சில்லு சில்லாய் – 2 – கூகுள் மேப்ஸ் - அலை அலையாய்

சென்ற சில்லில் எழுதிய நுண்ணுயிரியின் பெயர் பார்த்து ஏதோ ‘ரொட்டி’ யோ என்று எபி ஸ்ரீராம் ஓடோடி வந்து முதலில் ஆஜர் வைத்து கடைசியில் ஏமாந்து....!!!! 

இந்தச் சில்லில் அப்படி ஒரு தகவலும், சிறிய புலம்பலும். 

செயற்கைக் கோள் வழியாகச் செயல்படும் கூகுள் மேப்ஸ், ஒரு குறிப்பிட்ட இடத்தைத் தீர்மானிக்க, முக்கோண முறையைப் பயன்படுத்துகிறது. அதாவது 3 செயற்கைக்கோள்கள் இணைந்து ஒரு பொருளின் இருப்பிடத்தை துல்லியமாக தீர்மானிக்கிறது. ஒன்று சுணங்கினாலும் மற்றொன்று அதன் செயலைச் செய்யுமாம்.

கூகுள் மேப்ஸுக்குச் சென்று, பூமியை முழுவதுமாகப் பார்க்கும் வரை முடிந்தவரை (மைனஸ் அடையாளத்தைப் பயன்படுத்தி) பெரிதாக்கி, இடது மூலையில் உள்ள "செயற்கைக்கோள் காட்சிக்கு" மாற்றினால், எல்லா வழிகளிலும் பெரிதாக்கப்பட்டிருந்தால், நாம் ஆராயக்கூடிய கிரகங்கள் மற்றும் நிலவுகளின் பட்டியல் தானாகவே இடது பக்கத்தில் பாப் அப் ஆகுமாம். 

சமீபத்தில் கூகுள் மேப்ஸ், புதிய அம்சமாக, அதன் இன்டெர்ஃபேஸில் ஒரு டஜன் கிரகங்கள் மற்றும் நிலவுகளைச் சேர்த்துள்ளதாம். இதனால் பயனர்கள் தங்கள் வீட்டை விட்டு வெளியேறாமல் அதிக இடத்தை ஆராய முடியுமாம்.

தொழில் வகையில் பயனுள்ள அம்சங்கள் நிறைந்திருக்கும் அதே வேளையில்,  தனிப்பட்ட ஆர்வலர்களுக்கு ஒரு பொழுது போக்கு அம்சம். அப்படியான பயனர் ஒருவர் பூமியை ஆராய்ந்து கொண்டிருந்த போது, சீனப்பெருஞ்சுவர் அருகில் அடர்ந்த செடிகளின் நடுவில் சீன மொழியில் ஏதோ எழுதி இருப்பது அவருக்கு வித்தியாசமாகத் தெரிந்திருக்கிறது.

நம்பமுடியாத அளவிற்கு, விண்வெளியிலிருந்து உற்று நோக்கும் கூகுள் மேப்ஸ் தளத்தில் தெளிவாகத் தெரிகிறது என்றால் அந்த எழுத்துகள் எவ்வளவு பெரிதாக இருக்க வேண்டும்! என்ற ஆச்சரியம்.

தான் கண்ட இந்த அரிய நிகழ்வு குறித்து ரெட்டிட் இணையதளத்தில் அந்த நபர் பகிர்ந்து கொண்டிருக்கிறார். தொடர்புடைய இடத்தை மற்ற பயனர்களும் பார்த்துக் கொள்ளும் வகையில், கூகுள் மேப்ஸ் தேடு பொறிக்குள் தேடுவதற்கான முகவரியையும் (40.4499299, 116.5487750 அவர் குறிப்பிட்டு, கூடவே குறிப்பிட்ட அந்த எழுத்துகள் என்ன சொல்கின்றன என்ற கேள்வியையும் கேட்டிட.....

‘இது ஒரு அரசியல் பிரகடனம், பண்டு, ‘சீன மக்கள் குடியரசு’ நிறுவப்படுவதை அறிவித்த தலைவர் 'மாவோ'விற்குத் தங்கள் விசுவாசத்தை அறிவிக்கும் வகையில் இந்தச் செய்தி உள்ளது என்று சிலர் சொல்ல…

'தலைவர் மாவோவுக்கு விசுவாசம்’ அல்லது 'எனது விசுவாசம் தலைவர் மாவோவுக்கானது’ என அர்த்தம் கொண்டதாக இருக்கலாம் என்று சிலர் குறிப்பிட்டுள்ளனர்.

இது இப்போது வைரல் என்றாலும், 8 ஆண்டுகளுக்கு முன்பாகவே இது இணையதளத்தில் வலம் வந்த விஷயம்தான் என்றும் சொல்லப்படுகிறது.

2014ஆம் ஆண்டில், அப்போதைய அமெரிக்க அதிபர் ஒபாமாவின் மனைவி, மிச்லே ஒபாமா தனது இரண்டு மகளுடன் சென்று சீன பெருஞ்சுவரைப் பார்வையிட்டபோது, சீனப் பெருஞ்சுவரில் உள்ள 14வது டவரில் ஏறி நின்று புகைப்படம் எடுப்பதற்கு ஒரு சில புகைப்பட கலைஞர்களே அனுமதிக்கப்பட்டிருக்கின்றனர்.

அப்படி எடுத்த புகைப்படத்தில் ஒபாமா குடும்பத்தினருடன் சேர்ந்து, இந்த எழுத்துகள் இருந்த இடமும் இடம் பெற்றிருந்திருக்கிறது. அதில், “தலைவர் மாவோவுக்கு விசுவாசங்கள்’என்று பொறிக்கப்பட்டிருப்பதாகச் சொல்லப்பட்டதாம்.

சுமார் 40 ஆண்டுகளுக்கு முன்பு இந்த எழுத்துக்கள் உயரமான கற்களில் பொறிக்கப்பட்டிருக்கலாம் என்றும், தற்போது அதைச் சுற்றியிலும் மரம், செடிகள் படர்ந்துள்ளன என்றும் சொல்லப்படுகிறது. 2008ஆம் ஆண்டில் சீனாவில் ஒலிம்பிக் போட்டிகள் நடத்தப்பட்டபோது, அந்நாட்டு அரசு இந்தச் சுவர் எழுத்துக்களை புதுப்பித்ததாகவும் சொல்லப்படுகிறது.

இத்தனைக்கும் சீனாவில் கூகுள் சம்பந்தப்பட்ட செயலிகள் எல்லாமே தடை செய்யப்பட்டுள்ளது. சீனாவுக்குச் செல்பவர்கள் கூகுள் பயன்படுத்த முடியாது. (ஆனால் நம்ம டெக்னாலஜி கில்லாடிகள். அதற்கும் வழி எல்லாம் வைத்துள்ளனர்.) சீனாவும் அமெரிக்காவும் பங்காளிங்களாச்சே, கூகுள் அமெரிக்க நிறுவனம் என்பதால் சீனா ஒரு செயற்கைக்கோளை விண்ணிற்கு அனுப்பித் தனக்கான மேப்ஸ் செயலியை உருவாக்கி  அதைத்தான் பயன்படுத்துகிறதாம்.  

---நன்றி : இந்தியா டைம்ஸ் (வேறு சில தளங்களிலும் வந்திருந்தது)

பல மொழிகள் தெரிந்த, உலகம் சுற்றிய வாலிபர் கில்லர்ஜி! மேலே சொல்லப்பட்ட பொருள் சரிதானா? வாலிபர் 2 - நெல்லை உங்களுக்கும் சீன மொழி தெரியும்லா?!!!

(நம் வீட்டில் பொருள் ஏதேனும் காணாமல் போச்சுனா தேடிக் கொடுக்குமோ?!! இதை என் மூன்றாவது விழிக்குள் பொருத்தினால் இந்த கையடக்கப் பறவைகள், குண்டூசி நுனியளவு இருக்கும் பூச்சிகளைப் படம் பிடிக்க முடியுமோ! [ஹலோ! கீதே அது கோஸ்ட்லியாக்கும்! – கற்பனை சிறகடித்து விண்ணில் செல்ல காசு பேடா! (வேண்டாம்) அர்த்தவாகிதேயே? (புரிந்ததா?) ]

***************************************

கடல் அலையைப் பார்த்துக் கொண்டே இருக்கலாம். ரம்மியம். ஆனந்தம், பரமானந்தம். மனம் ஒருநிலைப்படும். கற்பனை சிறகடிக்கும். சிந்தனைகள் விரியும். கதைகள் பிறக்கும். கூடவே ‘Capture every moment’ என்று மூன்றாவது விழி பரபரக்கும்! எபி ஸ்ரீராமிற்குக் கவிதைகள் ஊற்றெடுக்கும்!

ஆனால் சீனா கிளப்பிய அலை என்று சொல்லப்படும் இந்த அலையைப் பார்த்து ரசிக்க முடியுமோ?  இப்போது மறுபடியும் 4வது அலையாம். நாங்கள் தயாராகிறோம் எல்லோரும் மாஸ்க்....இத்யாதி என்ற வழக்கமான பாட்டைப் பாடி கர்நாடகா அரசு எச்சரிக்கை மணி அடித்திருக்கிறது. 

அலை என்றாலே கொரோனா என்று தோன்றத் தொடங்கிவிடுமோ என்ற கவலை. சமூக வலைத்தளங்களில் ‘வைரல்’ ன்ற சொல்தான் ரொம்பப் பிராபல்யமாச்சே இப்போது! (கூகுள் மேப்ஸ் செய்தி கூட வைரலாம்!!) கொரோனா வைரலாகி வருகிறது என்றால் பொருந்திப் போகாதோ! எதுக்கு அலைன்னுட்டு?! ஆனால் இந்த ‘வைரல்’ ‘லைக்குகள்’ அள்ளாதே!

ஜூன், ஜூலையில் 4வது பரவல் தொடங்கும் என்று எச்சரிக்கை வந்துகொண்டிருக்கிறது. 8 நாடுகளில் பரவிக் கொண்டிருக்கிறதாமே! மற்றொரு செய்தி ஆகஸ்டில் என்று சொல்கிறது. தில்லி, ஹரியானாவில் இப்போதே கூடுகிறது என்றும் செய்திகள் மூலம் தெரிகின்றது. இந்தப் புதுசு எப்படி இருக்குமோ?

திருவனந்தபுரத்தில் இருக்கும் என் தங்கையின் கணவரின் 60து ஜூன் மாதத்தில்.  தற்போது தங்கையின் மகள் சென்னையில் இருப்பதால் - நானும் தங்கை மகளும் கலந்து பேசிக் கொண்டு - சென்னையில்தான் ஏற்பாடு செய்திருக்கிறாள். வீட்டளவில். குறைவான எண்ணிக்கையில் அதிகபட்சம் 20 பேருக்குள்.

நானும் அப்பாவும் செல்ல நினைத்திருக்கிறோம். ஆனால், இப்போது என்ன ஆகுமோ என்று அறியாத நிலையில். பரவல் இருந்தால் அப்பாவை அழைத்துச் செல்வது சிரமம். ரிஸ்க் எல்லாம் எனக்கு ரஸ்க் என்ற வடிவேலு டயலாக் செல்லுபடியாகாது!

கடல் அலையே வா வா எம்மைத் தழுவிக் கொள் என்று கவிபாடலாம் ஆனால் இந்த அலையோ? கரைக்கு வரும் முன்னரே நம்மைத் தழுவ விடாமல் பார்த்துக் கொள்வோம்!  நேற்று இன்று நாளை எப்போதும் எக்காலத்திற்கும் பொருத்தமாய்....பாரதியின் ...

"நல்லதுந் தீயதுஞ் செய்திடும் சக்தி

நலத்தை நமக்கிழைப் பாள்;

அல்லது நீங்கும்"என் றேயுலகேழும்

அறைந்திடு வாய் முரசே!

------கீதா