி மனப்பான்மை இருந்தாலும் மிகவும் ஒற்றுமையுடன் விளையாடி வெற்றி பெற்றவர்களைப் பாராட்டி ஊக்கப்படுத்தியதை எல்லாம் கண்ட போது மிகவும் மகிழ்ச்சியாக இருந்தது. மற்றொன்று திருச்சூர் ஓணக் கொண்டாட்டத்தில் புலியாட்டம் என்று ஒன்று நடப்பதுண்டு. வயிற்றில் புலியின் முகம் வரைந்து கொண்டு உடல் முழுவதும் புலி உடலில் இருப்பது போல் வரிகள் போட்டுக் கொண்டு ஆடுவது. இதுவும் ஓணக் கொண்டாட்டத்தில் முக்கியப் பங்கு வகிக்கிறது.

சிங்காரி மேளம்

ஒவ்வொன்றும் நிறைய நேரம் எடுக்கத்தான் செய்தது. கடைசியாக்ச் சிங்காரி மேளம். சிங்காரி மேளம் கேரளாவில் புகழ்பெற்ற ஒரு கலை. இந்த சிங்காரி மேளத்தை 26 பேர் கொண்ட குழுவினர் இணைந்து வாசிப்பார்கள்.  திருச்சூர்பூரத்தில் மிகவும் பிராபல்யம். பார்ப்போரையும் கேட்போரையும் பரவசப்படுத்தும் மேளம். இப்போது தமிழ்நாட்டிலும் வாசிக்கப்படுகிறது. இந்த மேளம் எப்படி கல்லூரிப் பிள்ளைகளின் சக்தி முழுவதையும் வெளிக்கொணர்ந்து ஆட வைக்கிறது என்பதை காணொளியில் காணலாம்.

அப்படியாகக், கோவிட் காரணம் இரு வருடமாக இல்லாத ஓண ஆகோஷம் – ஓணக் கொண்டாட்டம் இந்த வருடம் மிகவும் உற்சாகத்தோடு எங்கள் கல்லூரியில் கொண்டாடப்பட்டு நல்லபடியாக முடிவடைந்தது. பிள்ளைகள் எல்லோரும் இது போல் எந்தவித சாதி, மத வேறுபாடுகள் இல்லாமல் காலம் காலமாய் மகிழ்வுடன் வாழ வேண்டும் என்று இறைவனிடம் பிரார்த்தித்துக் கொண்டு, இனி 10 நாட்கள் ஓண விடுமுறை என்பதால் நாங்கள் ஒருவருக்கொருவர் வாழ்த்திக் கொண்டு விடை பெற்றோம்.  

எல்லோருக்கும் ஓணாஷம்சகள் – ஓணப் பண்டிகை வாழ்த்துக்கள்!

ஓண விடுமுறையில் மருத்துவக் கல்லூரிகளின் ஃபெஸ்ட் காசரகோட்டில் நடந்ததால், நடந்த நிகழ்வில் போட்டிகளில் மகளும் பங்கெடுத்ததால் காசரகோடு வரை நாங்கள் மகளோடு சென்று வந்தோம்.  நிகழ்வுகளுக்கு இடையே ஓர் அழகான இடத்திற்கும் சென்று வந்தோம். நிகழ்வுகள் பற்றியும், சென்ற இடம் பற்றியும் பதிவுகள் வரும்.

(தீவிர சைவர்கள், சீர்காழி சட்டநாதர் பற்றி சொல்வது - மஹாபலியை பாதாளத்திற்குத் தள்ளிவிட்டு செருக்குற்ற விஷ்ணுவின் தோலை உரித்து சட்டையாக்கினாராம், அதனால் அப்பெயராம். அந்த சட்டநாதர் சீர்காழியில் மேல்கோபுரத்தில் வீற்றிருக்கிறாராம். இப்படி சைவ வைணவ வதந்திகள் இருந்தாலும் சில சைவர்கள் சொல்லும் ஒரு மஹாபலியைப் பற்றிய கதையை யோசிக்கையில் அதில் உண்மை இருக்கலாம் என்ற ஆய்வில் எழுதி இயக்கிய ஒரு குறும்படம்தான் மஹாமுடி, த கிரேட். அது ஒரு நாடக உருவில் எழுதப்பட்டதால், அதன் காட்சி அமைப்பு நடிப்பை விட அதில் உரையாடல்களுக்குத்தான் முக்கியத்துவம். அது 3 பகுதிகளாக இருக்கிறது.  2010 ல் இப்படி மூன்று பகுதிகளாகத்தான் பதிவேற்ற முடிந்தது. அதன் மூன்று பகுதிகளின் சுட்டிகளும் இதோ - 

https://youtu.be/P4y97v37HnQ (பகுதி 1)  

https://youtu.be/qPynEeyLdAg (பகுதி 2)

https://youtu.be/OW5wVzCux_o (பகுதி 3) நேரம் கிடைக்கும் போது பார்க்கலாம். )

ஓண நிகழ்வுகளின் காணொளி

https://youtu.be/6AVZQs5xLcA

-----துளசிதரன்